sitelen suwi

jan pi toki suwi li tan ma Mosijo. nimi ona li T. Falu. ona li sitelen e toki suwi lili ni. nimi toki li “mi awen li wile weka e ijo”:

“pilin ike lon sijelo,
lon sijelo pi sin ala
li tan ala pi lon ali.
mi toki e ni: ‘tenpo o,
moli o, tawa weka a’

mi sitelen e wile mi
sewi o, tan mute li ni:
olin, kalama, pilin pona,
tomo lili, kasi kule
lon tenpo pi seli kama,
ma lon tenpo pi kon tawa”

tenpo li tawa. tenpo suno mute la mi awen li wile weka e tenpo kin. musi li pini la jan li weka e tenpo kepeken sona pi tenpo pini. sona ali ni li pana e ike tawa tenpo. mi wile weka e tenpo la mi sitelen e toki ni. ona li tan ma Epelanto.

toki ni li lon tenpo pi pini mute. utala suli nanpa wan li pini. jan li pilin ala e kon ike kama tan utala suli nanpa tu. kon li pona pilin. tenpo pi suli lili la mi kama sona e toki Epelanto. taso, mi kama sona mute. mi pana e sona lon tomo sona lon ma tomo mi. jan pona mute li lon insa tomo. ona li sona mute. ona li meli, li mije, li jan pi kama sona, li jan pi pali musi, li jan pali pi pona sijelo, li jan sona pi pali ilo, li jan sona pi lipu lawa, li jan pi pali tomo, li jan pali pi supa lipu, li jan mute pi pana sona kin.

tenpo seli la jan mute li tawa ma tomo Putapesi li esun li musi mute. mi en kulupu mi pi kama sona li tawa kin. mi mute li toki e ijo pi toki Epelanto tawa jan mute. tenpo musi li pini la mi pana e sona tawa kulupu mi lon tomo sona. tenpo ni la poka ni pi ma Elopa li kama seli sama ma Apika. taso, sijelo mi li kama ala ko sama moku lete suwi lon anpa suno. jan li musi mute lon tomo sona la ona li ken ala lape. tenpo pi seli mute la mi pini pana e sona pi toki Epelanto. kulupu sona mi li sitelen tawa lipu pi ijo sin. lipu li nimi “Heroldo de Esperanto”:

“jan pi pona lukin, jan pona, jan pi pali pona, jan pi sike suno lili, jan pi sike mute, jan pi sijelo suli, jan pi sijelo lili, jan mani, jan pi mani lili, li kama sona e toki Epelanto tan jan F. S., li wile sitelen lon jan pi sona sama tan ma ante.”

jan mute li lukin e toki ni. mi sona pona e tenpo pini la ni li lon: jan mute mute tan ma ante mute li toki tawa kulupu mi. ona li sitelen e lipu mute pi toki musi suli, li kama jan pona tawa sama, li toki e ijo suli, li pana e sitelen lili tawa sama. toki li musi, li sona mute. lipu li pona lukin. mi en kulupu mi li kama sona pona e nasin toki pi ma ante mute. ni li pona tawa mi mute. taso, lipu wan tan ma ante li pona mute tawa mi. mi lukin e lipu lon tenpo nanpa wan la ona li pona tawa mi. mi lukin ala e sitelen toki, taso, ona li pona. mi sona tan ni: sitelen pi sinpin meli li lon sewi lipu. sinpin li lukin musi. sinpin li pona lukin. sitelen toki li wawa lili, li pona pilin, li ijo sin, li sama kulupu pi kasi kule tan ma. meli pi toki sama li jan pi pana sona. ona li lon poka anpa pi ma Elopa — mi o toki ala e nimi ma, ni li suli ala — ona li wile sitelen lon mi. ona li wile ala sitelen lon jan pi kama sona. tenpo nanpa wan la ona li sitelen e ni: o pana e sitelen pi sinpin sina tawa mi.

mi sona pona e tenpo pini ni. lipu li kama tan ona. mi jan pi sike suno lili kin. tenpo suno kama la mi pilin nasa olin kin. mi pini nasa, mi nasa kin, mi kama nasa sin. mi o sitelen e toki tawa meli. ona li weka mute taso ona li pilin lon. tenpo ni la mi sona ala e ni: mi sitelen e seme. tenpo suli la mi pilin mute. mi o pana e sitelen sinpin seme tawa ona? mi wile ala e ni: ona li olin ala e mi. mi jo taso e sitelen sinpin wan pi pona lukin. ona li lon lipu pi ijo sin tan ma Mosijo. mi wile pana e ni. taso, sitelen toki ike li lon poka ante. mi tu e sitelen tan lipu kepeken ilo tu. mi wile wan e ona lon sewi pi lipu toki mi. taso, tenpo pi suno tawa anpa ni la mi pakala lili. ike a. ko wan li lon ala insa tomo. mi jo ala. tenpo suno ni la esun li pini. mi wile ala awen e tenpo pi suno kama. tenpo ni la mi o pana e lipu toki! mi pana ala la lipu li ken kama pakala lon insa pi poki len mi. ken la pilin mi pi ike kama li nasa lili. taso, tenpo pini mute la mi pakala e lipu nasin ni. tenpo ni la mi o pali e lipu toki! taso, nasin seme? mi pilin mute. jan li pana e telo wawa tawa mi li pini e pilin mi. pan en ko jelo en ko suwi tan pipi kon li lon poka pi telo wawa lon supa. mi lukin e ko suwi la mi jo e pilin sin. ko suwi li ken wan e ijo tu. mi moku e telo wawa lon tenpo lili. mi pini lukin e lipu toki mi. mi jo e sitelen sinpin mi lon luka. mi pana e ko suwi lon poka ante ona. mi wan e ona lon lipu toki. mi lukin sin e sitelen sinpin e lipu toki. mi pilin pona. (sina sona, sitelen sinpin mi li pona mute lukin. sinpin mi li pona lili lukin taso.)

lipu li tawa poka anpa pi ma Elopa. toki mi pi nasa olin lili li tawa lon lipu. mi awen e toki sin tan meli.

tenpo pi suli ala la mi awen. jan pali pi pana lipu li pana e lipu sin tawa mi. ona li lukin e mi. sinpin mi li lukin musi. sina sona e tan: lipu li tan meli.

mi sitelen e toki musi pi ali ni taso mi sona ala e ni: lipu tan ona li lon ala lon. ken la poki lipu mi li lon anu ken la ona li kama pakala tan utala. taso mi awen sona e lipu ni. nimi ali ona li lon insa lawa mi:

“jan pona pi toki sama o, tenpo ali la mi sona e ni: sina mije suwi. taso, tenpo pini la mi ken ala sona e ni: sina suwi mute a. tenpo suno ni la lipu toki sina li kama. ona li suli, li pona, li jo e sitelen sinpin sina. mi lukin e lipu toki lon insa pi tomo lape mi. suno mute li lon tomo ni. taso, mi ken lukin lon tenpo lili taso, tan ni: suno li pona, lupa li open. pipi kon wan li kama insa. pipi kon tu li kama. pipi kon mute. pipi kon suli pi ilo utala ike. pipi ali li lukin olin li wile uta e sitelen sinpin sina. mi pini e lupa. mi toki e ni: ‘pipi meli mute, o! sitelen ni li tawa mi taso.’ taso, mi wile sona e ni: sina suwi ala suwi sama sitelen sina?”

toki musi ni li tan tenpo pi pini mute. jan seme li sona e ni: meli li lon seme. tenpo li tawa, ijo mute li kama ante. mi kama ante kin. tenpo wan taso la mi wan e lipu tu kepeken ko suwi. tenpo ni la mi awen li weka e tenpo kepeken sona pi tenpo pini.

— tan jan Ferenc Szilágyi lon toki Epelanto. toki pona tan jan Kaja lon tenpo 26/07/2020

jan Tepan en jan Kipo li pona e sitelen ni.