jan Kense en jan Kete

sinpin pi ma kasi suli la jan pi pali kasi en meli ona en jan lili tu ona li lon. nimi pi mije lili li Kense. nimi pi meli lili li Kete. ona li jo e moku lili. weka moku li lon ma la ona li ken ala kama jo e pan pi tenpo suno ale.

mije li toki insa e ni lon tenpo pimeja lon supa li tawa tan pilin ike. ona li toki tawa meli ona. “mi kama seme? nasin seme la mi ken pana e moku tawa jan lili mi? mi jo ala a e moku tawa mi tu a.”

“mije mi o.” meli li toki. “tenpo suno kama la mi pana e jan lili tawa ma kasi tawa ma pi kasi mute. ni la mi pali e seli. mi pana e pan wan tawa ona. mi tawa weka li pali. ona li ken ala kama lukin e nasin tomo. ona li weka tan mi.”

“ala.” mije li toki. “meli o, mi pali ala e ni. mi ken ala weka e jan lili mi tawa ma kasi. soweli ike li kama li pakala e ona.”

“sina nasa a!” ona li toki. “ni la mi mute li kama moli tan wile moku. sina wile pali e poki moli mi.”

mije li wile ala la meli li toki tawa ona tawa ni: ona li wile. “taso mi awen pilin ike tan jan lili.” mije li toki.

jan lili tu li ken ala lape tan wile moku li kute e toki meli tawa mama mije ona.

jan Kete li pana e telo tan lukin li toki tawa jan Kense. “tenpo ni la ale mi li pini.”

“jan Kete o kalama ala.” jan Kense li toki. “o pilin ike ala. mi kama lukin e nasin pi awen pona.”

jan suli li kama lape la jan Kense li kama sewi li kama jo e len lili ona li open e lupa lon anpa li tawa selo tomo. mun li suno wawa. kiwen lili walo pi sinpin tomo li kama pana e suno sama mani. jan Kense li kama anpa li kama jo e mute pi ken jo lon poki lili pi len ona.

ona li tawa jan Kete lon tenpo sin li toki. “meli sama lili mi o pilin pona. o lape pona. sewi li weka ala e mi.” sin la ona li kama anpa lon supa lape ona.

tenpo suno li open. taso suno li kama sewi ala. meli li kama li pini e lape pi jan lili tu li toki. “jan ike pi wile pali ala o kama lon. mi tawa ma kasi li kama jo e kiwen kasi.”

ona li pana e pan lili tawa ona li toki. “ni li moku sina. o moku ale ala e ona. sina kama jo taso e ni.”

jan Kete li kama jo e pan lon len sinpin ona. jan Kense li jo e kiwen lon poki len ona. ona ale li tawa lon nasin pi ma kasi. ona li tawa pi tenpo lili la jan Kense li awen lili li lukin lon monsi. ona li pali e ni lon tenpo mute li pana e kiwen walo lili tan poki len ona tawa nasin.

ona li kama lon insa pi ma kasi la mama mije li toki. “jan lili o kulupu e kiwen kasi. mi pali e seli tawa ni: sina lete ala.”

jan jan Kense en jan Kete li kulupu e kiwen kasi lon nena lili. mama li seli e kiwen kasi. seli li kama suli la meli li toki. “jan lili o kama anpa lon poka seli o lape. mi tawa ma kasi li kama jo e kiwen kasi. mi pini la mi kama sin li kama jo e sina.

jan jan Kense en jan Kete li kama anpa lon poka seli. insa pi tenpo suno li kama la ona tu li moku lili e pan. ona li kute e kalama pi ilo kasi la ona li pilin e ni: mama ona li lon poka. taso ona li ilo kasi ala. mama ona li pana e palisa kasi lon kasi moli. kon li tawa e ona. jan lili li awen lon ni lon tenpo suli la lukin ona li kama pini tan wile lape. ona li kama lape wawa.

lape ona li pini la tenpo pimeja a li lon. jan Kete li pana e telo tan lukin li toki. “tenpo ni la mi tawa tan ma kasi kepeken nasin seme”

taso jan Kense li toki pona tawa ona. “o awen. mun li kama sewi la mi ken lukin e nasin.”

mun li kama sewi ale la jan Kense li kama jo e luka pi meli sama lili ona li tawa lon nasin pi kiwen lili suno sama mani sin.

ona li tawa lon tenpo pimeja ale. open pi tenpo suno la ona li kama lon tomo pi mama ona. ona li kalama lon lupa. meli li open e ona li lukin e jan Kense e jan Kete la ona li toki. “jan lili ike o sina lape mute lon ma kasi. pilin mi la sina kama ala lon tenpo sin!”

taso mama mije li kalama tan pilin pona. ona li weka e ona la ona li pilin ike mute.

tenpo pi kama lili la weka moku li kama sin lon ma ale. jan lili li kute e toki pi mama meli ona tawa mama mije ona: “tenpo sin la moku ale li pini. mi jo taso e pan lili wan. ni li pini la ale li pini. jan lili o tawa. mi weka mute e ona tawa ma kasi. ni la ona li ken ala sona e nasin weka. nasin ante ala la mi ken awen e mi!”

mije li pilin ike mute. ona li toki insa. “pona la sina en jan lili sina a li moku e pan lili awen!” taso meli li kute ala e toki ona. ante la ona li toki utala li toki ike tawa ona. taso sama tenpo pini la ona li pali e ni lon tenpo ni.

jan lili li awen lon li kute e toki. jan suli li lape la jan Kense li kama sewi sin li wile kama jo e kiwen lili. taso meli li pini e lupa. jan Kense li ken ala tawa selo tomo. ona li toki pona tawa meli sama lili ona. “o pana ala e telo lukin. jan Kete o kama lape pi kalama lili. sewi pona li pana e pona tawa mi.”

open pi tenpo suno la meli li kama li weka e jan lili tan supa lape ona. ona li pana e pan lili tawa ona. taso ona li lili mute a. nasin pi ma kasi la jan Kense li pakala e pan ona. tenpo mute la ona li awen lili li pana lili e pan pakala lon nasin.

meli li awen lawa e jan lili tawa insa pi ma kasi. tenpo ala la ona li lon ma ni pi ma kasi. meli li pali sin e seli suli li toki. “jan lili o awen lon ni. sina wile lape la sina ken lape lili. mi tawa ma kasi li kama jo e kiwen kasi. mi pini lon tenpo pimeja la mi kama tawa sina.

insa pi tenpo suno la jan Kense en jan Kete li moku e pan pi jan Kete tan ni: jan Kete li pana e ona lon nasin. ona li kama lape. tenpo pimeja li kama. taso jan ala li kama tawa jan lili.

ona li awen lape tawa tenpo pi pimeja mute. jan Kense li toki pona tawa meli sama lili ona. “jan Kete o awen. mun li kama sewi la mi lukin e pan lon nasin. ni la mi sona sin e nasin tawa tomo mi.”

mun li kama la ona li tawa. taso ona li lukin e pan ala. waso mute pi ma kasi ni li kama jo ale e ona. jan Kense li toki tawa jan Kete. “mi kama lukin e nasin.” taso ona li lukin ala e ona.

ona li tawa lon tenpo pimeja ale lon tenpo suno kama ale tan open pi tenpo suno tawa tenpo pimeja. taso ona li kama weka ala tan ma kasi. ona li wile moku mute tan ni: ona li moku mute ala. ona li moku taso e kili tu pi lili mute lon ma. ona li pilin mute pi wawa ala la ona li kama anpa lon poka kasi li kama lape.

tenpo pi pini mute la ona li kama weka tan tomo pi mama ona. ona li kama tawa lon tenpo sin. taso tenpo ale la ona li tawa insa a pi ma kasi. jan pona li kama ala la ona li moli tan wile moku tan weka wawa.

insa pi tenpo suno la ona li lukin e waso pona pi walo lete lon palisa kasi. ona li kalama musi pona a. ni la ona li awen li kute e ona. ona li pini e kalama musi ona la ona li tawa e luka ona li tawa weka. ona li tawa lon monsi ona tawa tomo lili. supa sewi tomo la waso li awen.

ona li kama lon poka pi tomo lili la ona li lukin e ni: sinpin li pan. pan suwi li lon poka ale. kiwen lupa li kiwen suwi pi kule kon.

“mi moku pona e ni.” jan Kense li toki. “mi moku e supa sewi. jan Kete o, sina ken moku e kiwen pi lupa lukin. ona li suwi tawa uta.”

jan Kense li pakala lili e supa sewi li wile uta e ona. jan Kete li tawa lupa lukin li moku lili e selo lupa. kalama lili li kama tan tomo:

“moku! moku lili! seme li moku e tomo mi?”

taso jan lili li awen moku. jan Kense la supa sewi li pona tawa uta. ni la ona li pakala suli e ona. jan Kete li kama jo e sike wan ale pi kiwen lupa li kama anpa li pilin pona tan ona.

lupa sinpin li kama open. meli pi suli mute li kama kepeken palisa tawa. jan Kense en jan Kete li pilin ike mute. ijo pi 

meli suli li tawa pona e lawa ona li toki. “jan lili pona o, jan seme li pana e sina lon ni? o kama lon insa. pakala ala li kama tawa sina.”

ona li kama jo e luka ona li lawa e ona tawa insa pi tomo lili ona. ona li pana e moku pona lon sinpin ona. telo mama en pan lipu suwi en kili li lon. ona li pini la meli li len e supa lape lili pona tu kepeken len walo pona. jan Kense en jan Kete li kama anpa lon ona. pilin ona la ona li lon sewi.

taso pona pi meli suli li lon ala. lon la ona li jan ike pi wawa nasa. ona li awen tan jan lili. ona li pali e tomo pan lili tawa ni: ona li kama lon poka. jan lili li kama tawa ona la meli li moli e ona li seli e ona li moku e ona. tenpo suno ni li tenpo suno pi moku suli tawa ona.

lukin pi jan wawa nasa li loje. ona li ken ala lukin pona. taso ona li ken pilin pona e kon sama soweli. jan li kama lon poka la ona li sona. jan Kense en jan Kete li kama tawa ma poka ona la ona li kalama ike tan pilin pona li toki ike. “mi jo e ona. ona li tawa weka lon tenpo sin ala!”

jan lili li awen lape lon open pi tenpo suno la meli li lon. ona li lukin e ni: ona tu li lape pona li pona lukin. poka sinpin pi ona tu li suli li loje. ona li toki tawa ona sama. “ni li moku pona a!”

ona li kama jo wawa e jan Kense kepeken luka jaki ona li pana e ona tawa tomo soweli lili li pini e lupa. ona li ken kalama. kalama li pona ala e ona!

ona li tawa jan Kete li tawa e ona tawa ni: ona li kama lon. meli li kalama. “ijo ike o kama lon. o kama jo e telo. o seli e ijo pona tawa jan sama sina. ona li lon tomo soweli lon selo tomo. ona o kama suli. ona li suli la mi moku e ona.”

jan Kete li pana wawa e telo tan lukin. taso ni li kama e ala. meli pi wawa nasa li lawa e ona.

ona li pali e moku pi pona mute tawa jan Kense. jan Kete li kama jo taso e selo kiwen kala. open pi tenpo suno ale la meli li tawa tomo soweli lili li kalama. “jan Kense o pana e luka sina. mi wile sona e ni: sina kama ala kama suli?”

tenpo esun mute li kama pini la ona li pilin ike mute tan awen. “jan Kete o!” ona li kama tawa meli lili. “o tawa. o kama jo e telo. jan Kense li suli anu lili la mi moli e ona li seli e ona lon tenpo suno kama.

a! ona li kama jo e telo la meli sama lili li pana wawa e pilin ike. telo lukin li tawa anpa wawa lon poka sinpin ona. “sewi o pona tawa mi.” ona li kalama. “soweli pi ma kasi li moku e mi la mi tu li moli lon poka sama!”

“o pini e kalama ni.” meli suli li toki. “ale ni li pona ala a tawa sina.”

open pi tenpo suno la jan Kete li wile tawa selo li wile pana e poki suli telo lon sewi li wile seli e ona.

“tenpo nanpa wan la mi kepeken ilo seli.” meli suli li toki. “mi seli e ilo seli li pali e ko pan.” ona li pana wawa e jan Kete tawa ilo seli. linja seli li tawa wawa tan insa.

“o tawa insa.” meli pi wawa nasa li toki. “o pilin e seli ona. ona li seli pona anu seme? ona li pona la mi ken pana e pan lon insa.” jan Kete li tawa insa la meli li wile pini e ilo seli li wile moku kin e jan Kete.

taso jan Kete li sona e wile ona. ona li tawa ala insa. “sina nasa a.” meli suli li toki. “lupa li suli. o lukin. mi a ken tawa insa!” ona li tawa li pana e lawa ona lon insa. taso ona li tawa anpa li tawa insa pi ilo seli li kama moli tan seli.

wawa la jan Kete li tawa jan Kense li open e tomo lili ona li kalama. “jan Kense o, mi awen a! meli suli pi wawa nasa li moli!”

lupa li kama open la jan Kense li kama lon selo sama waso tan poki ona. ona li kalama pi pilin pona li sike luka e ona sama li tawa musi li uta e ona sama. ona li wile ala pilin ike tan meli wawa la ona li tawa tomo ona. poka ale la poki pi mani mute li lon.

“kiwen lili la ni li pona mute a!” jan Kense li toki li pana ale e ona lon poki len ona.

jan Kete li toki. “mi kin wile kama jo e ijo.” ona li pana ale e ijo lon len ona.

“taso tenpo ni la mi weka.” jan Kense li toki. “mi wile weka tan ma kasi pi meli wawa.”

ona li tawa lon tenpo la ona li kama lon poka pi telo suli. “mi ken ala tawa poka ante.” jan Kense li toki. “mi lukin ala e nasin pi sewi telo.”

“tomo telo ala kin li lon.” jan Kete li toki. “taso waso walo li tawa lon ni. mi toki tawa ona la ona li pana e mi tawa poka ante.” ona li kalama:

“waso lili o kute e mi. jan Kense en jan Kete li awen lon ni. nasin li lon ala ni la o jo e mi lon monsi walo sina.”

waso li kama tawa ona. jan Kense li kama anpa lon monsi ona li wile e ni: jan sama ona li kama anpa lon poka ona. “ala.” jan Kete li toki. “ni li suli mute tawa waso. ona li ken jo e mi wan lon tenpo tu.

waso pona lili li pali e ni. ona li awen pona lon poka ante la ona li tawa lili. ona li kama sona e poka ni pi ma kasi. ona li lukin e tomo pi mama ona lon weka. wawa la ona li tawa insa li tawa luka pi mama mije ona. jan lili li weka la mije li pilin pona ala a. meli a li moli.

jan Kete li weka ale e mani mute tan len ona. jan Kense li weka lili e ona tan poki len ona. ni la mani li kama mute. ike ale li pini. ona li awen lon pi pona ale.