ma pi nimi pona

pimeja li pini, suno sin li kama. jan pona mi o moku pona! suno ni la mi en sina li tawa nena weka.

mi en sina li tawa kepeken noka. o lukin e nimi Kasi! ona li pana e nimi Kili. nimi Waso li lon luka ona li kalama musi. nimi Soweli li lukin e sina li kama tawa sina. ona li kalama pona a! ona li olin e sina.

nimi Soweli li wile musi e sina, taso mi en sina li wile tawa nena. mi wile lukin e ni: nimi seme li lon sewi nena?

mi en sina li tawa lon nasin lon tenpo mute. pini la mi en sina li kama lon lawa nena. sijelo sina li moku mute e kon! o awen lili lon kiwen ni tawa ni: sijelo sina li pilin pona.

nimi seme li lon nena ni? ni li nena pi nasin ante. lawa pi nena ni la nimi pi kule ale li lon!

o lukin! ni li nimi Walo. sina lukin e ona la sina pilin seme? nimi Walo li wawa, li jaki ala. nimi Walo li pana e pilin sewi. pilin olin li sama pilin ni tan ni: nimi Walo li ken ala ike li pona lon tenpo ale. taso mi ken ala lukin e nimi Walo lon tenpo ale. nimi Walo taso li pona ala. mi wile e ijo ante lon poka ona.

nimi Walo li weka la nimi Pimeja li kama. nimi Pimeja li monsuta¹ lili e mi. nimi Pimeja li kama la mi wile sona e ni: mi lon awen anu seme? taso mi lon awen la nimi Pimeja li pana e lape pona tawa mi tan ni: nimi Pimeja la suno en seli en kalama li lon ala. ni la nimi Pimeja li ken pona. taso nimi Pimeja o weka tan insa pi pilin mi! nimi Pimeja li lon pilin mi la mi pilin ike, mi wile pakala, mi wile moli. nimi Pimeja li nasa anu seme? mi la ale li nimi Walo anu nimi Pimeja la mi pilin pona ala. mi wile e kule ante. ken la sina pilin sama mi.

o lukin! nimi Jelo li lon. nimi Jelo li kule musi li kule suno. ona li kule pi kili palisa suwi. taso tenpo mute la nimi Jelo li ike li jaki. wawa musi pi nimi Jelo li pona, taso mi ken ala lukin e ona lon tenpo ale. tenpo mute la ona li ken nasa e mi. nimi Loje li kama. ona li sama nimi Jelo. taso ona li kule suli tawa nimi Jelo. ona li pana e pilin wawa tawa mi. ona li kule pi telo sijelo. nimi Loje li pimeja lukin la mi pilin sama ni: pilin mi li awen wawa. nimi Loje li kama walo la ona li nasa lili e mi. nimi Loje li kule pi nasin olin ante li kule unpa. nimi Loje li kule pi pilin wile.

o lukin tawa monsi! nimi Laso li lon ona. nimi Laso li pana e pilin ni tawa mi: ale li pona. nimi Laso li lon telo li lon kasi. ona li pana e moku tawa ale. nimi Laso li sama mama.

nimi pi kule seme li pona tawa sina? sina ken lukin e nimi wan la sina lukin e nimi seme? ken la sina pilin sama mi: kule wan li ike, kule mute li pona. tenpo suno li pini. mi en sina o tawa tomo lon noka nena. o lukin! suno li kama lon poka ma la kule li kama pona mute a! kule ale li lon sama la mi pilin pona mute!