nimi namako majuna[^1]

toki pona li kepeken nimi pi nanpa seme? 120? 123? 125? 137? wile sona ni li ike lili. jan ala li sona pona e nanpa nimi pi toki pona. ante la, jan o kepeken lipu pu kepeken lipu ku tawa ni. taso, nimi mute pi toki pona li pu ala li ku ala. sina sona ala sona e ni? ona li nimi namako. jan pi nanpa lili li kepeken nimi namako, taso nimi namako li awen lon.

ni la, mi wile toki e nimi namako tu. ona li namako, taso ona li majuna1 kin. nimi namako nanpa wan li “amiko.” ona li kama lon tenpo sike 2006. ona li tan jan Kipo li tan jan Elumutu. tenpo mute lon toki pona la, jan li kepeken nimi “jan pona” tan pilin pona tawa jan ante. taso, nimi “jan pona” li suli pi mute ike la, jan li wile kepeken nimi “amiko.” toki Inli la, nimi “amiko” li “friend.” toki open ona li toki Epelanto.

nimi namako nanpa tu li “sipi.” ona li kama lon tenpo sike 2007. ona li tan jan “spad0103.” o lukin e linja nimi ni: “mama li telo e ona.” taso, mi o sona e ni: “ona” li mama anu jan ante? mama li telo e jan ante la, o toki e ni: “mama li telo e ona ante.” mama li telo e mama la, o toki e ni: “mama li telo e ona sama.” toki nanpa tu li kon sama nasin pi nimi “sipi.” mi tu e linja mi la, mi tu e sipi. toki Inli la, nimi “sipi” li “reflexive pronoun.” toki open ona li toki Lasina.

mi alasa e nimi namako ni lon tenpo sike 2021. taso, ona li suli tawa sina tan seme? mi pilin e ni: nimi namako majuna li pana e sona pi pini pi toki pona. toki pona li ante lon tenpo. tenpo sike 2006 en tenpo sike 2007 la, toki pona li toki ante. pilin pi jan ante lon tenpo ante li kon pini pi toki pona. kon ali pi toki pona li suli tawa sona pi mi mute. sina o kepeken ala kepeken e nimi “amiko” e nimi “sipi?” ala, taso sona en kepeken li sama ala. sona li lon lawa li pona tawa insa pilin. kepeken li pona tawa toki jan.