Details
Edit on Github
Description: A translation of Rapunzel
Tags: translation prose story folklore
License: All Rights Reserved
Sources: jan-ne.github.io
Original: Rapunzel by Jacob Grimm, Wilhelm Grimm
meli Kapunse
meli Kapunse
tenpo pini wan la mije en meli li lon. ona li wile e jan lili lon tenpo suli. wile meli la sewi li pana e ona.
tomo pi jan ni la lupa lili li lon monsi. ni la jan li ken lukin e ma kasi pona. ona li jo e kasi kule pi pona lukin a e kasi moku lili. taso sinpin suli li lon selo ona. jan ala li wile tawa insa ona tan ni: meli pi wawa nasa li lawa e ona. ona li wawa mute. ma ale la ona li ike.
tenpo suno wan la meli li awen lon poka lupa li lukin anpa e ma kasi. ona li lukin e kasi moku pi pona mute. (nimi ona pi toki Tosi li Kapunse.) ona li pona lukin li laso. meli li wile suli e ona.
wile ona li kama suli lon tenpo suno ale. sona ona la ona li ken ala kama jo e ona. ni la ona li pilin ike. selo ona li kama walo jaki.
mije ona li pilin ike tan ni li toki tawa ona. “seme li kama e jaki sina?”
“a.” ona li toki. “mi ken ala kama jo e kasi pona pi ma kasi ni la mi kama moli.”
mije pi olin ona li toki insa: “mi wile ala e moli ona. mi o kama jo e kasi tawa ona.”
tenpo pi pimeja lili la ona li tawa lon sewi sinpin tawa ma kasi pi meli wawa li kama jo wawa e kasi pona li pana e ona tawa meli ona. meli li pali moku e ona li moku pi pilin pona mute e ona.
ona li pona mute a tawa meli. ni la meli li wile e mute suli a lon tenpo suno kama. ona li wile pilin pona la mije ona o tawa anpa sin tawa ma kasi. ni la ona li tawa anpa sin lon tenpo pimeja. taso ona li kama lon ma kasi la ona li pilin ike mute tan ni: meli pi wawa nasa li lon sinpin ona.
“ike tawa sina.” ona li toki pi pilin utala. “sina kama anpa tawa ma kasi mi li kama jo ike e kasi mi. sina o kama pakala tan ni!”
“a.” mije li toki. “o pona o utala ala! mi wile e ni. meli mi li lukin e kasi sina lon lupa li wile pi suli mute a. ona li kama moku ala e ona la ona li kama moli.”
meli pi wawa nasa li kama pilin utala ala. “ni li lon la sina ken jo e kasi ni. taso mi wile e ijo wan. sina o pana e jan lili pi meli sina. mi mama pona e ona.”
pilin ike ona la mije li ken e ni. meli li pana e meli lili la meli pi wawa nasa li kama a li nimi Kapunse e ona li jo weka e ona.
meli Kapunse li kama pona lukin mute a. ona li kama suli lili la meli pi wawa nasa li poki e ona lon tomo suli lon ma pi kasi suli. nasin pi kama sewi li lon ala. lupa lili taso li lon sewi. meli pi wawa nasa li wile kama lon insa la ona li awen lon anpa li kalama:
“meli Kapunse o anpa e linja lawa sina.”
meli Kapunse li jo e linja lawa suli pona sama kiwen mani jelo. ona li kute e kalama pi meli wawa la ona li pana e linja ona lon palisa lon sewi lupa. ni la linja lawa ona li tawa anpa mute. meli wawa li kama sewi kepeken ona.
sike suno li kama pini la mije lili pi jan lawa li tawa lon ma pi kasi suli li tawa lon poka pi tomo suli. ona li kute e kalama musi uta pona li awen kute. ni li tan meli Kapunse. ona li lon taso la ona li pana pona e kalama uta ona.
mije lili pi jan lawa li wile tawa ona lon sewi. taso ona li lukin ala e lupa lon anpa. ona li tawa tomo ona. taso kalama musi li pona mute tawa ona. ni la ona li tawa ma kasi lon tenpo suno ale li kute e ona.
ona li awen lon poka pi kasi suli la ona li lukin e meli pi wawa nasa li kute e toki ona:
“meli Kapunse o anpa e linja lawa sina.”
ni la meli Kapunse li anpa e linja lawa ona. meli wawa li tawa sewi tawa ona.
“ni li nasin pi kama sewi la mi o kepeken ona.” mije li toki.
tenpo pimeja kama la ona li tawa tomo suli li kalama:
“meli Kapunse o anpa e linja lawa sina.”
linja lawa li kama anpa. mije li tawa sewi.
open la meli Kapunse li pilin ike mute tan kama mije. tenpo ala la ona li lukin e ona. taso mije lili pi jan lawa li toki tawa ona sama jan pona. toki mije la pilin ona li kama pona a tan meli. ona li wile lukin e ona.
pilin ike pi meli Kapunse li weka. mije li wile mije ona. lukin la ona li pona. ni la ona li toki insa: “ona li olin pona e mi sama ala mama Kote.” ni la ona li wile kin.
ona li toki kin. “mi wile tawa lon poka sina. taso nasin seme la mi ken kama anpa? sina kama lon tenpo sin la o jo e linja. mi pali e supa pi kama anpa kepeken ona. ona li pini la mi ken kama anpa. sina ken weka e mi kepeken soweli tawa sina.”
toki ona la mije li kama lon tenpo pimeja ale tan ni: meli pi wawa nasa li kama lon tenpo suno. meli wawa li sona ala e ni. taso tenpo wan la meli Kapunse li toki tawa ona. “mama Kote o, tan seme la sina suli mute? sina la mije lili pi jan lawa li suli ala. ona
la mi wile ala e pali mute. tenpo kama la ona li lon ni.”
“a jan lili ike o!” meli wawa li kalama. “mi kute e seme tan sina? pilin mi la sina weka tan ma ale. taso ni li lon ala a!”
pilin utala ona la ona li jo wawa e linja lawa pi meli Kapunse li lili e ona kepeken ilo pi tu linja. linja lawa pona li awen lon anpa. ike mute ona la ona li pana e jan Kapunse tawa ma pi telo ala. ni la ona li awen li pilin ike.
taso tenpo suno ni la meli pi wawa nasa li pana e linja pi weka lawa lon palisa pi sewi lupa. mije pi jan lawa li kama li kalama:
“meli Kapunse o anpa e linja lawa sina.”
meli wawa li anpa e linja.
mije pi jan lawa li kama sewi. ona li lukin ala e meli olin Kapunse ona lon sewi. taso ona li lukin e meli pi wawa nasa. ona li lukin pi sinpin ike e ona.
“a a!” ona li kalama. “sina wile e meli sina. taso waso pona li lon ala tomo ona li kalama musi ala. soweli alasa li jo e ona li utala kin e sina. meli Kapunse li weka! tenpo kama ala la sina lukin e ona!”
mije pi jan lawa li pilin pi ike mute li kama anpa tan tomo. ona li moli ala. taso ona li kama anpa lon palisa kasi. palisa li utala e lukin ona. ona li tawa pi lukin ala lon ma kasi li moku taso e kili lili li pilin ike taso tan weka pi meli olin ona.
ni la ona li tawa pi pilin ike lon sike suno mute li kama lon ma pi telo ala lon poka pi meli Kapunse. ona li kute e kalama pi sona ona li tawa ona. ona li kama lon poka la meli Kapunse li sona e ona li pana e telo tan lukin. telo ona li telo e lukin mije li pona e lukin ona. ona li ken lukin sin.
ona tu li tawa ma lawa ona li awen pi pilin pona lon tenpo suli.