tawa pi poki monsi pi ma Asija nanpa luka wan: ma Tawi en ma Laso (Laos)

lipu ni la mi toki lon ma tu tan ni: ma Tawi en ma Laso li sama mute. ante suli li tu taso. nanpa wan la ma Tawi li suli. ma Laso li lili. nanpa tu la tenpo pini la ma ala li jo e ma Tawi. taso tenpo pini la ma Kanse li lawa e ma Laso.

ma Tawi en ma Laso li ma musi li ma pona. ma Tawi la kulupu lili pi nasin sewi Isilan li lon nasin seli, taso jan ante pi ma Tawi li jan pi nasin sewi Puta. jan mute pi ma Laso kin li kepeken nasin sewi Puta. lon nasin ale la jan pi ma Tawi en jan pi ma Laso li suwi li pona. kin la ma tu ni li jo e toki pi sama mute. toki Tawi la ona li jo e kalama suwi li pona kute mute tawa mi. taso ona li ike mute pi kama sona a! nimi pi toki Tawi li ken jo e kalama luka a (toki Sonko li jo e kalama tu tu)! jan li kalama ike, la jan ante li ken ala sona! nasin sitelen kin pi toki Tawi li pona lukin, taso ona li ike mute tawa sitelen tawa lukin.

mi la ijo tu li pona nanpa wan lon ma Tawi lon ma Laso. ijo pona nanpa wan li tomo pi nasin sewi Puta li kiwen jan suli pi jan Puta. ona li pona lukin li jo e kon sewi wawa tawa mi. pana lukin la ma tomo Panko (ma tomo lawa pi ma Tawi) li jo e tomo Puta pi Kiwen Laso Jelo (the Temple of the Emerald Buddha) e jan Puta pi supa lape pi suli mute (Wat Pho). ma tomo Ajutaja en ma tomo Sukotawi la tomo pi nasin sewi Puta en nena suli pi nasin sewi Puta li mute. ona li majuna¹ li pona lukin mute. ma tomo Sanawi (Chiangmai) kin li jo e tomo mute pi nasin sewi Puta pi tenpo pini.

ijo pona nanpa tu li laso jelo. ma Laso li jo e nena suli e ma kasi suli pona. ma Tawi li jo e ma mute pi insa telo suli e ma pi kasi suli. ma pi insa telo ni li jo e poka telo pi pona mute. ma Tawi la laso jelo en ma pi insa telo suli li lon nasin seli. ma tomo pi tenpo pini li lon ma meso² lon nasin lete (ma pi kasi suli li lon nasin lete kin).

ma tomo lawa pi ma Tawi en ma tomo lawa pi ma Laso li ante mute. lon la ona tu li jo e telo tawa suli e tomo musi pi tenpo pini, taso ma tomo Panko li suli mute li jo e kon jaki. ma tomo Wensijan (Ventiane) li suli ala li lape lili. kin la kipisi³ insa pi ma tomo Panko li jo e tomo suli sin mute.

ma Tawi la tawa mi la ma tomo pi pona nanpa wan li ma tomo Ajutaja. tenpo pini la ona li ma tomo lawa pi ma Tawi. ma tomo Nonkawi (Nong Khai) kin li pona tawa mi. ona li lon nasin lete pi nasin pi kama suno. ona li lon poka pi telo tawa Mekon. poka telo ante li lon ma Laso. lon la tan ma tomo ni la ma tomo lawa pi ma Laso li weka ala. telo tawa Mekon li suli mute. ona li kama tan nena suli Imalaja li tawa insa pi telo suli Sonko pi nasin seli lon ma Wije.

ma Laso la ma tomo pona pi nanpa wan li ma tomo Luwan Papan (Luang Prabang). ona li lon insa pi telo tawa tu. ma kasi pona li sike e ona. kin la ona li jo e tomo pi pona lukin pi tenpo pini. ni li tomo pi nasin sewi Puta li tomo pi nasin Kanse. ma Laso la nasin Kanse li lon moku kin. pana lukin la jan pi ma Laso li moku e pan Kanse mute e telo seli pimeja pi nasin Kanse.