o kama jo e nimi Iso

tenpo poka la, kulupu pi toki pona li pali e ijo pi pona wawa: ona li toki tawa kulupu Iso. kulupu Iso li pali e ijo mute. ijo wan ni li ni: ona li pana e nimi lili tawa nasin toki ale. lipu linluwi¹ en ilo linluwi li ken kepeken ni tawa pali pi toki ante. toki mute li jo e nimi Iso: toki Inli en toki Sonko en toki Epelanto en toki ante mute. taso tenpo pini la, toki pona li jo ala e nimi ni.

ni li tan seme? tenpo tu pini la, kulupu pi toki pona li toki tawa kulupu Iso. tenpo nanpa wan la, toki pona li sin. ni li lon tenpo sike nanpa 2007. kulupu pi toki pona li kama suli lon tenpo pini lili. kulupu Iso li wile sona e ni: kulupu pi toki pona li awen suli anu kama lili sin? ona li toki e ni: “sina ken toki sin tawa mi lon tenpo kama”.

tenpo suli la, kulupu ni li toki ala tawa kulupu Iso. tenpo sike nanpa 2017 la, jan li pali e ni lon tenpo sin. jan ni li jan Mike Eweson (Micheal Everson). jan Mike li wile e nimi lso tawa toki pali mute. ni la, ona li pana e lipu mute tawa kulupu Iso la, lipu ni li lili li kepeken pali lili. ken la, tan ni la, kulupu Iso li toki e “ala” kin lon tenpo nanpa tu. ona li toki e ni: “toki ni li ike tawa lawa mi. jan pi mute ala en ma pi mute ala li kepeken toki pona. ni la, mi pana ala e nimi Iso tawa ona.”

tenpo pini la, kulupu Iso li wile ala e toki pona. tenpo ni li ante tan seme? nanpa wan la, lipu tawa kulupu Iso li suli li jo e ijo mute pi toki pona. tenpo pini la, jan li pana e lipu lili pi ijo lili tawa kulupu Iso. kulupu Iso li lukin ala e pona ale pi toki pona. ni li ante lon tenpo ni. nanpa tu la, kulupu Iso li toki tawa kulupu pi toki pona e ni: “sina ken toki tawa mi lon tenpo poka. mi kute sin tawa ona lon tenpo ni.” tan ni la, jan pi toki pona li pilin pona tawa pali pi lipu sin. jan pi toki pona li pali lon kulupu wan li pali e lipu suli pi pona mute. ona li jo e lipu lili luka luka luka li toki e ijo ale pi toki pona. ona li toki e suli pi kulupu ni e pali pi kulupu ni e toki pi toki pona tan jan pi kulupu ante. jan Pensa li pana e ni tawa kulupu Iso. jan ale li awen tawa toki pi kulupu Iso.

tenpo suno nanpa 2022-01-13 la, kulupu Iso li wile e namako. ona li toki e ni: “toki pona la, nasin toki en nimi toki li ken ala ken toki e ijo ale sama toki ante? nimi pi toki pona li ken toki e nimi ale pi toki ante lon lipu nimi anu seme? lipu pi toki pona li suli ala suli, li awen ala awen kama suli? kin la, jan seme li lawa e toki pona? mama ona li lawa la, ni li pona ala tawa lawa mi. kulupu o lawa. suli la, mi sona ala e ni: jan mute pi toki pona ala en lipu mute pi toki pona ala en sona mute pi toki pona ala li toki ala toki tan toki pona? sina pana e nanpa lili taso lon ni. a, o pana e ni ale lon tenpo suno tu. ante la, sina o awen tawa tenpo sike kama.” ni la, kulupu pi toki pona li pali e lipu sin, li pana e sona mute kin. lipu lili luka luka tu wan li lon ona, li pana e sona mute. jan ale li awen sin.

tenpo suno nanpa 2022-01-24 la, kulupu pi toki pona li kama jo e toki pi pona wawa tan kulupu ISO: ona li wile pana e toki lili tawa toki pona! ni li kama tawa mi mute tan jan Sonja lon ma pona pi toki pona. pilin pona mute en musi suli mute li lon ma ale pi toki pona! toki pona li kama lon tenpo suli pini. taso, toki pona li kama lon sin. tenpo ni la, ma ale li ken sona e toki pona kepeken nimi lili pi kulupu Iso. ale li pona mute!