meli lili pi len loje

jan mute li sona e toki ni: meli lili pi len loje li tawa mama mama meli ona - taso soweli ike li wile moku e ona. tan ni la, soweli ike li toki tawa meli. meli li wile awen lon nasin. taso meli li awen ala lon nasin tan toki soweli. mi jan lili la, mi kama sona e toki ni.

jan sama Kime (Grimm) tu li kute e toki mute, li sitelen e toki kute lon lipu. toki pi meli lili pi len loje li lon lipu ni. jan Same li ante toki e toki ni kepeken toki pona. jan Same li jan seme? ona li pali mute tawa toki pona: ona li pali e nasin sitelen pi sitelen pona. nimi pi nasin ni li “linja pona”. ona li pali sin e sitelen sitelen ale. ona li pali e sitelen tawa tan ni: jan li ken kama sona e sitelen pona. nimi pi sitelen tawa ni li “o kama sona e sitelen pona”. jan li ken lukin e pali ni, e pali ante, e pali ona ale lon lipu “musi lili”, lon lipu Jutu.

pu la, meli lili pi len loje li nasa ala nasa? nimi ona pi mute lili taso li nasa lili. toki nimi li pana e sona pi nimi ni. taso, mi ken sona e nimi nasa ona tan toki ale. ni li musi. mi lukin e lipu ni kepeken toki pona la, mi pilin sama jan lili.

jan Same li sitelen e ona kepeken sitelen mute ante la, jan li ken lukin e toki ni kepeken sitelen Lasina anu sitelen pona anu sitelen sitelen. lipu pi meli lili pi len loje li pona musi mute tawa lukin mi tan ni.

toki ni li pona mute tawa mi. mi wile e ni: jan mute li lukin e toki lili ni.