akesi seli li moli e seli

tenpo wan la akesi seli Poko li lon. akesi seli li ken tawa lon kon sewi li ken pana e seli tan uta ona. ona li ken pana e seli la ni li ike tawa ona. tan ni: ona li jo e pakala lon sijelo ona. tenpo mute la ona li kama jo e kon tawa insa ona la sijelo ona li pini e tawa kon. ona li wile ala, taso insa ona li tawa mute li wile ala kama jo e kon lon tenpo lili lili. ni la seli li tawa tan uta ona tawa ijo ali. ni li ike mute a. tan ni la akesi Poko li lon poka pi jan pona ona la ona li seli e ijo ali. jan ala li wile kama lon poka pi akesi Poko. ona li pilin ike. akesi Poko li wile musi. taso ona li jo ala e jan pona lon tenpo ni. taso tenpo wan la jan pi sona mute li toki e ni tawa akesi Poko:

“o kama jan pi moli seli a. sina pali e seli la sina jo e ilo mute tawa moli ona”.

akesi Poko li toki e ni: “jan pi moli seli li seme?”

“ona li pali e moli pi seli suli. ona li jo e ilo telo mute e ijo ante. ona li pali la seli li moli li weka”.

“mu a! ni li sona pi pona mute a! mi ken kama ni”.

ona li pali mute tawa sona pi nasin pi jan pi moli seli. tenpo sike kama la ona li sona. ona li pali lon poka pi jan ante pi moli seli. akesi Poko li pana e seli uta pi wile ona ala la ni li ike ala. tan ni: jan ali li jo e len pona tawa seli. tomo pali li jo e sinpin pona tawa seli. tenpo ni la akesi Poko li lon ma wan la ona li pana e seli la ona li jo e linja pi telo mute. kepeken ni la ona li moli e seli lon tenpo lili. akesi Poko li wawa tan ni: ona li ken moli mute e seli ante.

tenpo ni la jan mute li olin e akesi Poko. taso jan li sona ala e akesi la pali ona pi moli seli li ken nasa tawa jan ni. ni li tan ni: seli ante suli li lon tomo pi jan ni la akesi li kama la jan li pilin e ni: akesi li wile moli e jan ali li wile pakala e tomo mi, akesi li kama li toki e ni: “mi jan pi moli seli a. mi moli e seli sina.” taso ona li pana uta e seli mute tawa seli. ike a! taso ona li ike ala. akesi li ken ala pini e pana pi seli ona. taso ona li moli e seli tu lon tenpo lili lili. ona li pali pona. seli ali li moli. jan li pilin pona.

ni li lon pi akesi ni. akesi Poko li pilin pona tawa lon ona. mu a!