Details
Edit on Github
Description: tomo sona li pona ala tawa soweli lili. tomo sona li suli a. soweli lili li lili a. taso, ona li kama sona e ni: ona li lon poka pi soweli pona la, tomo sona li kama pona.
Tags: StoryWeaver level 3
License: CC-BY-4.0
Sources: storyweaver.org.in
soweli poka pi soweli lili
soweli lili li tawa tomo sona. len ona li pona, li sama suno. linja ona li sama ko pona.
ona li kama lon tomo sona la, ona li jo wawa e luka pi soweli mama.
“tomo sona li suli a! tenpo mute la mi sona ala e ni: mi lon seme.”
ona li toki e ni tawa soweli mama.
“o pilin ike ala.” soweli mama li toki e ni. “soweli mute li lon li sama sina. sina ken musi mute.”
taso soweli lili li lukin e soweli suli pi kiwen lawa sike, li pilin monsuta.
pilin ni la, ona li tawa tomo sona lili ona. soweli sona Pilu li toki e ni tawa soweli: o lon linja, o kalama musi soweli.
“muu muu muusiii
waa waa waaloo
paa paa paaliisaa
nee nee neenaa”
kalama ni li pona mute tawa soweli lili. taso, ona li sona ala e nimi ale ona. ni la, ona li pali e nimi sin.
“muu muu muumuu
waa waa waawaa
paa paa paapaa
naa naa naamaakoo”
soweli lili li kalama pona wawa. soweli ante li pini e kalama la, ona li awen kalama.
“ala! o pali ala e nimi sin! o pini e kalama!” soweli sona Pilu li toki ike tawa soweli lili.
ona li tawa e ona tawa poka tomo.
“a! a!” soweli ante li mu musi.
tenpo kama la, tenpo tawa li lon.
“o tawa sewi!” soweli sona Tamu li toki e ni tawa ona. ona li pana e sona tawa.
soweli lili li lukin e linja pipi. ona li tawa seme?
soweli lili li tawa anpa, li tawa lon monsi pipi.
“o anpa ala!”
soweli sona Tamu li toki wawa.
“a! a!” soweli ante li mu musi.
pilin pi soweli lili li pakala.
tenpo moku la, soweli li lon ala poka ona,
li toki ala tawa ona.
telo lukin ona li tawa anpa,
tawa kasi moku ona.
ni la, ona li kama namako uta.
tenpo pimeja la, soweli lili li toki
e ijo pi kalama uta, e ijo pi tenpo tawa,
tawa soweli mama.
soweli mama li toki e pona tawa soweli lili. “kalama sin sina li suwi a! tawa anpa sina li kalama lili a!”
ona li sike e soweli lili, li uta e sinpin ona. soweli lili li kama lape.
tenpo suno sin la, soweli lili
li kalama kepeken nasin pona.
tenpo tawa la, ona li tawa sewi,
li tawa anpa ala.
tenpo sitelen li lon. “o sitelen e palisa e linja sike!” soweli sona Sili li toki tawa soweli.
soweli lili li lukin e pipi waso kule. linja pimeja en linja loje en sike lili li lon lipu ona. soweli lili li sitelen e pipi ni.
ni li pona ala tawa soweli sona Sili.
“soweli lili o, mi toki e ni: o sitelen e palisa e linja sike taso! sina sitelen e pipi waso tan seme?” ona li toki ike.
“a! a!” soweli ante li mu musi.
tenpo moku la, soweli lili li taso sin, li moku e kili palisa ona.
nasa la, kalama toki lili li lon poka.
“mi wile sitelen e poki tawa telo. sina ken ala ken pana e sona?”
ona li mani lili tan tomo sona mani. soweli lili la, mani lili li lili mute a.
“mi sona ala sitelen e poki tawa telo.”
soweli lili li toki.
“taso, ale li toki e ni: sina sitelen e ona lon tenpo ni pi kama sona.”
mani lili li mu.
“ona li pipi waso.”
soweli lili li pona e sona ona.
mani lili li lukin pi suwi mute e ona.
ni la, soweli lili li sitelen lon ma.
soweli lili li sitelen e pipi waso, e poki tawa telo, e kasi suli. mani lili li kama jo e lipu kasi, e kasi kule, li pana e ona lon sitelen.
“mi tu o sitelen lawa e ni: mi lon ma kasi!” mani lili li toki e musi ken.
“mi sona e kalama musi sin!” soweli lili
li toki wawa. ona tu li tawa musi
li kalama musi soweli mani.
soweli lili li kama lon tomo la, ona li toki e ijo pi soweli poka sin ona tawa soweli mama.
“sina ken ala ken pana e selo kili kiwen lon tenpo suno kama? mi wile pana e ona tawa mani lili.” soweli lili li wile e ni.
“ken a!” soweli mama li toki.
tenpo pimeja la, soweli lili li kama lape kepeken tenpo lili. ma lape ona la, ona
li lukin e mani lili e soweli suli ale pi kiwen lawa sike. ona ale li tawa musi lon ma kasi.
“tawa, sewi, tawa, NOKA!
o kalama e mu wawa!
tawa, sewi, tawa, NOKA!
o kalama e mu lili!
tawa, sewi, tawa…”
sinpin la, soweli lili li lawa e tawa musi sin ni. ona li mu pona, li awen lape pona.