ale tenpo

ale tenpo li tenpo suli a. jan li ken ala ken sona e ona? o kute e toki ni:

toki la, nena kiwen pi suli mute li lon. kiwen ona li kiwen wawa. waso li kama, li pona e uta ona kepeken kiwen nena. tan ni la, kiwen lili lili lili li kama weka lili. waso li tawa weka, li mama e waso lili, li moli lon tenpo. waso lili li kama suli. tenpo sike mute li kama la, waso li kama lon nena kiwen, li pali sama mama ona. ni ale li sike lon tenpo, li kama, li kama, li kama, li lili pi mute ala e kiwen, li lili e kiwen, li lili e kiwen. tenpo waso mute li kama mute suli sama mute pi mun ale lon sewi pimeja, li kama mute suli suli kin a. tenpo la, nena kiwen li ala tan ni.

ni ale li ale tenpo anu seme? ala a! ni li tenpo pi nena wan taso. o kute e ni:

soweli lili la, nena li pona. waso li weka e nena la, ni li ike tawa soweli. ni la, ona li pali sin e nena. taso ona li wawa ala. ona li tawa e kiwen pi lili mute la, ona li wile e tenpo wan pi nena wan. nena li wile e kiwen lili pi mute pi mun ale. soweli li pali, li pali, li pali, li suli lili e nena, li suli e nena. nena li suli sama tenpo pini la, ni li ale tenpo anu seme? ala a! ni li tenpo pi pali nena taso. o kute e ni:

nena li ike tawa akesi. soweli lili li pali e nena la, akesi li wile weka e nena. taso ona li lili, li ken ala pali e ni. ni la, akesi li wile tawa waso, li wile toki e ni: “o pona e uta sina kepeken kiwen nena. o lili e nena.” taso lete la, akesi li ken ala tawa kepeken wawa. lete mute li lon la, akesi li tawa e noka wan ona kepeken tenpo wan pi pali nena. akesi li tawa waso la, ni li wile e tawa noka pi mute pi mun ale. akesi li tawa, li tawa, li tawa. akesi li pini e tawa, li lon waso la, ni li ale tenpo? ala a! ni li tenpo pi tawa akesi taso. ale tenpo la, tenpo pi tawa akesi li lili mute a, li lili sama tenpo ala a.

jan li ken ala ken sona e ale tenpo? ala. waso en soweli en akesi li pali, li sike tenpo, li kama e waso e soweli e akesi.