open Lapo All · Collections · Tags · Authors · Random · Add
Details

Edit on Github

License: CC-BY-SA 4.0

Sources: liputenpo.org liputenpo.org

ma pi nimi pona

jan Telakoman
Aug 2, 2021

jan pona mi o! tenpo suno ni li tenpo suno ike lon ma pi nimi pona. ale li ike tan ni: nimi Sona en nimi Pilin li utala li toki ike kepeken kalama suli. nimi Sona li tawa tomo ona, nimi Pilin li tawa tomo ona. nimi ale li pilin ike.

mi en sina o kama sona e ni: nimi Sona en nimi Pilin li utala tan seme? mi en sina li sona e ni la ken la mi en sina li ken pona e pilin pi ona tu. ni la ale li ken kama pona lon ma pi nimi pona.

mi en sina li tawa tomo pi nimi Sona. ona li lon insa pi tomo ona. mi lukin e ni: sijelo ona li kiwen li sama poki pi sinpin palisa. ijo ala pi sijelo ona li sama sike. ona li lukin ala tawa lupa. ona li pana e lawa ona tawa insa pi luka tu ona. ona li toki e ni: “mi wile alasa e nasin pona tawa ni: nimi Pilin li pali e ijo wile!”

mi toki e ni tawa nimi Sona: “nimi Pilin li pali e seme tawa sina?”

nimi Sona li toki e ni: “ona li kute ala e mi! tenpo ale la mi toki e ni tawa ona: sina wile pali e ni e ni e ni tan ni. mi pana e sona pona tawa ona. tenpo pini ale la ona li pali e wile. taso tenpo suno ni la ona li utala e mi! ona li wile ala pali e wile! ona li wile musi taso!”

mi en sina o tawa nimi Pilin. nimi Pilin li lon insa pi tomo ona. sijelo ona li kiwen ala li sama kulupu walo pi telo sewi. ona li kalama mute tan pilin ike ona. telo mute li kama tan lukin ona. mi selo e sijelo ona kepeken luka tu mi.

mi toki e ni tawa ona: “sina pali ala e wile pi nimi Sona tan seme?”

nimi Pilin li toki e ni: “tenpo suli la mi pali e wile ale pi nimi Sona. taso ona li pana ala e tenpo tawa mi tawa ijo ante. mi wile musi. taso mi wile ala musi taso. mi jo e pilin mute. pilin ale mi li wile e tenpo pi pali ala. pilin ike mi li wile e tenpo tawa kama pona. ala la mi pilin ike mute!”

“mi wile pilin e ni: nimi Sona li olin e mi. taso nimi Sona li pana ala e tenpo tawa mi la mi pilin e ni: ona li olin ala e mi. mi sama ijo jaki tawa ona.”

mi toki e ni: “nimi Sona li olin e sina. ona li wile awen e sina. ona li wile ala e ni: tenpo kama la sina pilin ike tan pali sina pi tenpo pini. taso ona li pakala e pilin sina la ni li ike! mi o toki tawa ona.”

mi tawa nimi Sona, mi toki e ni: “nimi Pilin li pilin e ni: sina olin ala e ona.”

nimi Sona li toki e ni: “ala. ona li suli tawa mi.”

mi toki e ni: “nimi Pilin li suli tawa sina tan seme?”

nimi Sona li toki e ni: “ona li suli tawa mi tan ni: nimi Pilin li ijo sewi pi insa jan.”

mi toki e ni: “ni la o pakala ala e nimi Pilin. o toki e pilin olin sina tawa ona. o pona e pilin pakala ona. o pana e tenpo tawa ona. ni la, nimi Pilin li kama pona li pali e wile sina.”

nimi Sona li tawa nimi Pilin li toki tawa ona lon nasin pona. ale li kama pona sin lon ma pi nimi pona. pona tawa sina! sina lon poka mi lon tenpo ale ni. ni li pona e pilin mi.