sina pilin oke, anu seme?
jan Tonju
25/6/2020
o lukin!
ni li lon!
ni li seme?
tan seme?
ona li pali e seme lon ni?
mi sona ala.
taso, mi sona e ni:
ni li lon.
jan mute li sona ala e ona, li toki tawa ona:
ike!
nasa!
jaki!
sona mi la, toki pi jan mute li ike tawa ona. taso, mi toki lon poka jan mute.
ike!
nasa!
jaki!
mi toki sama ala la, mi nasa.
ona li sona ala e toki pi mi mute. anu la, toki pi mi mute li suli ala tawa ona.
ona li toki ala.
taso sina sona.
sina sona la jan ale li sama. sina sona ala la ona li seme, li tan seme, li pali e seme lon ni; taso, sina sona la, ona li pilin ike, li pilin ike tan mi mute.
sina sona la sina ken pana pali tawa ona. sina ken pilin pona e ona.
sina kama lon sinpin;
jan ale li lukin tawa sina.
sina toki ala;
jan ale li awen.
jan ale li awen - jan ale li wile kute e toki sina.
sina toki ala. sina lukin wawa e jan ale.
(ona li lukin tawa sina, kin.)
oko sina li suwi, li suli, li pali e ni: mi pilin, mi toki. tan sina la, lawa mi li pali wawa, li toki wawa. lawa mi li tawa tenpo pini mute mute mute -
mi sin;
mi ike.
mi nasa
mi jaki.
sona mi la, ni li lon. jan mute li toki e ni; ni li lon.
jan mute li toki ike tawa mi.
ike!
nasa!
jaki!
taso sina ante. sina toki sama ala e jan mute. ala; sina toki ala.
taso sina wawa; tenpo kama lili la, jan ale li toki ike ala. tan sina.
sina toki e ni tawa mi:
sina pona mute a!
sina pilin oke, anu seme?
tenpo ni la, mi sona la, mi pilin e ni: mi wile kama sama e sina.
o kama sin e tenpo ni. jan sin li lon; jan sin li pona; jan sin li kama e toki ike mute.
mi lukin e jan sin - ona li lukin pilin ike, li pana e telo oko. sina lon poka ona, li alasa pilin pona e ona.
mi seme?
mi ike. mi lon weka e ona; mi toki ike tawa ona, li lon poka e jan ale, li pilin pona ala e ona. mi ike. mi la, mi ike. mi ike tawa mi.
ni li ike. ni li ala e wile mi.
mi sona. mi tawa wawa ona. mi luka e luka ona, li lukin tawa ona, li toki e ni:
sina pona mute a!
sina pilin oke, anu seme?
sina pona.