ma pi lon ala

tan palisa jelo Natan

“lipu musi li toki e ijo lon kepeken ijo pi lon ala” - jan Ape pi mama Kamu

open la jan Same en mama ona li lon ma. lon lon lon la toki pona li lili sama ala toki Inli. taso ma ni li ma pi lon ala.

oko mi li kama open lon tenpo pi open suno. suno li kama lon lupa lukin sama palisa. kalama pipi li kama tan ilo tenpo li kama pini tan pilin pi luka mi.

weka tan supa lape la mi kama jo e moku li pali moku. kalama pi wawa ala la mi kalama e ni tawa mama mi: “tenpo open pona, mama o.”

“tenpo open pona a, jan suwi mi o!” li kalama tan uta pi mama mi. “tan lukin la sina pilin lape. ni li lon tan seme?”

“a. musi sin li kama tawa mi. sina sona ala sona e kon pi nimi ‘toki pali?’” toki ni la mi pana e pan tawa supa moku. kepeken ilo la mi tu e pan li pana e waso tawa insa. pilin pona pi sinpin lawa mi li kama tan lukin mi pi moku ni. mi la ona li pona tawa uta.

mama mi li toki e ni: “pilin mi la mi sona. insa lawa mi la ona li toki tan pali jan. musi ni li tan ala tan pi pilin lape sina? ona li weka e tenpo sina la ni li ike. tenpo lape sina o tawa lape. jan lili mi o, o sona e ni…”

mi toki e ni: “mama mi a. mi o awen toki. toki pali pi musi mi li sama ala toki pona. ken la sina pilin e ni: ona li nasa. nimi pi mute suli li lon toki ni. poka pi nimi ante la nasin toki pi nimi wan ona li kama ante. ni li nasa kin. taso ona li musi pona tawa mi. ona li weka e tenpo ike mi tawa tenpo pona. toki pona la nimi pi toki pali ni li ken toki Inli.”

nasin toki pi pilin musi lili la mama mi li toki e ni: “nasa a a. mi sona ala e tan sina pi kepeken pi toki ni. ken la kepeken sina pi tenpo sina li ken tawa ijo musi ante. musi ni li pona ala tawa sina lon lon lon. lon lon lon la jan li toki pona. ijo musi sina o pona tawa sina sama kalama musi sama tawa. kalama musi li pona. tawa li pona tawa sijelo. taso toki Inli li pona tawa ijo ala. kin la toki ni li toki lon ala. toki pali li toki pi lon ala. nanpa tu wan la jan li ken toki kepeken nasin seme lon toki ni a! nimi mute li lon. toki li sama ma. ijo mute mute li lon ma la ijo ale ni li lili. taso ijo pi mute ala li lon la ijo ale li ken suli li suli. ni la nimi mute li lili e ken toki e kon nimi. tan ni la kepeken nasin seme la jan li toki kepeken toki… a… toki pali ni. nimi ona li seme?”

wawa ala la mi toki e ni: “toki Inli. ante la ona li pona tawa ijo ala ala. ona li pona tawa mi.”

“a lon. toki Inli. ken la ona o pona ala tawa sina. mute nimi li suli lon toki Inli. taso mute li ni lili e kon nimi e ken toki. jan lili mi o, ni la jan li ken toki kepeken nasin seme lon toki Inli?”

pilin pi ike lili la mi toki e ni: “ale ni li lon. nimi ale pi toki Inli li kon lili. taso nasin ni pi nimi mute li pana e ken. ma kon pi toki sina la ni o lon: jan mute mute li pali e tomo lon ma. sina toki e ni: ma kon ni pi toki pona la ijo ale li suli tan ni: ma wan li weka tawa ijo pi mute ala taso. ante la sina toki e ni: ma kon ni pi toki Inli la ijo ale li lili tan ni: ma wan li weka tawa ijo pi mute suli. taso ma kon ni pi toki pona la jan mute li pali e tomo lon ijo wan. ijo li suli la tomo mute li kama pali lon ijo sama. ni la sina ken toki e ijo pi tomo wan kepeken nasin seme?”

weka pi lukin toki mi la mama mi li toki e ni: “a… ken taso sina ken awen sona e kon. kin la…”

“mama mi o, sina ken toki lon pini pi wile toki mi. tomo mute li tawa ijo sama la sina ken toki e ijo pi tomo wan kepeken nasin seme? sina ken ala. awen sona li awen lon. taso ken pi sona ala li kama suli. ni li ante tawa toki Inli. toki Inli li nasin e ken sona. ma kon ni pi toki Inli la tomo lili anu tomo wan li lon ijo sama. ni li lon tan ni: ijo pi mute suli li lon ma sama la ijo ale ni li lili. ni la sina toki e ijo la jan li ken sona e kon tomo kepeken wawa lili. ni li tan lon pi toki Inli. ona li nasin e ken sona li weka e wawa tan ken sona.”

kalama ala li awen lili lon uta pi mama mi. taso pini pi weka kalama la ona li toki e ni: “awen la mi pilin e ni: toki pali Inli li nasa mute li pona ala tawa sina. tenpo sina o lon tawa pona sina. taso… mi wile ala lawa ike e sina. ni la sina ken awen kama sona e toki nasa pi wile sina. ante la ken pi toki nasa sina li suli ala. jan li kepeken ala e ona la ona li suli ala.”

tawa mama mi la mi toki e ni: “mi mute li ken ala ken awen toki e ni lon tenpo kama? mi wile open moku e moku mi pi tenpo open.”

“ken, jan suwi mi o. o moku pona.”