tenpo suno pali

tenpo suno pali li lon tenpo suno nanpa wan pi tenpo mun nanpa luka. ona li lon ma mute. tenpo suno ni la, jan li tawa utala li wile e lawa pali pona sin.

tenpo pini mute (1856) la, ma Oselija la, jan pali li tawa utala tan ni: ona li wile pali lon tenpo suli luka tu wan taso. ma Oselija la, tenpo kama la, ona li pali kin e tawa utala.

tenpo sike mute li pini. taso tenpo mute pini kin (1886) la, ma Mewika la, jan pali li tawa utala kin. ona li pini pali tan ni: ona kin li wile pali lon tenpo suli luka tu wan taso. tawa utala suli ni li open lon ma tomo Sikako (Chicago). taso, jan li tawa utala lon ma tomo mute pi ma Mewika.

tomo pali esun wan lon ma tomo Sikako la, kulupu lawa esun li pini e pali pi jan mute a tan ni: jan pali li tawa utala. kulupu lawa esun li wile e jan pali sin mute, taso ona li kama ala jo e jan pali sin mute.

tenpo suno kama la, jan pi nasin lawa en jan pali pi tawa utala li utala. utala ni la, jan pali tu li moli. tenpo suno kama la, utala li kama suli. ilo pi wawa suli li pakala. ilo ni li moli e jan wan pi nasin lawa. jan ante mute li moli lon utala suli kama. tenpo sike kama la, tenpo suno nanpa wan pi tenpo mun nanpa luka li tenpo suli kulupu pi jan pali.

ma Mewika en ma Oselija ala la, tawa utala suli li lon tenpo pini. tenpo pini mute (1920) la, ma Nijon la, tawa utala suli li lon tan ni: jan li wile pali lon tenpo suli luka tu wan taso. ni li lon ma tomo Tokijo. tenpo kama la, tawa utala sin li lon. taso, tenpo ni la, jan li tawa utala taso ala lon tenpo suno pali.

ma Tosi la, tenpo pini la, tenpo suno pali li lon, li lon ala. tenpo ni la, ona li lon kin.

ma mute la, tawa utala li jo e utala ala. taso, tenpo pi mute lili ala la, tawa utala li kama utala.

ma mute la, jan li tawa utala lon tenpo suno pali. kin la, tenpo suno pali li tenpo suno pi pali ala. ma ante la, jan li toki suli, li pali e ijo kulupu ante.