sike suno mute pi toki pona

a! tenpo pini la jan Sonja li pali e toki pona. tenpo pi mute seme li tawa tan tenpo ni? mute a! lon, mute li luka luka luka luka la ma li sike mute e suno tan tenpo pi pali ni a!

ni li lon: tenpo pini lili la jan mute mute li kama sona e toki pona. toki pona li kama suli mute la ona li pona a! mi sitelen e ni lon insa lawa mi: toki pona li sama jan. tenpo wan la ona li jan lili lili li awen ante mute li sona e jan ante pi mute lili. tenpo li tawa la jan ni li toki tawa jan mute li kama jo e ijo lili pi jan ante ni. tenpo li tawa la ona li kama jan suli li kama jo e nasin lon wawa. ona li sona e jan mute li pana e pona tawa ona.

lon li ante la toki pona li jan la ona li wile e seme tawa tenpo suno ona? ona li pona li wile ala jo e ijo mute. sina pana e kalama musi tawa ona la ona li pilin olin. sina pana e musi ante la ni li pona mute tawa ona. toki pona li kama suli la ona li lon poka ala pi mama ona. ona li tawa mute lon ma li pana e pona tawa jan ali li kama jo e jan pona mute li pilin e pilin ante mute. ona li sona e jan pi ma mute a! tenpo ni la ona li lon tomo wan la ona li toki e ni: mi sama seme lon tenpo kama luka luka luka luka kin a? jan ala li ken sona a, taso ona li pilin pona tawa tenpo kama.

sina kama sona e toki pona tan ni: sina pilin pona tawa ona. sina musi kepeken ona, sina toki tawa jan lon ilo toki anu ma lon. sina musi kin tan ni: sina lukin e ijo pi toki pona tan jan ante. ken la sina musi tan pali sina pi ijo sin pi toki pona. tan mute pi musi mute li lon a. tenpo pini la jan li pana e sona ona tawa lipu sona pi jan ali pi toki pona. jan li toki e ni: mi kama sona e toki pona tan ni: mi wile musi.

toki pona li seme? ona li toki, anu seme? ni li ni taso ala. ona li kulupu mute musi li nasin musi. ona li ma tawa pilin sin kepeken nasin ante. toki pona li lon lon tenpo mute la ni li ni: jan mute li musi mute.

jan li olin e toki pona la toki pona li lon tenpo mute kin. toki pali ante li lon. ni li toki Epelanto anu toki Kilinkon anu toki ante mute. taso toki pali mute li moli li sike lili e suno. toki pona li lon taso tan olin jan. toki pona li sike mute e suno la tan pi tenpo ni li ni: jan li olin mute e toki pona.

mi ali o awen olin a o awen e lon pi toki pona a!

ante la o sona e ni: tenpo suno pi toki pona la jan mute li kulupu tawa musi kepeken toki pona. sina ken lukin e musi, anu sina ken toki lon musi ni. jan li pana e sona li pana e kalama musi li pana e ijo mute ante. o kama a! sina tawa ma pona pi toki pona lon ilo Siko la sina ken kama.