jan lawa pi tomo tawa linja

ma tomo lili pi ma weka la nasin kiwen pi tomo tawa linja li lon. nasin kiwen la linja kiwen tu li lon. lawa pi nasin kiwen la tomo tawa linja li tawa.

ma tomo lili ni la nasin kiwen mute li lon. jan lawa li lawa e tomo tawa linja ale. tomo lawa la ona li lukin e nasin kiwen ale e tomo tawa linja ale. ona li lawa e tomo tawa linja ale kepeken ilo palisa.

jan lawa li pali lon tenpo suli. kulupu pi tomo tawa linja li lon ma tomo suli. jan lawa li toki e ni tawa kulupu: “mi pali mute tawa kulupu pi tomo tawa linja. tan ni la o sewi e mi lon insa kulupu.” ni la jan li kama tan kulupu tawa ma tomo lili li toki tawa jan lawa.

jan kulupu li toki e ni: “sina ken sewi lon insa kulupu. taso nanpa wan la mi wile sona e ni: sina jan lawa pona anu seme? mi toki e wile sona tawa sina. sina toki pona tawa wile sona mi la mi toki e ni: sina jan lawa pona.” jan lawa li toki e ni: “pona. o toki e wile sona sina.”

jan kulupu li toki e ni: “o lukin e ni lon insa pi lawa sina: tomo tawa linja tu li lon. tomo tawa linja nanpa wan li kama tan ma weka, tomo tawa nanpa tu li kama tan ma weka ante. taso ona tu li kama lon nasin kiwen sama li kama wawa a! sina pali ala la tomo tawa linja tu ni li kama lon sama li pakala suli! ni la sina pali e seme?”

jan lawa li toki e ni: “mi luka e palisa lon tomo lawa. ni la lipu toki li open lon poka pi nasin kiwen. lipu toki li toki e ni: o tawa ala. tomo tawa tu la jan li lukin e lipu toki ni. ona tu li pini e tawa pi tomo tawa ona.”

jan kulupu li toki e ni: “taso ken la palisa li pakala. sina ken ala open e lipu toki pi tawa ala. ni la sina pali e seme?” jan lawa li toki e ni: “ni la mi tawa poka nasin kepeken tenpo lili. ilo pi ante nasin li lon poka nasin. mi kepeken ilo ni la nasin li pana e tomo tawa nanpa wan tawa nasin ante. ni la tomo tawa tu li pakala ala.”

“taso tenpo pini la wawa walo pi kulupu telo sewi li pakala e ilo ni. sina ken ala ante e nasin pi tomo tawa. ni la sina pali e seme?”

“ni la mi kama sin lon tomo lawa mi. mi luka e palisa pi tenpo ike suli. ni la lipu toki pi tenpo ike suli li open lon nasin ale. tomo tawa ale li pini e tawa ona.” “taso tomo lawa sina la seli suli li lon! sina ken ala tawa insa ona! ni la sina pali e seme?”

“mi alasa e jan pona mi lon ma tomo. mi toki e ni tawa ona: ‘o kama!’”

“sina alasa e jan pona sina tan seme?”

“jan pona mi li lukin e pakala suli pi tomo tawa la ona li musi mute! a a a!”