kalama insa pi toki ike li tan seme?

jan ale li ken pilin ike. jan li pali e ike tawa jan ante la open la ona li pilin e ni: “mi jan ike.” taso jan mute li awen ala lon pilin ni. ona li pona e pali ike ona li pona e pilin pi jan ante la ona li pilin pona.

jan li sama ni la ni li pona. taso ken la jan li jo e kalama insa pi toki ike. kalama insa li ken toki sama ni tawa jan: “sina ken ala pali pona” anu “pali ike sina pi tenpo pini li weka ala” anu “sina suli ala sama jan ante, sina sama ko jaki.”

tenpo ale la jan li sona e ni: kalama insa ni li pilin taso, kalama ni li lon ala. jan li jo e kalama insa sama ni la ona li nasa ala. taso ona li ken pilin ike lon tenpo ale.

jan li jo e kalama insa ike la ken la ona li toki insa e ni: “mi wile utala e ona.” ni la jan li toki e ni tawa kalama: “o pini e toki sina!” anu “toki sina li lon ala! tan seme? mi pana e sona ni tawa sina, o kute e mi.” taso kalama li ante ala li weka ala. jan sona mute li toki e ni: “o sona e ni: kalama insa sina pi toki ike li lukin pana e pona tawa sina. ona li lukin awen e sina.”

ken la toki ni li nasa tawa sina. kalama insa jan li lukin pana e pona tawa ona la ona li wile kepeken toki pona anu seme?

mi lukin pana e sona ni tawa sina. o lukin e jan lili sama ni lon insa pi lawa sina:

jan lili li pali e ijo. jan lili la pali ona li ike ala. taso jan mama ona li pilin e ni: pali ona li ike mute. jan mama li kalama wawa tawa jan lili li luka wawa e sijelo ona. mama li pali sama ni lon tenpo mute.

jan lili li toki insa e ni: “pali mi li pona tawa mi, taso ken la ona li ike tawa mama mi. mi ken pona e pali mi tawa mama mi kepeken nasin seme? mama mi li lon ala la mi o toki e ni: mama mi li lon poka mi la ona li pali e seme? ona li ken kalama wawa e ni: ‘pali sina li ike!’ ni la mi o pona e pali mi! ni la mama mi li kama li lukin la pali mi li ike ala tawa ona. ona li kalama wawa ala tawa mi.” lawa pi jan lili li lukin awen e jan lili kepeken nasin ni: ona li pana e kalama insa pi toki ike tawa jan lili. jan lili li kama suli la kalama insa ni li awen lon.

jan li jo e kalama insa sama ni la sona ni li ken pana e nasin pona tawa ona. tenpo ante la mi ken toki e ni.