untitled

tenpo mute la, mi kute e kalama telo lon poka mi.

telo sewi li kama lon ale pi tenpo suno ni. lon ale pi tenpo suno pini mute, kin. lon tenpo pimeja mute kin. mi ken ala sitelen insa e tenpo pi telo sewi ala, e tenpo pi suno taso.
kasi li kama suli lon poka pi tomo mi. leko wan anu leko tu pi tomo ni li pakala. kasi taso li lon poki ona lon tenpo ni.

mi sona e tenpo wan. ona la, suno li kama lon sewi. sewi li kama laso unu. lupa li kama lon kon walo sewi. taso kon ni li weka ala, li pana e telo, e telo, e telo mute, lon tenpo mute.
tenpo pi ijo ni li lete lili. mi ken sitelen e pilin pona pi mi ale, e pilin ni: ijo li kama pona. telo li weka lon tenpo poka. mi ale li kama lon suno, li toki, li jo e jan ante, li tawa musi li kalama musi lon suno, e pona mi pi tenpo pona. “tenpo kama li sama tenpo pini”. ni li pilin mi lon tenpo ni.

taso,
ni li kama ala.

tenpo lili la, suno li weka sin. jan ale li tawa tomo ona, li poki e kili lili lon poka ona, tawa awen lon pi tenpo kama. tomo mi li pilin ike li poki wawa e mi. mi wile e kule pi tenpo suno. kule ala li lon.
mi mute li pilin ike li pilin weka. tawa mi la, tawa ale kin la, monsuta taso li ken lon.

mi ken ala pana tawa sina e pini pi pona ale. ijo li kama ala sama tenpo pini. lon la, ona li ken ala ni. taso, mi ale li awen.
jan li pana e sona e pali tawa jan ante. kasi suli li kama moku pona lon pali jan. sina sona ala sona e jan lili pi kulupu tomo poka? ona li pali e nasin pi telo ala lon anpa ma lon tomo ale pi mi mute. musi en olin li kama sin.
tenpo mute la, mi awen kute e kalama pi telo sewi lon sewi tomo. mi ken pilin ike kin. taso, mi ken tawa tomo pi jan ante li ken toki. ona li ken jo e mi li ken pona e pilin mi.

mi lon. ni li pona. ni li ale.