tenpo kama

tenpo kama? seme li lon tenpo kama? a! mi pana e sona:

tenpo pi sike kama la, jaki Kolona li lon ala. ala, jaki Kolona li lon, taso ona li ike ala tawa mi mute. mi mute li ken utala e jaki Kolona!

kin la, jan li kama mute. nanpa jan li mute mute. jan li pali e jan lili sin, a. ken la, ni li ike tan ni: jan li wile e moku, e telo, e wawa, e ijo ante. taso, mi mute li jo e ma wan taso. tenpo ni la, mi mute li wile e ma tu. ma li ken ni: ma li ike.

jan li kama mute la, ken la, mi mute li lon ma tomo suli. tenpo kama la, ma tomo suli li lon. tenpo kama la, jan pi mute lili li lon ma pi ma tomo ala.

ni la, o lukin e seli. ma li seli (o lukin e toki ni: „ma li kama seli“ lon lipu tenpo nanpa mun tan mi). tan ni la, kiwen telo lete pi tenpo pini li telo lon tenpo ni. tenpo kama la, ma lon telo li ken lon ala! tenpo ni la, ma mute lon poka telo li pali e nena tan ni. tenpo kama la, ma Tuwalu (Tuvalu) li lon telo, li lon ala.

a… ni ale li ike mute, anu seme? ala! tenpo kama la, sona mute li lon. sona mute li ken pona e ijo mute. mi mute li ken pali e ijo sin, e ilo sin. tenpo ni la, jan li pali e ilo pi pana wawa lon ma Kanse pi nimi Itele (ITER). ken la, ona li pana e wawa mute. wawa mute li lon la, mi mute li ken pona e ma. tenpo kama la, mi mute li lon mun Masi! jan mute li wile tawa mun Masi.

tenpo kama li ike anu pona? mi toki e ni: jan li pali e ijo pona la, tenpo kama li pona. ale li pona!