o kepeken e nimi pi poka pi nimi pali

jan li kepeken nasin mute pi toki pona. toki pona li ken mute. taso jan mute li kepeken lili e ijo wan pi toki pona: nimi pi poka pi nimi pali. ni li seme? ni li ni: mi pali pona. mi lape lili. mi moku mute. jan mute li kepeken e nimi “pona” e nimi “lili” e nimi “mute” e nimi “suli” sama nimi pi poka pi nimi pali. taso sina ken kepeken nimi ali tawa pali ni. o kepeken a! ni li ijo pona mute pi toki pona, taso jan li kepeken lili mute.

sina ken kepeken toki ni tawa kon ni:

• “sina moku ali e moku pona.” tenpo ni la moku pona li lon ala a.
• “mi toki tu e ijo ni” mi toki la mi toki kin.
• “waso li pali sike e tomo ona kepeken telo ona kepeken palisa kasi.” sina sona e ni: tomo ona li sike a!
• “ona li pana olin e sike pi palisa luka” tenpo pana la ona li pilin olin.
• “mi sona wawa e ijo pini ni”. mi ken sona e sona ali pi ijo pini wan. ali a!
• “sina pana sona e lipu sitelen, anu seme?” mi wile sona e ni: sina sona e pana sina, anu sina pana li sona ala e pana sina, anu seme?
• “mi musi taso kepeken sitelen tawa.” mi musi ala kepeken ijo ante.
• “mi tawa noka e sike ni”. mi tawa e sike musi kepeken noka.
• “mi esun toki e ijo sina” mi kepeken mani ala tawa esun lon tenpo ni. mi toki taso e ni tawa sina: mi esun e ni tan sina. tenpo kama la mi pana e mani.
• “mi tawa e palisa la soweli mi li kama jo uta e ona” soweli mi li kepeken uta tawa jo.

jan li kepeken lili e nimi ni tan seme? mi pilin la sina pali e ni la sina wile kepeken tenpo mute. taso sina wile pana e toki pi toki insa lili. ni li pona. taso sina sitelen la sina ken wile e ni: sina pali e ijo musi e ijo nasa e ijo ante a. ni la o kepeken e nimi pi poka pi nimi pali. o lon e ijo pona pi toki pona kepeken ni a.