tenpo pimeja ni la mun li weka

tenpo pimeja wan la mama meli en mama mije li lape pona. kalama ala la jan Majesa li kama jo e ilo lukin ona li tawa tan tomo ona.

jan Majesa li tawa poka pi telo suli la ni li pona tawa ona. kala pona ona li awen lon telo suli.

jan Majesa li tawa poka pi telo suli li toki e ni:

“kala Usili o, sina lon ni anu seme?”.

tenpo suli la ona li ken awen lon ni li lukin e ni: kala Usili li tawa sewi tan telo. kala Usili li kala pi ken tawa sewi li wile pana lukin e ken ona lon tenpo mute.

taso, lukin la kala Usili li pilin ike lon tenpo ni.

jan Majesa li toki e ni: “seme li ike? lukin la sina pilin ike tan seme?”

kala Usili li toki e ni: “sina ken ala lukin e ni anu seme? mun li lon ala!”

mun a! toki pi kala Usili li lon. tenpo ni la mun li lon ala sewi. taso, lupa suli li lon sewi.

jan Majesa li toki e ni: “taso, mi tu li lukin e ona lon tenpo pimeja pini. ona li tawa sewi tan telo suli lon sinpin mi. ken la ona li awen lon telo suli anu seme?”

kala Usili li toki e ni: “mi o kama lukin e ona!”

jan Majesa li toki e ni: “taso, suno mun li lon ala la mi ken lukin kepeken nasin seme?”

tenpo ni la kala Usili li lukin e ijo lon telo.

telo li tawa lon weka la suno lili li kama lon li weka li kama lon sin.

ona li toki e ni: “jan Majesa o, mi sona! o lon sewi pi monsi mi. mi o tawa telo tawa weka ni.”

ona li lon telo pi pana suno la jan Majesa li insa e kon li jo wawa e kala Usili li …

jan Majesa li toki e a. ona li pilin sama ni: ona li lon sewi pi suno lili mute! kala lili mute li pana e suno lon sike ona.

jan Majesa li toki lili e ni tawa kala Usili: “a! ona li seme?”

kala Usili li toki e ni: “ona li kala pi wan sijelo wan. ken la ona li pana e suno tawa nasin mi lon telo suli!”

jan Majesa li toki e ni: “sina wile ala wile pana e suno sina tawa mi? mun li weka. mi wile e suno sina tawa ni: mi wile kama lukin e ona.”

kala pi wan sijelo wan li toki e ni: “sina o wile e suno mute. mi o toki tawa kala pona mi. ken la ona kin li ken pana e suno tawa sina!”

jan Majesa en kala Usili li lon poka pi kala lili mute pi pana suno.

jan Majesa li toki insa e ni: “mun li lon seme a?”

kalama suli li toki e ni lon poka pi kute pi jan Majesa: “mi ken pana e sona tawa sina.”

jan Majesa li lukin la kala pi noka luka luka pi pipi seli li lon. suno laso mute li lon sijelo ona.

ona li toki e ni: “mi lukin e ni: tenpo pini lili la mun li tawa nasin ni.”

open la jan Majesa li pilin monsuta tan noka ona pi suli linja. taso, jan Majesa li sona e ni: kala ni li ken pana e suno li ken pona e lukin pi jan Majesa lon telo.

jan Majesa li toki e ni: “o lawa e mi tawa nasin pona.”

kala pi noka luka luka li jo e palisa luka pi jan Majesa li toki e ni: “o jo wawa e mi!”

kulupu la jan Majesa en kala Usili en kala pi wan sijelo wan en kala pi noka luka luka li tawa anpa lon telo.

ona li tawa anpa li tawa telo pi pimeja mute. taso, kala pi wan sijelo wan en kala pi noka luka luka li pana e suno wawa kin.

ona li awen lukin ala e mun.

ona li lukin e kala alasa. kala ni li jo e kiwen uta kiki. taso, jan Majesa li pilin monsuta ala.

ona li toki e ni: “toki. mi alasa lukin e mun. sina lukin ala lukin e ona?”

kala alasa li toki e ni: “mi lukin. tenpo ilo suli pini la ona li tawa lon poka pi kala mun. o tawa nasin mi!”

jan Majesa en kala pi noka luka luka en kala pi wan ijo wan li tawa nasin pi kala alasa.

kala pi pana suno li suno e supa anpa pi telo suli sama ilo suno.

jan Majesa li kama lukin e ijo pi suno mute lon anpa kiwen.

ona li mun!

mun li toki e ni: “o tawa e mi tan ni! mi ken ala tawa!”

kala pi noka luka luka li sewi e kiwen ni kepeken noka ona.

mun li ken tawa tan kiwen la ale li toki e ni: “pona a!”

kala Usili li toki e ni: “tan seme la sina lon kiwen?”

mun li toki e ni: “mi tawa ni tan ni: mi wile lukin e kala mun. ona li lon kulupu mama mi. suno mi li kama lili la mi ken ala lukin e nasin mi. mi kama awen lon anpa pi kiwen ni. sina alasa lukin e mi. tan ni la mi wile e pona tawa sina.”

jan Majesa li toki e ni: “tenpo ni la mi sona. sina lon ala sewi la sina lon ni.”

mun li uta pona li open tawa supa telo sewi.

ona li tawa tan telo li tawa sewi.

kala Usili en jan Majesa li tawa e luka li toki e ni tawa kala pona ona: o tawa pona. ona tu li tawa poka pi telo suli lon anpa suno mun.

suno lili lon telo suli li awen pana e suno lon tenpo pimeja.

O LUKIN E KALA PI PANA SUNO

sina sona ala sona e ni: soweli mute en kala mute li ken pana e suno?

jan Majesa en kala Usili li lukin e kala lili pi wan sijelo wan. ona li pana e suno tawa ni: ona li monsuta tawa kala alasa ona. ona li pilin e tawa lon telo la ona li pana e suno. tenpo la ona li pilin e telo tawa tan tomo tawa telo kin.

kala pi wan sijelo wan li jo e telo pi ken suno lon ona. kala pi noka luka luka li jo e insa sijelo pi pana suno. toki Inli la insa sijelo ni li photophore. ona mute li lon sijelo pi kala ni. kala ni li alasa e moku li pana e pona lukin tawa kala unpa ona li nasa e kala alasa ona kepeken ijo ni.

kala alasa li jo e linja lon lawa ona. ijo ni li ken pana e suno tan wan sijelo lili lon insa ona.

soweli en kasi mute kin li ken pana e suno. pipi seli en soko li ken pana e suno lili lon tenpo suno ale.