toki sama pi toki pona — nanpa tu wan

toki pona li jo e toki sama mute. ni li lon tan seme? jan li olin wawa e toki pona la, jan li wile kin ante e toki pona tawa pilin ona. toki sama pi toki poma li kama tan pali pi jan Sonja, taso ona li jo e nasin ante e kon ante. o lukin e toki sama sin pi toki pona.

tenpo pini la, mi pana e sona pi toki ni: toki Pon Wen (Bon Wen) en toki IO en toki pona epansa. tenpo ni la, mi pana e sona pi toki Tokipinglish e sona pi toki Ta Ti.

toki Tokipinglish li kama lon tenpo sike 2007. jan ala li sona e jan pali pi toki ni. taso, ona li wile e ni: toki Inli en toki pona li kama wan. sona lili pi toki Tokipinglish li lon. sona mute ona li weka. ni taso li awen: toki Tokipinglish li kepeken nimi tan toki pona tan toki Inli tan toki ante kin. sona ante ali li weka. ni li ike, taso mi ken ala kama e ona.

toki Ta Ti li tan jan Ma Tonson (Marq Thompson) li kama lon tenpo sike 2009. jan Ma Tonson li open pali e toki Ta Ti lon tenpo sike 2004. toki Ta Ti li jo e nimi 98 taso. nimi wan li tan toki Epelanto. nimi 94 li tan toki Inli. nimi tu tu li nimi sin. kin la, nimi ali lon toki Ta Ti li jo e kalama wan taso. o lukin e ona: “be” (sama nimi “poki”), “bla” (sama nimi “pimeja”), “fai” (sama nimi “seli”), “lu” (sama nimi “lupa”). nimi jan pi toki Ta Ti li ni: “mi” (sama nimi “mi”), “yu” (sama nimi “sina”), “hi” (sama nimi “ona”). nimi “su” lon toki Ta Ti li musi. nimi “su” li jo e kon ali. jan li wile toki e ijo nasa la, ona li ken kepeken nimi “su.” (kin la, nimi “su” li kama tan nimi “Smurf” lon toki Inli).

kin la, nimi “li” lon toki Ta Ti li “jo.” nimi “e” lon toki Ta Ti li “ji.” mi pali e linja nimi kepeken toki Ta Ti. kon ona li “ona en sina li moli e pipi.”

hi plu yu jo fi ji ni he hu kra no ha.

tenpo kama la, mi pana e sona pi toki sama ni: “Ta Lo Ne” en “Puna” en “Pulu.”