musi Kasi li lili li suwi li pona

musi Kasi li musi lon ilo sona. jan Kilaki li jan pi toki pona li pali e ona. esun Sima (Steam) la, jan li ken esun e mani pi mute lili e musi ni. nimi ona li lon toki pona. kin la, jan li pona lon musi la, toki li kama la, toki ni li lon toki pona. taso toki pona li lon insa ala pi musi ni tan ni: toki ala li lon musi ni. lipu pi pini musi taso la, toki li lon.

jan li musi e musi ni la, ona li kasi. open la, kasi li pan wan taso lon insa ma. kasi o suli e sijelo. ni la, kasi li kama suli tawa sewi li kama suli tawa anpa. kasi li ken mama e luka laso e luka walo e noka e kasi kule e kili. waso li lon li lukin pona. pipi li lon li moku e kili li pona tawa sijelo kasi.

mi en jan Kilaki li toki kepeken toki pona taso! ona li toki e ni:

“tenpo lili kama la, mi pana e ijo sin wan pi musi Kasi. ijo ni la, sina ken pali e kasi lon ma sike suli ante. taso, tenpo kama suli, musi Kasi li lon pini mi. mi jo e pali mute ante. mi pali e musi Kasi la, mi musi. musi Kasi li pona tawa jan mute. ni li pona tawa mi.”

musi ni li lili a. mute suli li lon ala. taso sina wile taso e musi pi wawa lili pi pali mute ala pi pilin pona la, musi ni li pona tawa wile sina. ona li suwi a tawa mi. mi wile e ni: jan mute pi toki pona li musi lon musi kasi! mi ale li ken toki pona e kasi pi mi ale!

nasin sona pi toki pona la, nimi ‘pona’ en nimi ‘lili’ li ken sama mute. toki pona li toki lili. ni la, musi Kasi li pona.