[o sona e ni: ike tawa jan kule li lon toki ni]

jan kule li seme? meli li olin e meli la, mije li olin e mije la, jan li tonsi¹ la, ona li jan kule. kule mute pi jan kule li lon.

tenpo pini la, toki en nimi li ante. jan kule li lon tenpo ale. taso tenpo mute la, kulupu mute li sona ala e ni li jo ala e nimi. ante la, ona li sona li ike tawa jan kule. ni la, jan kule o powe² lon tenpo mute. tenpo ante la, jan kule li lon, taso nimi en toki en nasin li ante. ni la, jan mute li lukin e jan kule pi tenpo pini li lukin ala e kule ona.

ni ale la, mi lukin e tenpo pini la, mi alasa ala e ni: jan li toki e ni: “mi jan kule” anu “mi tonsi”. mi alasa e ni: nasin ona li nasin kule. ona li olin e jan seme? ona en meli en mije li sama ala sama?

nanpa wan : tonsi lon ma Mesopotamija

tenpo pini mute la, ma Mesopotamija li lon. sona mute tan tenpo ona li pakala li weka. mi ken ala lukin pona e ona. taso mi sona e ni: tonsi li lon.

tenpo pi ma ni la, tonsi li seme? kulupu li wile li toki e ni: “mije o wawa o utala o lawa e ma o lukin mije o toki mije. meli o awen e tomo o pali e len o mama e jan lili o lukin meli o toki meli. jan ante ale o tonsi.” ona li ken ala lon kulupu, taso ona li ken lon tomo sewi li ken jan sewi li ken lon wan e nasin mije e nasin meli lon nasin ona. tomo sewi pi sewi Inana li pona tawa ona. ken la, ni li ike tawa ona anu pona tawa ona. mi sona ala, mi jo ala e lukin ona.

toki ante pi ma Mesopotamija li jo e nimi ante. toki Emeki* la, ona li ‘gala’. toki Akatu la, ona li ‘kalû’ li ‘kurgarrū’ li ‘assinnu’.

ma Mesopotamija la, toki sewi ni li lon:

sewi Inana* li wile tawa ma moli. ona li toki tawa sewi Enki e ni: “mi kama ala tan ma moli la, o kama e mi.”

sewi lawa pi ma moli li meli tan mama sama li sewi Elesikala. moli li lon lupa ma li jo e pake³ luka wan. sewi Inana li kama tawa pake li toki e ni: “o open e pake ni. mi kama.”

sewi Elesikala li wile ala e ona. taso sewi Inana li wawa. sewi Elesikala li toki e ni: “sina ken kama. taso pake ale la, o weka e len wan.”

ona li open e pake nanpa wan la, sewi Inana li weka e len nanpa wan. ona li open e pake nanpa tu la, sewi Inana li weka e len nanpa tu. nanpa ale la, ni li sama. pini la, sewi Inana li weka e len ale la, wawa ona li weka.

sewi Elesikala li pakala e ona, li ike e ona, li pana e jaki tawa sijelo ona, li moli e ona. ona li awen e sijelo ona. unpa ala en mama sin ala li lon ma ale. kasi ale li kama suli ala.

sewi Inana li kama ala la, sewi Enki li pali e tonsi Asusunami* li toki e ni: “o tawa ma moli. o pona tawa sewi Elesikala. o pana e telo wawa tawa sewi Inana. telo wawa li pona e ona li mama sin e ona li moli ala e ona.”

tonsi Asusunami li pali e ale ni la, ona en sewi Inana li weka tan ma moli. sewi Elesikala li pilin ike li pilin utala li ike e ale ona e jan sama ale ona e tonsi ale.

taso sewi Inana li pilin pona tawa ona li pona tawa ona tawa tonsi ale. ni la, tomo sewi Inana li awen e tonsi ale.

tenpo ante la, toki sewi ni li ante. taso ale la, tonsi li lon.

o sona e ni:

*nimi pi toki Emeki lon toki Inli li ‘Sumerian’
*sewi Inana - toki Emeki la, nimi ona li ‘Inanna’. toki Akatu la, nimi ona li ‘Ishtar’
*sewi Enki - toki Emeki la, nimi ona li ‘Enki’. toki Akatu la, nimi ona li ‘Ea’
*sewi Elesikala - toki Emeki la, nimi ona li ‘Ereshkigal’. mi alasa la, taso mi lukin ala e nimi ante lon toki Akatu.
*tonsi Asusunami - toki Emeki la, ona li jan tu li ‘gala-tura’ and the ‘kur-jara’. toki Akatu la, nimi ona li ‘Asu-shu-namir’