lipu pi jan Puku

“jan Puku o! o telo e sijelo sina!”

“jan Puku o! o moku e moku sina!”

“jan Puku o! o tawa tomo sona!”

“jan Puku o! o lon tomo tawa!”

“jan Puku o! o pali e pali pi tomo sona!”

“jan Puku li lon seme?”

jan Puku li pali.

ona li lukin e lipu.

ona li lukin e lipu lon tenpo ale — lon tomo ona, lon tomo sona, lon ma kasi, lon supa lape.

lipu en toki en musi la, ona li lukin e ale.

jan Potu li toki e ni: “sina lukin e lipu tan seme,

jan Puku o?”

jan Tota li toki e ni: “ante la o kama lukin e

sitelen tawa!”

jan Puku li toki e ni: “lipu li musi mute!”

“o lukin! sina lukin ala lukin e sike? e linja ni? sina tawa e ni, li ante e ni, la ona li kama kipisi nimi. sina kulupu e kipisi nimi la sina jo e nimi!

nimi li ken musi, li ken sona, li ken ike, li ken pona.

sina kulupu e nimi la ona li kama toki. toki li kama lipu. o lukin e ona. ni la, MU tawa la, sina lon ma ante!

taso, tenpo ni la, pakala li lon.

jan Puku li jo ala e lipu!

lipu ale pi ken ona la,

ona li lukin e open e pini.

jan Puku li pana e telo oko li toki e ni: “mi o pali e seme? mi ken ala lukin e lipu!”

o awen! seme li lon ma ni?

jan Puku li lukin sewi li lukin e poki wan taso ala,

e poki tu taso ala, e poki lipu mute,

e lipu MUTE kin.

jan Puku li pilin pona li toki e ni: “lipu mute!”

taso, pakala wan li lon. jan Puku li lili. poki lipu ni li suli.

ona li ken lanpan e lipu kepeken seme?

ken la ona li ken kepeken linja?

anu len Sali tan mama ona?

anu supa mute tan tomo ni?

jan Puku li pilin e ni: ona li kama jo e soweli pi lawa suli la pona li lon. anu soweli jan. anu ona tu!

jan Puku li jo e nasin. ona li kama e jan Potu e jan Tota.

kepeken kalama lili la, ona li tawa lon sewi pi jan ante. jan Tota li toki e ni: “jan Potu o, sina suli! ni li tan moku suwi sina.”

jan Potu li toki e ni: “mi suli ala. jan Puku li suli!”

jan Puku li toki e ni: “o kalama lili! mi lon poka ona.”

tenpo ni la, ni ale li kama ike.

MUUUUUUUU!

“seme li lon ni?” ni li jan lipu pi suli mute!

ona li anpa e jan Puku.

jan Potu en jan Tota li tawa a!

pilin ike la jan Puku li lukin sewi e lipu.

jan lipu pi suli mute li toki e ni: “mi ken ala ken pona e ni?”

pilin ike la jan Poku li toki e ni:

“mi alasa tawa sewi lon poki lipu.

mi jo ala e lipu.”

jan lipu pi suli mute li toki e ni:

“sina toki ala e ni tan seme?

mi lon poka la, sina o tawa sewi ala.

mi ken ala ken sewi e sina?”

jan Puku li pana e ken.

jan Puku li pilin pona li toki e ni: “mi lanpan e ni, e ni, e ni kin! sina pona!”

jan lipu pi suli mute li toki e ni: “o lanpan e ni kin. mi jan lili la, mi olin e lipu ni.”

jan Puku li toki e ni:“tenpo pini la,

sina lili anu seme?”

jan lipu pi suli mute li toki e ni:

“a, lon, mi lili mute a,

taso, mi kama suli. sina kama kin.

taso, sina lili la, o toki tawa mi.

mi pana e lipu tawa sina.”

jan Puku li kute ala kute?

ala!

ona li lon insa pi lipu ona,

lon sike, lon linja,

lon kipisi nimi,

lon nimi!

lon kulupu nimi!

lon lipu musi.

tan ni: jan Puku li jo e lipu sin.