toki tawa jan pi lipu tenpo - jan Alonola

jan Alonola o toki! sina pali e seme tawa lipu tenpo?

mi pali e sitelen mute, e toki mute, e lipu “liputenpo.org”, e lukin pi lipu tenpo. ni li ijo mute. tenpo mute la, kin la, mi o ante e toki, e sitelen.

pali pi lipu tenpo la ijo seme li pona mute?

mi sitelen la, ni li pona tawa mi! mi wile sitelen e toki, e sitelen! toki la, mi wile pana e sona mi tawa jan ale. sitelen la, mi wile pali e sitelen pi pona lukin! mi pali kin e lukin pi lipu tenpo. ni li pona kin! taso, ni li pali mute! mi o kepeken e wawa mute tawa ni. taso, mi pali e lipu tenpo lon la, mi pilin pona.

ijo seme li ken pona kin e lipu tenpo?

mi wile e ni: lipu tenpo li jo e lipu mute mute! mi mute o jo e jan pali mute! n, kin la, mi wile e lipu tenpo lon. mi wile jo e lipu tenpo lon luka mi!

sina toki e toki ante seme tan seme?

mi toki e toki Tosi tan ni: mi lon ma Tosi. mi la, toki Tosi li pona mute! mi toki e toki Posuka tan ni: mama mi en mama mama mi li toki e toki Posuka. taso, mi toki kin e toki Selonka. kulupu mama mi li toki e toki Selonka, e toki Posuka. toki tu ni li sama mute. a, mi toki kin e toki Inli, tan ni: mi kama sona ona lon tomo sona. mi toki pi pona lili lili e toki Kanse tan tomo sona. mi toki e toki ma. ni li pona tawa mi! “o konta wa e toki ma” (o kama sona e toki ma). pini la, mi toki e toki pona. ona li pona mute!

sina pali e seme tawa pilin pona?

mi pali e ijo mute tawa pilin pona mi. mi kalama e ilo kalama pi linja tu tu. mi kama sona e sona toki! mi (en jan ante) li pali e toki ma, ni li musi! mi jo e ma Alonola lon lipu Jutu! mi pali e sitelen tawa mute! a, mi kin wile pali e kalama musi, taso mi ken ala pali e ni a a a. mi jo e soweli, e akesi, e kala, e pipi. ona li pona kin! mi pali e ijo pona tawa ona.

tenpo seme en nasin seme la sina kama sona e toki pona?

mi sona ala a! tenpo sike wan pini la, mi kama sona e ni: toki pona li lon. mi sona ala e nasin. ni la, mi en meli mi li kama sona e toki pona! mi ilo e toki sona pi jan Pije. lipu ona li pona mute! lipu ni li lipu pi tenpo mute, taso ona li pona kin!

nasin seme la sina kama jo e nimi Alonola lon toki pona?

mi pali e ma Alonola lon ma Jutu. mi ilo e nimi Alonola tan ni: mi wile ala ilo e nimi ni: „Argon“. mi wile ala e ni: jan li sona e ni: mi jan pi ma Alonola. taso, tenpo ni la, mi wile e ni: jan li sona e ni: mi jan pi ma Alonola. tan ni la, nimi mi li jan Alonola. kin la, toki pona la, nimi Akon (Argon) li ike lili tawa mi. nimi Akon li tan toki Elena. toki Elena la, jan Akon li jan ni: ona li wile pali mute! taso, tenpo ni la, musi la, mi pali mute!

o pilin e ni: jan wan pi wile sina li kama sona e toki pona. jan seme o kama sona?

n, mi wile e ni: jan mute li kama sona e toki pona. ni la, mi wile e jan pi tenpo pini mute! toki pona li pona tawa nasin pona (Taoism). taso, jan pi nasin pona li sona e nasin pona. mi wile pana e nasin pona tawa jan ni: ona li jo ala e nasin pona. mi jan Tosi. ni la, mi wile pana e sona pi toki pona tawa jan Wilen nanpa tu (Wilhelm II.). ona o ante e nasin ona tawa nasin pona! ken la, toki pona li ken pini e utala Elopa.

kama la sina wile pali e seme lon toki pona?

mi wile pali e ijo mute. mi wile pali e kalama musi! kin la, mi wile pali e lipu sin. lipu ni li lipu kalama. sina ken kute e kalama musi, e sona sin lon tenpo ale lon lipu ni! mi wile pali e lipu sitelen! mi olin e lipu Aselike (Asterix). mi wile pali e lipu pi sama ona. mi wile pali e sitelen tawa mute kepeken toki pona. ken la, mi pali e sitelen tawa kepeken lon lon, kepeken ala ilo nanpa mi! mi jo e pilin mute. o awen, jan ale o! mi wile pana e ijo mute tawa sina, o lukin!

pini la, mi tawa! o tawa pona! o awen pona! o lukin pona e toki ante! mi wile e ni: lipu tenpo li pona tawa sina!

o awen pona!