sitelen nasa pi ilo Nuwapenta

ilo Nuwapenta (Neuralblender) li lawa ilo pi pali sitelen. ilo mute sama ona li lon, taso ilo Nuwapenta li ante tan ni: jan ale li ken kepeken ona. jan li toki e kulupu nimi tawa ilo la, ilo li pali e sitelen sin tan nimi ni. pali ni la ona li kepeken nasin ni: jan mute li pali e sitelen pi ijo lon, li pana e nimi tawa ona, li pana e ona tawa ilo. ilo li lukin e sitelen ale, li kama sona e linja tan nimi tawa sitelen. ilo li lukin e sitelen soweli mute la, ona li sona e ni: nimi “soweli” li jo e kon sama sitelen soweli ale. jan li toki e soweli tawa ilo, la ilo li ken pali e sitelen soweli sin.

taso, ilo Nuwapenta li pali e sitelen pona lon tenpo ale ala. tenpo mute la, sitelen ona li nasa, li sama sitelen lape. jan sona li wile kepeken ona tawa sona sijelo, tawa sona mun, la ona li toki e ni: “ni li ike! sitelen nasa li ken ala pona tawa sona!”. taso, sitelen ni li ken pona tawa jan sitelen. lukin ona li nasa pona tawa jan mute, li jo e kon wan. ni la, jan mute li kepeken ilo Nuwapenta tawa ni: ona li wile pali e sitelen pi pona lukin.

mi kama sona e ni ale la, mi wile kin pali e sitelen pi nasa pona kepeken ilo ni. nimi la, mi pana e nimi tan kalama musi tawa ilo. ona li pali e sitelen pi pona mute kepeken nimi ni! nasa pi kalama musi, en nasa pi toki musi, en nasa pi sitelen lape li ken pona tawa nasa pona pi ilo Nuwapenta. sina wile e sitelen pi sin nasa la, o kepeken ilo Nuwapenta! o pana e pilin sina tawa ilo, o lukin e sitelen tan ona. ilo ni, en ilo sama ni, li ken pona mute tawa jan sitelen ale.