pilin mi tan "lipu pi nasin sona"

toki pona la nimi “pona” li pana e kon tu. kon nanpa wan li pilin pona. kon nanpa tu li ni: ijo li jo ala e ijo lili mute lon insa ona li nasa ala e lawa jan la ijo ni li pona. ala la ijo ni li ike.

ni la jan mute pi toki pona li pilin e ni: o toki ala e sona ike nasa kepeken toki pona. tenpo mute la mi pilin sama jan mute ni. tenpo mute la mi wile weka tan sona nasa ale. taso tenpo sama la mi lukin e ni: toki pona li ken ilo pi kama pona tawa sona ike nasa. mi pona e sona ike nasa kepeken toki pona la mi kama sona e ijo sin, mi pilin pona, mi musi.

ni la mi pilin pona tan ni: mi lukin e lipu sin pi pona sona lon toki pona. ni li lipu pi nasin sona (lipupinasinsona.wordpress.com). jan Penanto li pali e lipu ni.

lipu pi nasin sona la jan Penanto li pana e sona wawa sama ni: seme li lon insa pi ko lete suwi? jan li ken awen lon sike suno pi nanpa seme? kon sewi li ante e kon ma lon nasin seme? tawa wile sona ale la jan Penanto li pana e lipu lili sin.

lipu lili ale la jan Penanto li kepeken nasin ni: noka la ona li pana e toki pi pana sona lon toki Inli. ona li ante toki e toki ni tan toki Inli tawa toki pona li pana e toki pi toki pona lon lawa pi lipu lili. toki pi toki pona la ona li kepeken nimi suli. pini pi toki pi toki pona la ona li pana e kon pi nimi suli ale lon toki Inli.

kepeken nasin ni la jan Penanto li pona e sona. mi lukin e toki lon toki Inli la mi pilin e ni: toki Inli la jan pi nasin sona li kepeken nimi suli mute a! tan ni la jan li ken pilin e ni: “nimi suli li nasa e mi. mi sona ala e kon pi nimi suli. mi sona ala e ni la mi ken ala kama sona e sona suli.” taso nimi suli mute li wile ala. nimi suli pi mute lili li wile tawa pana sona. jan Penanto li kepeken ala nimi suli pi wile ala lon toki pona. jan li lukin e ni la jan li ken pilin e ni: “nimi suli li ken nasa, taso sona suli li nasa ala. mi ken kama sona e sona suli!”

jan Penanto li weka ala e nimi suli ale. noka pi toki pi toki pona la ona li pana e kon pi nimi suli lon toki Inli. jan li lukin ala e ni la jan li ken ala sona e kon pi nimi suli ni lon toki pona. ken la ni li wile, taso ni li pana e pilin pi ike lili tawa mi. mi wile e ni: mi lukin taso e toki pi toki pona la mi sona e kon.

taso ni li suli ala tan ni: jan Penanto li kepeken ala nimi suli mute. nanpa wan la mi ken lukin e kon pi nimi suli lon toki Inli. ni la mi sona pona e kon pi toki pi toki pona.

pona tawa sina, jan Penanto o! jan li lukin e lipu sina la jan li lukin e ni: toki pona li ilo wawa pi pona sona. mi kama sona e ijo mute tan sina.