lipu Nasino Sijokapi

lipu Nasino Sijokapi:

toki pi lipu “National Geographic” lon toki pona

(nanpa pini ala)

tan jan Lakuse

toki open

o kama pona. mi sona ala e nasin pi kama sina, taso tenpo ni la, sina lon lipu mi. a! lipu ni li seme? mi pana e sona ni tawa sina.

pali ni li open lon sike 2020. mi open e kama sona mi pi toki pona, la mi wile e pali pi toki pona tawa pona pi toki pona mi. ni la, mi open e lipu sin lon ilo Insaka. mi nimi “@tokipona.natgeo” e ona. mi ante tawa toki pona e toki tan lipu @natgeo, li pana sin e ona lon lipu mi. ike la ilo Insaka li pakala weka e pali ale mi. taso mi awen e pali lon ilo ante.

lipu Nasino Sijokapi: toki pi lipu “National Geographic” lon toki pona la, mi kulupu e pali mi tan lipu @tokipona.natgeo, li pona e ona, li pana sin e ona lon lipu suli wan.

taso, mi o toki e ni: mi kepeken toki pi kulupu Nasino Sijokapi tan seme?

kin la, lon ale mi la kulupu ni li lon poka mi. mi jan lili la, mi tawa mama pi mama mi lon tenpo mute. tomo telo ona la, lipu Nasino Sijokapi li awen lon. jan lili la mi ken ala sona e sitelen nimi, taso mi awen kepeken lipu ni lon musi mi. sitelen ona li awen pona lukin. lipu li pona tawa mama mi kin. kepeken lipu ni la, mi en mama mi li ken sama pona.

ante la, pali pi kulupu Nasino Sijokapi li pona. jan pali lon kulupu li lukin e ijo suli mute, li lipu e ijo suli mute. pali li tan ala jan wan taso. jan mute pi nasin ante li pali lon kulupu. jan ante mute ni li lukin e ijo ante mute. ni la, pali pi kulupu Nasino Sijokapi li lukin e ijo mute tan ma ale, kepeken nasin mute. open pi pali mi la, mi wile sona e ni: toki pona li ken ala ken toki e ijo ante mute ni? wile sona mi la, mi kepeken lipu lon poka mi. mi kepeken lipu pi kulupu Nasino Sijokapi.

wile nanpa wan pi lipu ni mi la, jan o sona e ni: ken pi toki pona li suli. toki pona li ken toki pona e ijo ante mute. jan o toki pona.

- jan Lakuse

sitelen li tan jan @paulnicklen l ale li pona tawa mi tan ni: kepeken pali musi mi la, mi ken ante e pali jan tawa pona. jan ale pi pali musi li wile e ni: musi ona li kama tan pi pali pona. jan wan taso li tan e musi la, ni li ken pona a. ni la, mi pilin nasa pona tan ni: kulupu Pearl Jam pi kalama musi li pali e lipu kalama sin la pali sitelen mi pi nimi “Ice Waterfall” li lon sinpin pi lipu ona. tenpo mute la, kulupu Pearl Jam li pali ala e kalama musi. ona li open sin e pali la lukin mute jan li tawa sitelen pali mi. tenpo pi pali mi lon poka kulupu li tenpo pona. mi sona e ni: jan li ken pali e ijo wawa kepeken wawa musi.
*
kepeken pali mi la jan o pilin wan tawa ma pi jan ala. o tawa lipu mi @PaulNicklen la mi pali lon sike suno mute tawa sitelen pi ma telo en toki ante mi.
*
#inspire #art #nature #tokipona #natgeo #tokiponanatgeo

sitelen li tan jan @enricsala l ijo sitelen li lon ma lili wan San Benedicto, li lon kulupu Revillagigedo pi ma lili, li lon ma Mexico. mi alasa lon poka pi kulupu @natgeopristinseas la, alasa sona li suli, taso ijo ante kin li suli. ni li lon, a : mi wile alasa sona e sona kala e sona pi wan ma. kin la, mi wile e ni: jan lawa pi ma suli li kama olin e telo suli ona. taso, tawa olin jan la nimi taso li ken ala. tenpo mute la mi open e tomo telo mi tawa kama pi jan lawa ni. ona li ken ala kama la, mi mute li lon poka telo e jan lawa kepeken sitelen en sitelen tawa. olin pi jan lawa tawa telo suli li suli tan ni: jan li olin e ijo la, jan li awen e ijo.
*
#SanBenedictoIslands #conservation #ocean #tokipona #natgeo #tokiponanatgeo

sitelen li tan jan @beverlyjoubert l jan li pali e ma suli. ma tomo ni li kama pakala li kama weka. taso kasi suli ni li awen. jan en soweli la kasi ni li pana e ijo mute. ona li moku, li tomo, li ilo moku pi weka ike. ona li supa. taso tenpo ni la, ike li tawa kasi ni pi tenpo mute. kasi pi tenpo mute li moli. ken suli la, moli li tan ni: nanpa wan la, seli li kama suli. nanpa tu la, sewi li pana e telo kepeken nasin ante. nanpa tu wan la, tenpo pi telo ala li kama suli tan ante seli. tawa kasi ni la, ma pona li kama lili. o sona e ike ni: kasi suli ni li lon ma lon tenpo ale, taso tan lon tenpo lili pi pali jan la kasi suli ni li kama weka.
*
#baobabs #trees #climatechange #tokipona #natgeo #tokiponanatgeo

sitelen li tan jan Luján Agusti @lujanag l jan lon ma tomo Ushuaia (lon ma Argentina) li kama jo tan esun e ijo pona. lawa pi ma tomo la jan li wile awen weka tan jan ante. ma tomo Ushaia li ma lili lon telo suli la, moku li tawa ma lili Ushaia tan ma suli mama. ni la, tomo esun suli taso li ken kama jo e moku. lawa pi lon weka li open la, lawa li lawa mute e tawa jan. ma tomo li pana e nanpa wan tawa jan. nanpa ni li toki e ni: lon tenpo suno ni taso pi tenpo esun la sina ken weka tan tomo sina tawa esun. tenpo open la, jan li ken tawa esun, la ona li esun e ale tan ni: pilin ike ona la, mute pi ijo esun li kama lili.
*
#Covid19 #LatinAmerica #TierraDelFuego #quarantine #tokipona #natgeo #tokiponanatgeo

sitelen li tan jan @nicholesobecki l tenpo pini la, jan Rahma Hassan Mahmoud lon ma Somali li jan pi nasin soweli, li meli mani. ona li lawa e soweli pi mute pi suli mute. taso, sewi li pini pana e telo. tan weka telo la, kasi li kama moli. ni la, soweli ona li open moli. soweli ale ona li moli la, kulupu ona li pana e mani li kama jo e tomo tawa suli. jan Rahma li tawa kepeken tomo ni e kulupu mama ona e jan lili mute ona. ona li tawa ma pi jan weka lon selo pi ma Burco. tenpo ni, ale li nasa tawa ona, taso ale li poki kin e ona. sina wile kama sona mute e jan Rahma e jan meli ante pi ma Somali, sina ken tawa lipu @aurora_alm en sitelen mi lon lipu @natgeo.
*
#Somali #pastoral #displaced #tokipona #natgeo #tokiponanatgeo

sitelen li tan jan @tamaramerino_photography l ma tomo Bahia, lon ma Brazil la jan sama lili li musi lon tomo ona. poka ona la kiwen sewi pi jan sewi Yemayá li lon. jan sewi ni li meli li telo. jan pi nasin sewi Candomblé li sewi e ona. tenpo mute la jan Yemayá en meli sewi Mary li sama tawa jan. ni li nasa ala. tenpo pini la, jan ike li mani e jan pimeja li esun e ona tawa jan pi mute weka. tenpo mute la, ijo pi nasin pimeja en ijo pi nasin walo li kama sama lon tenpo ike ni. nasin sewi Candomblé li tan nasin ante mute pi ma Africa. tenpo ni la, nasin sewi Candomblé li suli lon ma Brazil.
*
#yemanya #religion #candomble #tokipona #natgeo #tokiponanatgeo

sitelen li tan jan @renaeendiphoto l pali pi jan Metin la, ona li telo e jan lon tomo Çemberlitaş Hamam. mama ona en mama mama ona li pali sama ona. tenpo pi jaki ala la, jan Metin li lape lon tenpo suno wan pi tenpo esun li pali lon suno ante ale. taso tenpo ni la, jan Metin li pali ala tan ni: lawa li pini e tomo pali ona. jan Metin li toki e ni: “ni li nasin pi pali mi: jan li supa lon supa kiwen seli. supa li seli e sijelo ona la sijelo li pana e telo lili. tenpo lili li pini la, mi weka tan sijelo ona e jaki kepeken tawa wawa pi luka mi. ni li pini la, mi pana e telo tawa ona. kepeken sike kon pi selo telo, la mi pana e pilin pona tawa sijelo ona. jan ale la sike li pona a!” jan Metin li ilo e sike kon kepeken nasin seme? ona li kepeken poki ona pi len suwi. jan Metin li telo e poki li ko pona pi weka jaki e poki. ona li tawa wawa e poki ni tawa poka tu. tawa ni li pana e kon tawa poki, la poki li pali e sike kon pi selo telo, li len e jan kepeken sike ni. tawa pali ona, jan Metin li toki e ni: “jan li pilin pona tan pali mi la, wawa pi pilin pona li tawa mi. kin la, jan pi pilin ike li kama tawa tomo telo la, mi wile pali tawa wile ona. wile pi jan kama li awen suli.”
*
tenpo mute la, tomo Çemberlitaş Hamam li awen open. taso ona li pini tan jaki sijelo suli. pini ona li nasa a. jan pali mute li weka tan ma tomo Istanbul tawa ma pi kulupu mama ona. jan Metin taso li awen li weka ala. tenpo pini la, jan pali sama ona li telo e sijelo pi jan Metin. tenpo pi sike suno mute la ni li nasin pi jan pali ni. taso, tenpo jaki la, jan Metin li kama tawa tomo telo pi jan ala. jan ante wan taso li lon li awen e tomo. jan Metin li kama tawa tomo telo la, ona li toki tawa jan ni pi awen tomo li lukin e tomo pi jan ala, li toki insa. ona li toki tawa mi e ni: “mi lukin e tomo li pali ala lon ona la, mi ken pilin pi pona lili, taso pona lili kin li pona. jan sama mi li awen lon pilin mi. pilin mi li pilin ike, taso mi kama tama tomo telo la, ike lili li weka tan pilin ike mi.
*
o tawa @renaeendiphoto la sina ken lukin e toki jan ante.
*
#Covid-19 #lockdown #Istanbul #Turkey #Hamam @tokipona #natgeo #tokiponanatgeo

sitelen li tan jan Michael Yamashite @yamashitaphoto jan utala pi tenpo pini li lon tenpo ni: jan lon sitelen li weka utala e seli pi pakala tomo. ona li tan ma tomo Kyoto, lon ma Japan. len ilo ona li tan kulupu Nomex. len ni la, len utala pi jan utala lon tenpo pini Edo li sama mute lukin. (sitelen nanpa tu la jan li utala musi kepeken nasin pi tenpo pini). ni li lon: jan utala pi tenpo pini li moli e jan e seli kin. sitelen ni li tan pali pi tenpo pini mi. nimi pali li “nasin pi jan utala lon ma Nijon.”
*
#firemen #firefighter #Japan #samurai #tokipona #natgeo #tokiponanatgeo

sitelen li tan jan @andreabruce l jan Soledad Chapteon Tancara li kama jan lawa pi ma tomo El Alto, lon ma Bolivia. ma tomo El Alto la, ona li jan lawa meli nanpa wan. ni la, ona li kama jan lawa la, jan li pana e lipu jaki e lipu pi kama moli tawa ona. jan li seli e tomo pali ona. seli ni li moli e jan mute. jan lawa pi tenpo pini li kepeken e mani tawa wawa lawa ona la jan Chapeton li lukin weka e ike ni. ona li toki e ni: “mi pona tan ni: mute mani li lili la mi awen pali e ijo mute pona.” lon sitelen ni la, jan pona mute ona li lon poka ona. kasi kule en kili kule li len e ona. tenpo suno ni li suli e ona.
*
pali mi la, mi sitelen kepeken ilo e meli wawa lon ma Bolivia, en ma New Zealand, en ma Iraq, en ma Afganistan. meli ni li kama jan lawa wawa, taso nasin en jan li awen utala e ona. nimi pi pali mi ni li “Taking the Lead.” sitelen toki lon pali ni li tan jan Rania Abouzeid. o tawa lipu mi @andreabruce la sina lukin e sitelen e toki ante.
*
#Bolivia #women #feminism #tokipona #natgeo #tokiponanatgeo

sitelen li tan jan @chien_chi_chang l sitelen li tan tenpo pini. ma lili pi jan tan ma China li lon ma tomo New York. jan lon sitelen ni li kama tawa ma America tan ma tomo Fuzhou, lon ma China. lon tenpo musi ona la, ona li awen lon tomo lili ona li moku, li lape, li lukin lon pilin taso ona e mani, e ma mama ona. kama la jan ni li kepeken ala nasin lawa. lawa ala la, ona li ken ala kama tawa ma mama ona.
*
jan lon ma mama ona li pini kama sona, li kama wan olin, li moli la, jan lon ma mama ona li pana e sitelen tawa ona. pilin weka li ken kama lili tan sitelen ni. taso mute weka li awen. tenpo pi wan olin, en tenpo suli pi jan lili, en tenpo moli jan, li tenpo ala li kipisi taso. nasin pi kulupu mama li kipisi.
*
#withoutpapers #immigration #distancing #tokipona #natgeo #tokiponanatgeo

sitelen li tan jan @andreabruce l lipu suli pi utala sona li pini, la tenpo sike pi tomo sona li pini kin lon tomo sona Zarghona High School, lon ma tomo Kabul. tomo sona meli pi ma Afghanistan la tomo sona meli Zarghona li suli. jan mute pi pana sona pi kama sona li lon ona. jan lawa pi tomo sona li jan Nasreen Noozai. “mi mute li pilin monsuta” la ona li toki. ona li pilin monsuta tan ni: ken la, kulupu Taliban li kama wawa lawa sin li pini e pana sona tawa meli.
*
pali mi la, mi sitelen kepeken ilo e meli wawa lon ma Bolivia, en ma New Zealand, en ma Iraq, en ma Afganistan. meli ni li kama jan lawa wawa, taso nasin en jan li awen utala e ona. nimi pi pali mi ni li “Taking the Lead.” sitelen toki lon pali ni li tan jan Rania Abouzeid. o tawa lipu mi @andreabruce la sina lukin e sitelen e toki ante.
*
#girlseducation #feminism #Taliban #women #tokipona #natgeo #tokiponanatgeo

sitelen li tan jan @amivitale l jan lili li lon poka ale seli, li kute e kalama musi pi jan suli li lukin e tawa musi pi jan suli. ona li lon ma tomo lili Gouwa. ma Gouwa li lon poka pi ma tomo suli N’Djamena, lon ma Chad. jan ala li lukin e sitelen tawa kepeken ilo. ilo linja wawa ala li pana e wawa tawa ilo. ma pi ilo linja wawa ala la, musi toki, en tawa musi, en nasin tan tenpo mute li suli tawa kulupu jan Mbororo. kulupu ni li awen ala lon ma wan taso. kulupu jan li tawa lon poka pi soweli ona la, nasin pi telo tan sewi li pali e nasin pi tawa kulupu. kulupu mama pi jan lili pi jan suli li tawa lon poka sama. ona li tawa kepeken noka en soweli. tawa ona li awen.
*
mi lon ma Chad tan kulupu @rippleeectimages, tan ni: mi lipu e pali pi jan Hindou Oumarou Ibrahim. jan Ibrahim li jan pi kulupu Mbororo. seli en lete lon ma ale li kama nasa tan jan. ni la, jan Ibrahim li kepeken e sona pi kulupu ona tawa pona pi ma ale en pona pi kulupu ona. tenpo mute la, kulupu ona li kama sona e sona suli li sona e nasin sona pi pali sewi. o tawa lipu mi @amivitale en lipu @rippleeectimages la toki ante pi seli nasa ma li lon.
*
#climatechange #globalwarming #indigenous #Mbororo #Chad #tokipona #natgeo #tokiponanatgeo

sitelen li tan jan @katieorlinsky | o lukin e telo Crater lon ma lili Katmai. ona li lon ma Alaska. sina wile lukin e sitelen ante pi telo Crater lon tenpo ni en tenpo pini mute, la o tawa linja nasin lon lipu mi. ma lili Katmai li poki e nena seli Novarupta. nena seli ni li kama e seli mute. pakala seli li weka tan tomo e kulupu Alutiiq li pakala e ma mute e ma suli Ten Thousand Smokes (o lukin e ma ni lon sitelen nanpa tu en nanpa tu wan). tenpo seli pi sike pini tu la mi lon kulupu alasa pi kulupu National Geographic. kulupu alasa la jan pi sona pini en jan pi sona seli en jan pali pi ma kasi li lon. kulupu alasa mi li tawa sama kulupu alasa pi tenpo pini mute. kulupu alasa pi tenpo pini li kama sona e sona suli. sona ni li suli kin tawa kulupu pi awen ma pi tenpo pini en jan lawa Theodore Roosevelt. jan lawa ni li pali e kiwen suli Katmai tan sona. kiwen suli li open e pali tawa ma lili Katmai.
*
sina wile kute e toki mute, la o tawa linja nasin pi lipu @natgeo.
*
#katmainationalpark #tokipona #natgeo #tokiponanatgeo

sitelen li tan jan @gerdludwig | tenpo sike ni la, kama pi kasi kule lon ma Southern California li pona mute. kasi kule li len kule e nena lon open pi tenpo mun ni.
*
nasin mi pi tenpo sike la mi tawa lukin e kasi kule ni. tenpo sike ni la, kama telo li kepeken tenpo mute. ma li awen tan ona. telo li kama la, kasi kule ale li kama open kepeken tenpo lili. ma ni Antelope Valley li open ala tawa jan la, kasi li kama open kin. sina wile la, o tawa @gerdludwig
*
#California #superbloom #poppies #AntelopeValley #tokpona #natgeo #tokiponanatgeo

sitelen li tan jan @babaktafreshi | insa ale li lon sewi pi kasi pakala ni. ona li lon ma Australia. pali pi sitelen ni la, suno li kama lon ilo tenpo lili. lon selo sewi la, kon li suno jelo tan suno pi ma tomo.
*
kasi suli pakala li namako tawa mi. kasi suli li ken kama pakala kepeken nasin mute. kon wawa anu tenpo wan pi telo wawa li ken pakala. ante la, kasi li ken suli tawa suno pi pali jan li kama pakala. ken la, jan li pakala e kasi. kulupu Indigenous pi ma America la, kasi pakala li nasin. kasi li lili la, jan li pakala e ona. kasi ni li kama suli la, jan li ken lukin e kasi pakala nasa li sona tawa nasin. o lukin e ma lon pimeja lon poka pi mi @babaktafreshi.
*
#trees #australia #tokipona #natgeo #tokiponanatgeo

sitelen li tan jan David Guttenfelder @dguttenfelder | utala li lon ma tomo Minneapolis. jan wile li toki utala lon poka pi tomo pali pi jan lawa Derek Chauvin li seli e tomo pali ni e tomo tawa e tomo ante. utala tan moli pi jan George Floyed li awen kama suli. tenpo pimeja ni la, jan lawa pi ma tomo li open e pali pi jan utala. ma lon poka pi tomo pali seli la jan ala li ken kama tawa ona li ken weka tan ona. jan lawa la, jan li wile awen lon tomo ona lon tenpo pimeja.
*
#May282020 #GeorgeFloyd #Minneapolis #natgeo #tokipona #tokiponanatgeo

sitelen li tan jan @nicholesobecki | tenpo pi jaki ala la, jan pi mute lili li sona e pilin wan. tenpo jaki la, jan ale li sona e pilin wan tan nasin weka, li pilin ante tawa ona. ken la, jan li pilin pona tawa ona. ken la, jan li pilin poki tan ona.
*
mi la, pilin wan pi tenpo ni li sama pilin wan pi tawa nena. sitelen ni li tan tenpo ni: mi tawa ma lili Everest Base Camp li lukin e nena Himalaya. mi lon ma Nepal la, ma ante ale li weka kin tawa mi. tenpo ni en tenpo jaki la, jan pi awen wan li lon toki insa mi. jan mun li jan pi awen wan. jan anpa mute lon tomo poki lawa li jan pi awen wan tan wawa lawa. jan pi alasa sona lon ma Antarctica li jan pi awen wan. jan tawa pi nena suli li jan pi awen wan kin. sina wile lukin e pali ante mi, la o tawa @nicholesobecki.
*
#socialisolation #mountainclimbing #COVID19 #tokipona #natgeo #tokiponanatgeo

sitelen li tan jan @williamodaniels | ma ni li poki e kiwen wawa pimeja. ona li lon ma tomo Novavya Chari lon ma Russia. ken kiwen pi ma tomo ni li suli. taso jan mute li awen weka tan ma. weka jan li tu e kulupu pi ma tomo. jan sona li pilin e ni: ma ale la, mani kiwen pi ma ni li suli mute. kiwen mute pi mute lili li lon ma ni. taso la, ma li wan. mute weka ona tan kulupu ante li suli. ni la, pali kiwen li kepeken pali en wawa mute. o tawa lipu @williamodaniels mi la sina kute e toki ante pi ma ale.
*
#NovavyaChara #vanadium #mining #tokipona #natgeo #tokiponanatgeo

sitelen li tan jan @jasperdoest | kulupu mama mi li moku e moku kala tan esun la waso Ollie li kama lon monsi pi jan lili mi. kulupu li moku pona tan ni: mi en jan olin mi li kama wan lon tenpo pini la mi awen e wan mi kepeken nasin sike. sitelen ni la, mi kute e tawa pi waso Ollie la mi alasa e ilo sitelen mi kepeken tenpo lili li kama jo e sitelen. tenpo jaki la, waso tu li pali e ma mama ona lon tomo nena mi li kama lon tomo mi. jan lili mi li pana e nimi Ollie e nimi Dollie tawa waso. o tawa @jasperdoest la sina ken lukin e sitelen ante.
#urbanwildlife #pidgeons #Covid-19 #tokipona #natgeo #tokiponanatgeo

sitelen li tan jan @dina_litovsky | toki suli tan jan George Floyd li awen lon ma tomo New York. jan pi mute suli li tawa noka lon nasin en ma en nasin pi sewi telo lon ma tomo ale. tenpo suno pini la, jan pi wile suli li tawa noka lon nasin pi sewi telo Brooklyn li jo e lipu sitelen li kalama utala tawa ike pi jan lawa. o tawa mi lon @dina_litovsky la sitelen ante li lon.
*
#GeorgeFloyd #NewYorkCity #tokipona #natgeo #tokiponanatgeo

sitelen li tan jan @juanarre | jan mute li tawa nasin pi ma tomo Brooklyn tan ni: ona li utala e ike tan wawa walo. ona li suno e ilo suno lili li awen e tenpo lili pi kalama ala tan moli pi jan George Floyd. jan Floyd li moli tan jan lawa lon ma tomo Minneapolis.
*
#vigil #GeorgeFloyd #Brooklyn #tokipona #natgeo #tokiponanatgeo

sitelen li tan jan @dguttenfelder | jan George Floyd li moli la, jan mute li utala lon ma ale la, kulupu mama ona en jan pi pilin ike li kama tawa tomo sewi pi tomo sona suli North Central lon ma tomo Minneapolis. jan ni pi sona moli li awen e lon pi jan Floyd kepeken toki. jan Al Sharpton pi sona sewi li pana e toki suli ni: “tenpo pini pi jan Floyd li tenpo nasa ala tawa ma America. tenpo ni li lon tenpo suno ale. ona li lon tomo sona en tomo sijelo. ona li lon tomo ale en tenpo ale. tenpo ni la, jan ale o sewi e nimi pi jan George o toki e ni: o weka e noka sina tan lawa mi.”
*
#GeorgeFloyd #tokipona #natgeo #tokiponanatgeo

sitelen li tan jan @ruddyroye | sitelen ni la, jan meli Lan li len e uta ona kepeken len walo li lon monsi jan. jan Lan en jan pona ona li awen tan ni: jan pi toki suli ante li awen kama tawa ma kasi Washington Square lon ma tomo New York. ona ale li pali tan moli pi George Floyd. “sina wile e seme lon pini utala” la mi toki tawa jan Lan. ona li toki e ni: “wile mi la, jan lili mi en jan ale pi tenpo kama li kama sona e ike tan wawa walo li pilin e ni: ni li ken ala lon. tenpo pini la, jan pimeja li sama ijo tawa ma ni. tenpo ni la, mi pilin e ni tawa tenpo pini: ni li ken ala lon. nasin pi tenpo pini li nasa ike mute tawa mi. wile mi la, jan pi tenpo kama li ni e tenpo pi mi mute.”
*
#GeorgeFloyd #tokipona #natgeo #tokiponanatgeo

sitelen li tan jan David Guttenfelder | jan Datelle Straub en jan Avery Lewis en jan Titan Harness-Reed li kama tawa tenpo utala lon ma tomo Minneapolis li len kepeken len pi sona suli tan ni: ona li pini e tomo sona. tan tenpo pi jaki sijelo la, nasin pi kama suli o lon kon. jan Straub li toki e ni: “jan li pini e kama sona ona la, nasin pi tomo sona la ona li tawa lon supa noka sewi li kama jo e lipu suli. tenpo pi jaki sijelo la, ni li ken ala lon. ni la, mi len kepeken len pi sona suli e mi. len la, mi toki tawa kulupu e ni: mi jan pimeja li jan ken. nasin pi ma tomo li supa noka sewi pi nasin suli mi la mi en jan pona mi li toki wile li tawa noka.” jan lawa utala li kama tawa ona la, jan Straub li sewi e lipu suli ona. “mi tawa noka la, jan lawa utala li weka tan tomo tawa li lukin pi ilo moli e mi, li suno e sinpin mi kepeken sike lili loje. ona li moli e tenpo kama la ni li ike ala tawa ona. ni li ike tawa mi.”
*
#GeorgeFloyd #Minneapolis #protests #graduation #ClassOf2020 #tokipona #natgeo #tokiponanatgeo

sitelen li tan jan @katieorlinsky | jan olin tu li luka lon tenpo utala pi toki wile lon ma tomo Brooklyn. ma America ale la, jan li tawa nasin tan ni: ona li utala tan moli pi jan George Floyd. jan Floyd li moli la ona li lon poka pi jan lawa utala lon ma tomo Minneapolis. ante la, jan pi tawa nasin li wile awen e sona ni: jan meli mute en jan mije mute li moli sama ona.
*
#Brooklyn #GeorgeFloyd #protests #tokipona #natgeo #tokiponanatgeo

sitelen li tan jan Nate Palmer @langstonpalmer | jan Shel Evans, tan ma tomo Miami li jan pi kama sona lon tomo sona suli Howard. ona li jo tawa tenpo utala e jan lili ona Christin Jackson tan ni: toki ona la “wile mi la, jan lili mi li ken lukin e tenpo ni. tenpo ni li suli.”
*
tenpo suno ni la, jan mute li kama lon tomo lawa suli pi ma America tan ni: jan George Floyd pi ma tomo Minneapolis la, ona li wile utala e ike pi jan lawa utala. moli suli li kama e utala lon ma suli en ma ale.
*
#GeorgeFloyd #WhiteHouse #tokipona #natgeo #tokiponanatgeo

sitelen li tan jan @ruddyroye | jan Julius li tan ma Fort Greene lon ma tomo Brooklyn, li lukin e tenpo utala tan jan George Floyd. ma mama ona li ma tomo Attalapulus lon ma Georgia. ona li toki e pilin ona pi tenpo ni, la ona li toki e ni: “ona li moli e mi mute. tenpo ale li ona li awen moli e mi mute. pali ona la ona li lon e tenpo pini ni: jan pimeja li ilo soweli tawa jan walo. sona mi la, moli pi jan suli [Eric Gardner] li awen. ona li jan pona mi. jan lawa utala li ike a! ona li lukin pakala e kon pi jan pimeja. ni li sama sitelen tawa Roots.”
*
#GeorgeFloyd #EricGardner #protests #tokipona #natgeo #tokiponanatgeo