meli Jaka

mi lon ma kasi. mi lon tomo mi. mi lon tenpo mute a. ijo pi mute ala li kama tawa mi.

taso tenpo wan la noka li kalama lon poka pi tomo mi.

mi lukin e jan sin ni. mi lukin kepeken tenpo. mi wile sona: “sina kama ala kama lon mi tan wile sina? ijo ante li lawa ala lawa e sina?”

jan li toki tawa mi: “meli o, sina lon tenpo mute la, sina kama moli lon tenpo lili. kon li wawa. telo mute li tan sewi. ni li kama e mi lon tomo ni. o pana e pan sina e telo kasi sina!”

soweli mani sin mi li moku mute, li wile e pan mute e telo mute, taso ona li ken tawa e ijo mute. mi tawa ma ante kepeken ona la, mi ken lape lon ona.

mi lon ma kasi. mi lon tomo mi. mi lon tenpo mute a. ijo pi mute ala li kama tawa mi.

taso tenpo tu la noka li kalama lon poka pi tomo mi.

mi lukin e jan sin ni. mi lukin kepeken tenpo. mi wile sona: “sina kama ala kama lon mi tan wile sina? ijo ante li lawa ala lawa e sina?”

jan li toki tawa mi: “meli o, sina lon tenpo mute la, tenpo li nasa e lawa sina. lawa mi li nasa ala. ma mi li weka e mi, li wile ala e mi la mi kama lon tomo ni tan lete. o pali e seli lon poki seli. mi wile lape lon poka ona.”

soweli sin mi li suwi mute, li wile lape mute. ona li alasa e seli la ona li wile e seli tan noka mi lon tenpo mute.

mi lon ma kasi. mi lon tomo mi. mi lon tenpo mute a. ijo pi mute ala li kama tawa mi.

taso tenpo tu wan la noka li kalama lon poka pi tomo mi.

mi lukin e jan sin ni. mi lukin kepeken tenpo. mi wile sona: “sina kama ala kama lon mi tan wile sina? ijo ante li lawa ala lawa e sina?”

jan li toki tawa mi: “toki, meli pona o. noka mi taso en mi taso li kama e mi tawa sina. pona sina la, mi ken ala ken awen lon tomo sina lon tenpo lili?”

jan ni li pona tawa mi. mi pana e kasi tawa poki seli, li seli e ona. mi ken e supa lape tawa jan. mi pana e pan pona e telo kili pona tawa jan.

sina kama tawa tomo mi la, sina wile e pona mi. taso mi pana e pona sina tawa sina.