tenpo ni la, jan mute li jo e soweli tomo. taso, soweli tomo nasa mute li lon. mi la, soweli tomo mi li pipi… mute. mi jo e pipi lili pi kulupu suli, taso kulupu ona li lili lon tenpo ni.

jan mute li ken ala jo e soweli tomo suli. taso, ona li wile jo e soweli tomo. ni la, ona li kama jo e soweli tomo lili. sina ken ala luka e pipi, taso sina ken lukin e ona. pipi kulupu li pona mute tawa jan mute tan ni: ona li jo e kulupu. kulupu ni li pona li suli. jan mute li toki e ni: kulupu pi pipi kulupu li sama kulupu jan!

mi la, pipi kulupu li soweli tomo pona tawa jan pi tomo lili. taso, sina wile jo e ona la, sina o jo e tenpo mute tawa ona! pipi li lili, taso pipi li pali mute tawa sina.

nasin seme la, sina kama jo e pipi kulupu?

open la, o pilin e ni: sina jo e tenpo mute anu seme? sina jo e tenpo mute la, o open. sina o kama jo e poki lili tawa pipi mama, e len, e ilo tawa ijo lili. nanpa wan la, o pana e telo lili tawa poki. nanpa tu la, o pana e len. sina pini la, poki sina li sama ni tawa lukin:

tenpo ni la, mi mute o alasa e pipi mama. tenpo wan pi tenpo sike la, pipi mama li tawa. tenpo ni la, alasa li open. o kama sona e tenpo ni tawa ma ni! tenpo tawa pi pipi mama la, sina tawa kepeken poki lili sina. sina o lukin, o alasa e pipi mama. pipi mama li jo ala e luka ona pi tawa kon la, ona li ken jo e pipi lili. sina lukin e pipi mama ni la, o alasa e ona, o pana e ona tawa poki sina.

awen

sina jo e pipi mama wan lon poki sina la, sina o awen. o awen. o awen lon tenpo mute. sina o pana e poki tawa ma pi suno ala. sina o pana ala e moku tawa ona. sina o awen taso. tenpo kama la, pipi mama li pana e pipi lili. pipi lili li lon la, o awen lon tenpo esun tu. tenpo ni li pini la, sina ken pana e moku tawa ona. sina ken pana e pipi (moli) lili anu ko suwi tawa ona. o pana ala e moku mute tawa ona tan ni: ona li moku ala e moku ale la, moku li jaki.

kulupu li kama suli

kulupu sina pi pipi kulupu li kama suli la, sina o pana e ona tawa poki suli. poki ni la, sina ken pana e ijo mute, o musi! sina wile ala e ni: pipi li ken weka tan poki ona. ni la, sina ken pana e ko anu telo lon selo poki.

sina wile ala e pipi la, ni li pona kin. sina ken pana e ona tawa ma kasi. ma ni la, ona li ken pali e tomo sin a.