toki Polaka

Dzień dobry! - suno pona!

toki Polaka li toki suli. jan lon ma Polaka li toki e toki ni. jan Polaka mute lon ma ante li toki kin e toki ni. toki Polaka la, nimi ona li ni: „polski“ anu „polski język“

ni la, jan mute li ilo e nimi Posuka, e nimi Polaka, e nimi ante.

toki Polaka li jo e toki sama mute: toki Selonki, toki Kasepi, toki Seki, toki ante mute. toki ni li lon kulupu toki Silapi.

toki Polaka la, kalama mute li lon. ken la, jan pi toki ante li ken ala kalama e kalama pi toki Polaka. nanpa wan, ona li jo e kalama mute „s“:

s , z, dz, c, ś, ź, ć, dź, sz, ż, cz, dż

s, z, d͡z, t͡s, ʂ, ʐ, t͡ʂ, d͡ʐ, ɕ, ʑ, t̠͡ɕ, d̠͡ʑ

kin la, ona li jo e kalama pi kon nena: ę, ą [ɛ̃ , ɔ̃]

nimi mute pi toki pona li tan toki Lowasi. ona kin li lon kulupu toki Silapi. ni la, nimi mute pi toki Polaka li sama nimi pi toki pona:

• noka (noga)
• oko (oko)
• ona (ona)
• linja (linia)
• mi (my)
• palisa (palec)
• poka (bok)
• sijelo (ciało)
• tomo (dom)
• uta (usta)
• mama (mama)

sina toki e toki Polaka la, sina kepeken e wawa mute. ona li jo e nimi mute a. kin la, nasin nimi en nasin toki li nasa mute: toki Polaka li jo e kulupu nimi mute: sina kepeken e ijo la, nimi pi ijo ni li lon kulupu nimi ilo. ni la, nimi li ante, o lukin: nimi “noga” li noka. sina tawa kepeken noka sina la, sina ilo e noka. ni la, nimi ona li lon kulupu nimi ilo. ni la, sina toki ala e nimi “noga” sina toki e ni: nogą

toki Polaka li jo e kulupu nimi luka tu, taso mi wile ala pana e sona pi ona lon toki ni.

toki Polaka la, sina ken ante e ijo lili tawa ante mute kon pi linja nimi. toki Polaka li jo ala e nimi wan tawa “toki!”, ona li jo e nimi mute!

sina toki pona la, “dzień dobry!”; kon li ni: “suno pona tawa sina”

sina toki lon tenpo pi tawa anpa suno la, sina ken toki e ni: “dobry wieczór!”; kon li ni: “tenpo pi tawa anpa suno pona tawa sina”

sina toki tawa jan sin la, sina ken toki e ni: “witam!”; kon li ni: “o kama pona”

sina toki tawa jan pona la, sina ken toki e ni: “cześć!”; kon li ni: “toki!”

sina toki tawa jan pona pona la, sina ken toki e ni: “siema!”; kon li ni: “sina pilin seme?”; open pi nimi ni li ni: “jak się masz?” li “sina pilin seme?”, taso ni li suli. ni la, jan lili li toki e ni: “siemasz?”. taso, ni li suli. ni la, jan lili lili li toki e ni: “siema?”

sina toki tawa jan kepeken ilo toki la, sina ken toki e ni: “halo!”; kon li ni: “toki!” sina kepeken taso e nimi ni tawa toki kepeken ilo toki.

jan mute pi toki Polaka li lon kulupu pi toki pona. jan Keseke en ilo Sasi en kala Asi en jan Kita en pipi Motan en mi li toki e toki Polaka! lipu pi kama sona pi toki pona kepeken toki Polaka li lon kin! o lukin e ona lon lipu ni: https://tokipl.wikidot.com

Do widzenia! - tawa pona!