kalama musi pi kulupu "PVRIS"
kulupu Palisa (PVRIS) li kulupu seme? kulupu Palisa li kulupu pi kalama musi. tenpo sike luka luka li tawa la ona li kama lon. tenpo ni la kulupu li jo e jan Lin Kun (Lynn Gunn) e jan Pajan Matona (Brian Macdonald), tenpo pini la ona li jo e jan mute. jan Lin Kun li jan pi kalama musi uta, ona li pali mute tan kulupu Palisa. ona li pana e kulupu suli tu wan pi kalama musi e kulupu lili wan pi kalama musi. mi toki e kulupu Palisa e kulupu ona pi kalama musi.
mi open kepeken kulupu lili ona. ona li jo e nimi Akusi (Acoustic). ni li sin ala mute. ona li jo e kalama musi tu tu. kulupu Akusi li sin ala mute la mi toki mute ala e kulupu lili ni pi kalama musi. taso la mi kute e nasin pi kulupu Palisa lon kulupu ni. kalama musi pi kulupu Palisa li toki mute e ike pilin e utala ona. kalama musi Waki A (Akusi) (Waking Up [Acoustic]) li toki e ni: “mi pana lon tawa sijelo mi la mi pali e ijo ali.” jan Kun li toki mute e nimi ni. nimi ni li pana e nasin pi kulupu Palisa, nasin li toki e ike lawa e ike sijelo.
lon kulupu pi kalama musi Wa Nosi (White Noise), sina ken kute e nasin sama, taso sina ken kute e kalama ante. kulupu Akusi li kepeken e tenpo mute li jo ala e kalama mute la kulupu Wa Nosi li jo e mute. kulupu Wa Nosi li open kepeken kalama musi Soke (Smoke). kulupu Akusi li nasin La (Rock) lili la ni li nasin La mute. kin la sina kute e kalama uta wawa. kulupu Akusi li jo e kalama uta pi wawa ala la ni li jo e wawa. kalama ilo kin li wawa. pana pi kulupu Wa Nosi la kulupu Wa Nosi (Telu Peson) (White Noise [Deluxe Version]) li pana mute. ni la kalama musi tu wan li lon: kalama musi Ju En A (You and I), kalama musi Ensi (Empty), kalama musi Ju En A - Sipe (You and I - Stripped). mi la mi kute e kulupu Wa Nosi (Telu Peson), taso kalama musi sin li pona lili tawa mi. kalama musi sin pi kulupu Wa Nosi (Telu Peson) li pona tawa mi, kalama musi ante li pona mute.
mi olin e kulupu A Wi No A Pepon, A Wi Ni A E (All We Know Of Heaven, All We Need Of Hell). kulupu pi kalama musi ale la ni li pona mute tawa mi. mi kute sin e nasin pi kulupu Palisa, mi kute sin e kalama monsuta1. kulupu A Wi No A Pepon, A Wi Ni A E la nasin pi ike lawa li lon mute. kulupu Wa Nosi la kulupu ni li kama jo e mani lili. kulupu pi kalama musi li open kepeken kalama wan taso - mi pilin e ni: ni li sama e open pilin pi kulupu. ale li weka, ijo awen taso li ilo kalama li kalama uta. ale li weka, ijo awen taso li pilin lon ona. ni li sama e nimi ni pi kalama musi Wa Wan (What’s Wrong): “sina sona e ike mi la mi wile ala e toki len.” kulupu pi kalama musi A Wi No A Pepon, A Wi Ni A E la jan Kun li open pilin mute.
tenpo pi kulupu Usi Mi (Use Me) li open kepeken kulupu lili Alusinasijon (Hallucinations). tenpo lili li tawa la kulupu ni li kama. kulupu Usi Mi li ante e kalama pi kulupu Palisa. kulupu pi tenpo pini li jo e kalama monsuta, taso kulupu ni li jo e kalama pi tawa musi. taso la, nasin toki pi kulupu Palisa li awen. kalama musi nanpa wan li open kepeken ni: “lape ala, mi pakala e akesi pi noka ala.”
ni li toki e ni: jan Kun li lanpan2 e lawa pi kulupu Palisa. tenpo ni poka la jan Kun li toki e ni: ona li lawa e Palisa lon tenpo ale. tenpo pini la, jan li pilin e ni: jan ale pi kulupu Palisa li pali sama. mi pilin e ni: nimi ni li open pona pi tenpo sin. kalama musi Te We (Dead Weight) kin li wawa. kalama uta pi jan Kun li wawa mute lon kalama musi Kimi A Minu (Gimme a Minute) lon kalama musi Te We. lon kulupu Usi Mi (Telu) (Use Me [Deluxe]), kulupu Palisa li pana e kalama musi luka sin: kalama musi Tan Ju (Thank You) en kalama musi sama ante.
kalama musi sin li pona tawa mi, taso mi kute pi mute ala.
tenpo ni la, jan Lin Kun li jo e ijo kama. kulupu Palisa li pana e kalama musi tu, kalama musi Monsa (Monster) en kalama musi Ma We (My Way). ni li pona mute tawa mi, mi pilin pona mute tan kalama musi pi tenpo kama. ale la, mi olin e kulupu Palisa e jan Lin Kun.