mi pilin e ni: soweli li lili la, ona li suwi.

soweli ma pi lili nanpa wan (Etruscan Shrew)

soweli mute li pana e telo mama tawa soweli lili ona la, soweli ni li lili nanpa wan tawa nasin pi kama anpa.

oko sina li pini li open sin lon tenpo lili la, pilin ona li kalama lon tenpo mute a. sama la, ona li moku e kon lon tenpo mute. ona li pali ala e ni la, ona li kama lete, li ken moli. kin la, ona li wile awen lon ma pi seli pona pi kon telo. ona li lon tenpo lete anu tenpo pi moku ala la, ona li ken lape, li lili e seli ona. ona li pini e lape la, ona li suli mute a e tawa pilin, e tawa pi moku kon, e tawa sijelo. ona li kama seli tan ni lon tenpo lili a.

ona li awen e wawa la, ona li moku e suli moku sama sijelo ona tu lon tenpo suno wan. ona li moku e pipi, e akesi sin, e soweli pi lili mute. ona li alasa la, ona li pilin taso lon tenpo mute.

soweli ni meli en soweli ni mije li sama tawa lukin.

kala pi lili nanpa wan (Paedocypris)

ken la mani lili li lili tawa sina. taso kala ni la, mani lili li suli tawa ona tan ni: ona li lili mute a. suli sijelo ale ona li ken lon suli lili pi palisa luka sina.

selo ona li kule ala la, sina ken lukin lon insa ona. sina ken lukin e kiwen lon insa sijelo. sina lukin kepeken lukin pona la, sina ken lukin e insa lawa ona kin lon sinpin ona tan ni: kiwen li selo ala e insa lawa. ni en ijo ante pi sijelo ona li sama kala ante, taso kala ante la, ni li lon tenpo open taso. kala li awen lili la, ona li wile awen e ijo pi tenpo open ona. kala ni li lili mute la, ona li awen e ijo mute pi tenpo open.