meli lili pi len lawa loje

tenpo pini wan la meli suwi lili li lon. jan ale li olin e ona. mama meli pi mama ona li olin mute e ona. ona li pana e ale tawa meli lili!

tenpo wan la ona li pana e len lawa loje pona. ona li pona mute tawa meli. ona li kepeken ona lon tenpo ale. ni la ona li meli lili pi len lawa loje.

tenpo suno wan la mama ona li toki tawa ona. “meli lili pi len lawa loje o kama. mi jo e pan suwi e poki pi telo kili nasa. o pana e ona tawa mama mama sina. ona li pilin jaki li wawa lili. ni li pona e ona. lete li awen la o tawa. o tawa pona pi kalama ala. o weka ala tan nasin. ante la sina ken pakala e poki. ni la mama mama li kama jo e ala! sina tawa tomo ona la o toki e ni tawa ona: ‘tenpo suno pona a!’”

“mi ken.” meli lili pi len lawa loje li toki tawa mama ona.

tomo pi mama mama li lon ma kasi lon weka pi ma tomo. meli lili pi len lawa loje li kama lon ma kasi la ona li lukin e soweli ike. meli lili li sona ala e ike soweli li pilin ike ala tan ona.

“meli lili pi len lawa loje o, tenpo suno pona.” ona li toki.

“soweli o, pona tawa sina.”

“meli lili o, sina tawa seme lon open a pi tenpo suno?”

“tawa tomo pi mama mama mi.”

“seme li lon poki sina?”

“pan suwi en telo kili nasa. tenpo suno pini la mi pali e moku pona tawa mama mama mi. ona li pona e jaki ona.”

“meli lili o, tomo pi mama mama sina li lon seme?”

“lon ma kasi. tomo ona li lon anpa pi kasi suli mute. kasi kili li lon anpa. sina o sona e ona.” meli lili pi len lawa loje li toki.

soweli ike li toki insa: “a sijelo ko pona. uta mi li jo pona e ona. meli suli li pona moku. taso meli lili ni li pona mute a. mi wile pali sona. ni la mi ken kama jo e ona tu.”

ona li tawa pi tenpo lili lon poka pi meli lili li toki: “meli lili pi len lawa loje o, kasi kule pona pi poka ni li pona lukin mute. o lukin e ona. o kute kin e kalama suwi pi waso lili. lukin la sina tawa pi pilin ike. taso ale pi ma kasi li pona a.”

meli lili pi len lawa loje li lukin sewi li lukin e suno tawa lon kasi suli e kasi kule lon poka ale li toki insa: “ken la mi pana e kulupu lili pi kasi kule tawa mama mama. ni li pona kin tawa ona. tenpo suno li awen sin. mi awen ken kama lon tenpo pona.

ni la ona li weka tan nasin tawa ma kasi li alasa e kasi kule. ona li lukin e kasi pona la ona li kama lukin e kasi ante pi pona mute li tawa ona. ni la ona li kama tawa insa a pi ma kasi.

tenpo sama la soweli ike li tawa tomo pi mama mama li kalama lon lupa.

“seme li lon?”

“meli lili pi len lawa loje.” soweli li toki. “ona li jo e pan suwi e telo kili nasa. o open e lupa.”

“sina ken open e ona.” mama mama li kalama. “mi wawa ala li ken ala kama sewi.”

soweli li open e lupa. kalama ala la ona li tawa supa lape ona li moku e mama mama. ona li kama jo e len ona e len lawa ona li kama anpa lon supa li len e supa.

meli lili pi len lawa loje li kama jo e kasi kule. ona li kama jo e mute suli la ona li awen sona e mama mama ona li tawa ona.

ona li lukin e lupa tomo open. ni li nasa tawa ona. ona li tawa insa tomo la ona li pilin nasa mute li toki tawa ona sama. “a! mi pilin nasa a lon tenpo suno ni. tenpo ante la mi pilin pona lon poka pi mama mama.”

ona li kalama. “tenpo suno pona a.” taso kalama ala li kama. ona li tawa supa li tawa e len sinpin. ni la mama mama ona li lon. len lawa ona li len mute e sinpin ona. ona li nasa lukin.

“a! mama mama o.” meli li toki. “kute sina li suli a!”

“ni la mi ken kute pona e sina, meli lili mi o.” ona li toki.

“taso mama mama o, lukin sina li suli a!” ona li toki.

“ni la mi ken lukin pona e sina, olin mi o.”

“taso mama mama o, luka sina li suli a!”

“ni la mi ken sike luka pona e sina”

“a! taso mama mama o, uta sina li suli ike a!”

“ni la mi ken moku pona e sina!” ona li toki e ni la ona li tawa wawa tan supa li moku ale e meli lili.

soweli li moku pona la ona li tawa supa lon tenpo sin li kama lape li kalama lape wawa. jan alasa li tawa lon poka tomo li toki insa. “meli suli li kalama wawa a! ona li pona ala pona?”

ni la ona li tawa tomo ona. ona li kama lon poka supa la ona li lukin e soweli lon ona. “soweli ike o, mi lukin e sina!” ona li toki. “tenpo suli la mi alasa e sina!”

ona li wile pakala e ona. taso ona li pilin e ni: soweli li moku e mama mama. ona li ken awen e ona. ni la ona li pakala ala e soweli. taso ona li kama jo e ilo li open e insa pi soweli lape.

ona li open lili e ona la ona li lukin e len lawa loje. ona li awen open e ona la meli lili li kama lon li pana e telo tan lukin. “a! mi pilin ike a! pimeja a li lon insa soweli!”

mama mama suli li kama lon kin. taso ona li ken ala moku pona e kon.

meli lili li tawa wawa li kama jo e kiwen suli li pana e ona lon insa soweli. lape ona li pini la ona li wile tawa weka. taso kiwen li suli mute. ni la ona li tawa anpa li kama moli.

ona mute li pilin pona. jan alasa li weka e selo soweli li jo e ona li tawa tomo ona. mama mama li moku e pan suwi e telo kili nasa li kama wawa sin.

taso meli lili pi len lawa loje li toki insa tawa ona sama. “lon ale mi la mi o weka ala tan nasin tawa ma kasi. mi kute e mama mi.”