toki! mi pali e toki musi sin kepeken nasin ni: mi kama jo e nimi tu wan pi ijo ni: nimi nanpa tu li sama pini pi nimi nanpa wan li sama open pi nimi nanpa tu wan. o lukin e ni: …X X X… nimi tu wan ni li nimi lawa pi toki musi. taso tenpo ale la nimi lawa li jo ala e waleja¹. tan ni la mi pali e toki musi pi pana waleja tawa nimi lawa ni.

pipi pi pilin

pipi li lon. pipi ni li jo e selo loje wawa e ijo lili pimeja, li sijelo lili, li tawa lon ma. taso ijo kama li lon ona kin: pilin. ni li lon ala lawa jan lon tenpo mute.

tenpo suno ale la pipi li pali wawa, ona li lukin e moku ona, li kama jo e ijo e kasi lili e jaki ma mute li pana e ona tawa tomo ona. tomo la ona li pali e selo e lupa e supa e nena. pali ni la pilin ona li pona a.

pipi li wile mama e pipi sin. la ona li tawa pipi ante. pipi tu ni li unpa li open mama. tenpo kama lili la kili pipi mute li kama lon. pipi suli li pana sona tawa ona sin. pilin pipi lon tenpo ni li lon, li pona.

suno wan la, pipi li pana sona tawa kili ona e nasin pali, li pali; ona ale li wawa. taso, pipi li tawa lon nasin ma suli la, jan lili ike li moli e pipi kepeken noka tan pilin wawa ona, li mu musi tan ni. pipi li moli. pilin pi pipi ni li moli. taso pipi kili en pipi mama ante li pilin ike.

jan lili ni pi nasa ike li ken moli e pipi, ona li jo e wawa. taso jan sona ala li ken pali e pipi. pipi li kili ma, sama jan. pipi li lon kon, li konwe², sama jan. pipi li pilin, sama jan. ni la, sama jan la, lon ona li suli. o moli ala e pipi e soweli ante, o olin e konwe ona. pini.

ilo o open

ilo mi li pali pona lon tenpo mute. ilo mute li lon jo mi: ilo sona mi li tawa linluwi³, li nanpa, li pali li jo e lipu mi. ilo ante lon mi li pana e nimi tawa lipu kepeken telo pimeja, li kama lon e lipu pi ilo sona mi. kepeken ilo luka la mi ken toki tawa jan pi poka ala. tomo tawa li ilo li ante e ma mi lon wile mi. ilo ale ni li wawa, li pona e lon mi.

taso tenpo la ilo li pali ala. ona li a pali ala a! ken la ni li suli ala tawa mi tan ni: mi jo e tenpo mute, li ken lukin e pakala ilo, li ken pona e pakala, li li li. mi sona ala e pakala la, mi ken wile sona tan jan sona a.

TASO, ken la, mi jo ala e tenpo e wile e e e! ni la ilo mi li ike mute li pana e pilin pi ike mute, e pilin utala wawa tawa mi tan ni: ona li ike ni a li nasa li pali ala! mi toki wawa a! ilo o open! pilin utala wawa la mi pana wawa e luka tawa ilo tawa ni: ona o pakala a. mi pana wawa e luka e noka e lawa e ijo ante mute tawa ilo a!

pini la ni li pona ala tawa mi li pona ala tawa ilo. tan ni: ilo li pakala lon tenpo pini, li awen pakala lon tenpo mi. luka en ijo ante li pakala kin li pilin Awa⁴.

ni la o pilin ike ala lon pakala ike ilo. o awen pona sama lape, o ike wawa ala. ilo li ike a lon tenpo, taso sina ike e ona la, pona li lon ala. ni la o toki tawa jan sona, ona li ken ante. ken la sina kin ken pona e ona. ale li pakala la ni li suli ala kin: ona li ilo taso! sina en ilo o pona.

pini