nasin sewi Puta

jan ale pi ma Elopa en ma Mewika li sona pona e nasin sewi Kolisu e nasin sewi Jawatu (יהדות/ Yahadut). ken la jan mute li sona e nasin sewi Silami kin. taso jan mute li sona ala e nasin sewi Puta, anu ona li sona lili. tan ni la mi sitelen e lipu lili ni.

tenpo suli mute pini la jan lawa lili li lon ma Palata. nimi ona li Sitata. jan Sitata li jo e ale, taso ona li pilin ala pona. mama mije ona li wile ala e ni: jan Sitata li tawa weka tan tomo suli lawa ona. kin la mama mije ona li wile ala e ni: jan Sitata li lukin e ike pi ma ale. tenpo la jan Sitata li ken tawa weka tan tomo suli lawa. weka tan tomo suli lawa la tenpo nanpa wan la ona li lukin e jan pi sike suno mute. kama la ona li lukin e jan pi sijelo ike. kama la ona li lukin e jan moli. pini la ona li lukin e jan pi nasin sewi. jan ni li jo e ala, taso ona li pilin pona mute. jan Sitata kin li wile alasa e nasin pi pilin pona. tan ni la ona li tawa weka tan tomo ona. ona li wile alasa e nasin pi pini pi pilin ike pi ma ale.

jan Sitata li open alasa e nasin pi pilin pona. open la ona li kama sona e jan tu pi pana pi sona sewi. jan Sitata li kama sona e ijo mute tan ona, taso ona li kama sona ala e nasin pi pini pi pilin ike. kama la ona li open moku lili mute. jan mute pi nasin sewi li kepeken nasin ni tan ni: ona li wile wan lon ale. sijelo pi jan Sitata li kama ike li kama linja, taso ona li kama sona ala e pini pi pilin ike. ni la ona li toki e ni: nasin ni li ike tawa ona. tan ni la ona li open moku sin.

ni la tenpo pimeja la ona li tawa kasi suli pona li anpa monsi lon noka ona. ona li pini e oko li kute e kon insa e kon weka. toki insa ona li pini.

tenpo pimeja li pini, la ona li kama jo e suno insa lon noka pi kasi suli ni. pini la ona li kama sona e nasin pi pini pi pilin ike. jan Sitata li kama Puta, jan pi suno insa.

noka pi nasin sewi ona li toki lon pona tu tu:

1. pilin ike li lon ale
2. pilin ike li tan wile ike
3. jan li ken weka e wile ike
4. nasin pi weka pi wile ike (nasin luka tu wan) li ni: sona pona, wile pona, toki pona, pali pona, mani moku pona, wawa pona, lukin wawa pona, weka pona pi toki insa.

nasin sewi Puta Selawata (wan pi nasin pi nasin sewi Puta) li jo e lawa luka kin:

1. o moli ala
2. jan li pana ala e ijo ona tawa sina, la o kama jo ala e ona
3. o unpa ala e meli anu mije pi jan ante
4. o toki ala e toki ike
5. o moku ala e kasi nasa e telo nasa

jan pi nasin sewi Puta li wile pini e pilin ike lon ma ni. ona li wile ala kama lon sin. ona li wile kama lon Nipana (kon pi ike ala), li wile wan lon ale.