ilo toki

ilo toki

ilo toki mi li kama kalama.

• jan seme li toki?
• soweli suli pi nena suli.
• lon seme?
• lon tomo pi soweli suli pi nena sijelo.
• sina wile e seme?
• e suwi.
• tawa jan seme?
• tawa jan lili mi.
• jan o pana e mute anu seme?
• e mute pona
  anu mute sin.
  taso mute mute li ike tawa ona.
  ona li lili a.

sin la kepeken toki ilo la
akesi pi uta suli li toki
li pana e telo tan lukin:

• jan suwi o, jan pona o,
  o pana e len noka
  tawa mi en meli mi en jan poka
• o, seme anu tawa sina la
  tenpo esun pini la
  mi pana e len noka
  pona tu tu?
• a, mu, sina pana e ona
  lon tenpo esun pini a.
  taso mi mute li moku e ona ale.
  mi mute li wile lon tenpo kama.
  ona la sina pana sin
  — tawa moku pi mi mute —
  e len noka mute
  pi sin en suwi!

sin la kepeken ilo toki la soweli pi kute suli li toki:

• seme anu sina ken pana e len luka?

sin la kepeken ilo toki la soweli kasi li toki:

• o pana e lipu!

sin la kepeken ilo toki la soweli pi luka wawa li toki.
tenpo ni la ona li kama pana e telo tan lukin.

• o awen, soweli o pilin ike ala,
  o toki e ni: sina wile e seme?

taso ona li mu li mu
tan seme?
mi sona ala.

• o pana e palisa open!

sin la kepeken ilo toki la waso li toki:

• o pana e wan telo:
  mi mute li moku e akesi pi mute ike.
  tan ni la insa sijelo li pana e pilin ike.

nasa ni
li lon ale pi tenpo suno:
sin-si-len,
sin-si-len,
sin-si-len!
soweli pi telo suli en soweli pi palisa lawa nasa li toki.

tenpo pi pini lili la soweli tu pi palisa lawa
li kepeken ilo toki li kalama:

• ni li kama
  anu seme:
  ilo musi suli ale
  li kama pakala tan seli?

• a, lawa sina la seme li lon, soweli o?
  ilo musi suli ala
  li kama pakala tan seli
  sama supa len!
  soweli o toki nasa ala.
  tenpo esun kama la
  o musi o kepeken
  ilo musi suli pi supa len!

taso soweli pi palisa lawa li kute ala
li toki nasa sin:

• ni li kama
  anu seme:
  supa len ale
  li kama pakala tan seli?

soweli pi palisa lawa li nasa a!

kama pi tenpo suno pini la
soweli pi poki sijelo li toki:

• seme anu ni li tomo
  telo? -
  mi kama pilin utala:
• ala! ni li tomo pi jan ante!!!
• tomo telo li lon seme?
• mi sona ala toki e ni tawa sina…
  o lukin kepeken nanpa wan, tu, luka.

tenpo pimeja mute la mi lape ala,
mi wile lape.
mi kama lape la,
mi pini pali la…
taso mi kama lon supa lape la,
kalama pi ilo toki li kama.

• jan seme li toki?

• soweli pi kiwen nena.

• seme?

• pakala li kama, pakala li kama a!
  tenpo lili la o tawa ni!

• seme li lon?

• o pana e pona!

• tawa jan seme?

• tawa soweli telo!
  soweli telo mi li kama anpa lon ma pi ko telo…

• ona li kama anpa lon ma pi ko telo?

• a!
  ona li ken ala tawa li ken ala tan!
  o, sina kama ala la,
  ona li moli lon ma pi ko telo,
  li kama anpa li kama weka.
  soweli telo o!!!

• pona! mi tawa ni lon tenpo lili!
  mi ken la, mi pana e pona!

a, pali ni li ike:
jan li tan ma pi ko telo e soweli telo.