ante

uta mi li pana e toki pi sin ala, taso, sina lon poka mi la, ale li kama pona.
-ilo pi sitelen tawa musi wan

tenpo pini lili la, jan Sali li kama sona e kulupu lon lawa ona. mi tan kulupu ni. ona li pilin ike. ona li wile ala e kulupu, taso sona ona la ni li ken ala ante. ona li wile kama olin e kulupu.

mi jan Melako. nimi mi li ni tan nimi melome (meli pi olin meli) tan nimi namako. pilin mi la, nimi tu ni li mi mute.

tenpo pini ni la, jan pi mute lili li lon kulupu. ale li pona. ale li suwi. mi lukin e jan wan. jan Niko. ona li pilin ike tan mi. ona li wile ala e mi. mi wile sona e tan. mi kama sona e ona. ona li kama sona e mi. ona li wile ala e mi kin, taso ona li ike ala tawa mi. ona li wile e pona tawa mi. ni li suwi lili.

ona li suwi lili.

mi wile lukin e sitelen tawa musi. taso ona li wile ala e ni. ona la, sitelen tawa li ken pakala e pilin pi mi mute. taso mi pilin ante. mi lukin e sitelen tawa. ona li lukin kin tan ni: mi wan li pilin ike la, ona li wile pona e mi mute. ona li sona ala e ni: ona li ken pona e pilin pi jan ante kepeken nasin seme? taso ona li wile ala e pakala tawa mi mute.

ona li kama olin e jan wan pi sitelen tawa. ona en mi la, jan pi musi ni li sama ona mute.

jan Niko li ante.

ona li sona ante e ijo mute. ona la, pona li ken ala lon lon poka ike. ona tu li ante. ijo li pona la, ijo ni li pona taso. ijo li ike la, ijo ni li ike taso.

tenpo pi ona lili la, jan mute li wile moli e ona. ona li kama sona e ni: ona li ken pakala e jan ike kepeken nasin seme? ona li ken sona e moku jaki moli kepeken nasin seme?

lawa ona li sama soweli. ona li ken moli e ijo ante. ijo ante li ken moli e ona. ona li sama e soweli wawa suwi.

ona li wile ala pana e pilin ike ona. ona la, ni li open e ni: jan li ken pakala e ona. mi wile ala ike e pilin ona, ni la, mi open ala e pilin ona.

taso, mi kama pilin pona tan ona. ona li sama. mi tu li wile lon lon poka sama.

jan ante li kama lukin ala e sitelen tawa ni. mi en jan Niko taso li lukin. jan Tesi li musi jaki, taso ona li pona.

mi lon poka pi jan Niko la, ale li pona.

tenpo wan la, mi tu li lukin e sitelen ni. ona li pilin ike. “tan seme?”, mi wile sona, taso ona li toki ala.

mi lon poka ona. mi wile pona e pilin ona, taso sona mi la mi ken ala. tenpo li tawa. tenpo li tawa mute kepeken tenpo lili. ni li nasa, anu seme a?

ona li toki. ona li toki e pilin ike ale ona tawa mi. mi kute. mi ken ala sona e pilin ona. taso, mi kute. lukin ona li pana e telo. ona li pilin ike tan ni. pilin ona la, mi ken pakala e ona kepeken wawa lili. taso mi wile ala pakala e ona. mi wile pona e ona. ona li pona mute. ona li wawa mute.

tenpo li tawa kin. ale li nasa. ona li sona ala e pilin ona. mi sona ala e pilin mi. jan ante li sona. jan Tesi li toki musi e ni: mi tu li olin. ona li kalama musi. “o moli”, mi toki tawa ona. “mi wile”, ona li toki tawa mi.

taso toki ona li lon. mi ken ala kute e toki pi jan niko lon lawa mi la, mi ken ala tawa tan ma sona tawa tomo. mi ken, taso mi pilin ike. mi wile kute e kalama ona.

ma sona li ike mute ala. ona li pona ala, taso ona li ike ala. jan Niko la, ni li nasa.

tenpo wan la, mi pana e moku suwi tawa ona. ona li pilin e kon ona. ona li toki e ni: “ni li jaki moli anu seme?”. ona li moku e ni la, ona li moku sama soweli. ni li suwi tawa mi. moku li pini la, ona li wile e ni mute a.

tenpo kama la, mi toki e ni tawa jan pona mi. “a, mi wile sona e ijo pi nasa lili. jan pi kulupu lawa li ken olin e jan pi kulupu sama?”

ona li toki e ni: “sina olin e jan Niko, a?”

pilin mi la, mi moli mute mute mute. toki ona li lon, taso mi wile ala e toki ni kepeken nasin ni.

“olin. mi olin lili e ona”
“a, pona. ken! ni li lon kulupu mute kin!”

mi pilin pona tan ni. taso mi wile sona,

“sina sona e ni tan seme?”
“mi sona? jan ale li sona”

a. pona? ni la mi sona ala e pilin mi. jan Niko li sama. pilin ni li sin mute tawa ona.

taso, pilin ona li ante. mi ken ala toki e pilin ona. ona li sama. pilin li nasa tawa ona. pilin ona la, jan ale li ken lon poka mute ona. ni li ike tan ni: jan li lon poka ona la, ona li ken moli e ona kepeken wawa lili. taso, ona la, mi ante. mi jan ike ala. mi jan pona, taso pona mi li nasa.

mi ken ala pona e ona, taso, nasin nasa la, mi pona tawa ona. ona li sona ala. ken la, toki mi li ike lili. mi sona ala.

tenpo lili li tawa. taso, sin la, ona li tawa kepeken tenpo mute. ni li nasa kin. ale li nasa kin.

mi toki e ni. “sona pi mi tu la, mi olin e sina, sina olin e mi.”

mi pilin ike. ona li pilin ike tan toki mi la, mi pali e seme? mi pona e pilin ona kepeken nasin seme? mi ike tan ni, anu seme?

“mi sona. mi olin mute e sina. olin li nasa, sina sona ala sona?”
“mi lon poka sina la, ale li ken nasa”
“sina nasa”
“lon”