wile pi sike pan li kama lon

tenpo wan la kasi pi pan sike walo li lon. ona li lon telo mute li wile alasa e suno. tan ni la ona li kama suli. jan li sona e ni. tan ni la jan li pana e telo mute la kasi li kama suli mute mute kepeken tenpo lili. tenpo li tawa la ona li suli e ijo walo tawa unpa. ona li open e suli pi kili ona. tenpo kama la sike pi kasi pan ni li lon a! ona li kili li lili mute li lon insa pi sike laso kasi.

tenpo suno ali la jan pi tenpo suli li kama tawa ma kasi li toki tawa sike lili mute. “sina o suli a! tenpo kama la sina li tawa tan ma kasi ni. sina kama lon ma mute li pilin e lon mute musi. o awen. tenpo kama lili la sina kama pona mute. sina wile pali mute tawa pona sina. sina pali la tenpo suno wan la jan li moku e sina li pilin pona mute a!” sike pan ali li toki e ni “a! mi wile mute e ni a! mi ken musi, mi ken tawa, mi ken pana e pilin pona”.

tenpo pi kama jo li lon. jan li kama li jo e ilo kiwen li pakala e kasi li pana e olin mute tawa sike pan. sike li toki e ni: “aaa mi pilin pona mute. mi lon tomo tawa la mi lon poka pi sike mute sama mi. mi ken toki tawa ona. tenpo pini la mi wile toki tawa sike pan pona mi la mi wile kalama wawa tawa ona”. tomo tawa li tawa. kili pan li tawa sike li musi mute a.

tenpo suno sin li kama la ona li kama lon tomo pi ilo mute. sike li kama poka li kama nena suli. sike ni li toki tawa sike ante. sike ante li ante mute a! sike wan li toki e ni: “mi lon telo mute ala”. sike ante li toki e ni: “jan li kama jo ala e mi. ilo suli li pali e ni.”

kalama li lon.

lupa li open la sike pan li tawa lon ni. ona li tawa mute lon ilo nasa. ilo nasa li kama jo e selo li weka e kasi e ijo laso. ni li musi mute tawa sike pan. ona li tawa anpa li tawa sewi li tawa mute li pilin musi, li kalama tan pilin ni. sike pan li lukin e sike pan ante. ona li tawa poki. taso sike pan ni li tawa poki ala. ona li toki e ni: “tenpo wan la mi wile pana pona mute e pilin pona uta tawa jan. jan pi tenpo mute li toki e ni. ni li tan pi lon mi”. ona li pilin e ni: ona li wile kama jo e walo wawa tawa ni. ona li tawa ilo ante li selo e ona. ona li kama walo mute sama sike kiwen walo pi kala awen pi selo kiwen a! tenpo ni la ona li tawa poki. ona li lon poka pi sike pan ante la ona li toki mute tawa ona li musi mute. tenpo mute la ona li poka lon poki. tan ni la ona li ken sona mute e sike pan pi poka ona li olin e ona. ona ali poka li kama sike pi tenpo suli (suli mute ala). ona li kulupu olin. ona li pilin pona, taso ona li wile wawa e ijo wan: “lon mi li tan pona uta tawa jan. lon mi la mi pali mute tawa ni”.

tenpo wawa li poka. poki li lon esun. jan li jo esun e poki li tawa e poki tawa tomo ona. ona li pilin moku li wile e sike pan a! sike pan ali li kalama li pilin musi. tenpo pi lon ona li kama a! tenpo moku li kama la ona li pilin e musi lon. musi pi lon ona. jan li open e poki li pana e sike pan tawa telo seli. pakala la sike pan wan li anpa lon poki ala pi telo seli. ona li anpa lon supa. ona li kalama telo. “o jo e mi. ni li tenpo suli pi lon mi a.” taso jan li kama jo ala e ona. sike pan ante li pilin pona li kama suli mute. jan li pana e ijo moku ante tawa ona li tawa tomo ante. ona li tomo moku. sike pan li kalama wawa mute. ala li kute. ona li pilin e ni: “mi ken ala pana e pona uta tawa jan la lon mi li ala. jan pi tenpo suli li toki e lon mi. mi pakala. mi pali ala e ni. mi seme? mi ala.” tenpo kama lili la jan li kama kin. sinpin ona li toki e ni: ona li pilin pona tan moku. tenpo ni la ona li weka e jaki supa tawa poki jaki. sike pan li tawa ni. ona li kalama. taso kili loje jaki li kama poka li toki tawa ona. “sina pilin ike tan seme?”. “mi pilin ike tan ni: mi pali ala e pali pi lon mi. lon mi li ala”. “ala a! ni li nasa. sina pali e ijo mute lon lon sina li sona e sike ante mute li musi. musi sina li ni ala ni: ijo nasa wile pi jan suli pi ma kasi wan. kulupu li toki e ni tawa sina: sina pali ala e ni la sina musi ala, sina lon ala. taso ni li toki jaki a! musi sina li toki kulupu ala. musi sina li ijo pi musi sina. lon sina li lon sina. o pilin pona. toki kulupu li nasa. tenpo ni la sina lon poki jaki taso ni li jaki ala. toki kulupu li jaki.”

sike pan li kute. ona li toki e ni: “toki sina li toki lon. lon mi la ona li suli li musi li pilin pona. musi mi en pilin pona mi li lon. wile ali pi lon mi li kama lon. ona li ijo pi toki kulupu ala. mi wile ala pali e ijo pi toki kulupu tawa musi mi. kili loje o, sina pona”.