Details
Edit on Github
License: CC-BY-SA 4.0
Sources: www.youtube.com docs.google.com wikisource.org
Notes: replaced unusual "j., k." abbreviations with the full names
nasin Puta
jan Lakuse: toki! jan ale o. mi jan Lakuse. ni li kalama sin. jan ante seme li lon kalama toki? a a. jan Tepo o toki.
jan Tepo: mi jan Tepo. mi lon. a mi ale li kama pali e kalama anu seme? jan Kala o, sin kin li lon. o toki.
kala Salan: toki a. mi jan Kala. mi jan Salan. mi kala. a a.
jan Lakuse/jan Tepo: kala Salan!
jan Tepo: mi mute li tawa sina, a… lon la, mi ale li lon supa lape, sama.
kala Salan: lon. mi lon supa lape… pilin lape a li lon.
jan Lakuse: lon. taso…
jan Tepo: ni li nasin.
jan Lakuse: mi kama toki e ijo. a, kala o. sina kama pana e sona tawa mi tawa jan Tepo anu seme? a sona pi nasin Puta.
kala Salan: lon. mi ken pana e sona lili. taso, tenpo nanpa wan la mi wile toki a e ijo nasa, e ijo wawa. toki Epanja la nimi Puta li nimi ante a, li nimi ike mute a. ale: a a a.
jan Lakuse: nimi seme?
jan Tepo: sona.
kala Salan: ona li nasa lili a. mi lon ma Akensina li toki Epanja. mi toki e nimi “nasin Puta” la ona li nasin pi meli unpa.
jan Tepo: a a!
jan Lakuse: aaa!
jan Lakuse: nasin Puta! ni li lon… nimi ike.
jan Tepo: a. taso toki pona la ni li lon ala anu seme?
jan Lakuse/kala Salan:: lon.
kala Salan: toki pona la ike ni li lon ala. taso ona li musi lili li nasa lili. ale: a a a.
jan Lakuse: lon. sina tan ma Mewika li tawa ma Akensina li n… tenpo kama la sina tawa ma Mewika sin anu seme? … li pali seme? tan seme la mi wile e ni: sina toki e ijo pi nasin Puta? ken la o toki e ona.
kala Salan: a a. lon. ni li ken. mi kama tawa ma Akensina la mi wile kama sona lon tomo sona suli li wile kama sona e nasin jan e sona pi nasin jan. taso, mi kama sona kin e nasin pi jan Puta e nasin sewi… a ona li ken nasin lon. jan li wile awen pona la ona li ken kepeken nasin ni: ni li nasin sona ala. sama tomo sona. taso mi la nasin ni li suli, la mi lon tomo sona… taso mi kama sona e ni: “a mi lon tomo sona. taso ken la nasin pi jan Puta anu nasin sewi ni li suli a tawa mi. “ken la nasin pi tomo sona li suli ala. ona li… suli lili. ona li suli nanpa tu. “nasin pi jan Puta li suli nanpa wan la ken la mi o tawa sin tawa ma Mewika, “o awen lon tomo pi nasin mi, pi nasin nanpa wan.” a.
jan Lakuse: lon… ni li kama lon tenpo sike kama anu seme?
kala Salan: lon. taso tenpo pini la mi pilin e ni: “a tenpo mun kama la mi tawa. “mi tawa ma Mewika la mi ken awen lon tomo.” taso tenpo ni la mi ante lili a. mi pilin a e ni: “ken la mi o awen lili o pini e sike ni pi tomo sona… “la sike li pini la mi ken tawa ma Mewika li ken awen lon tomo.” ni la mi pini pona. mi wile ala pini ike li wile ala tawa weka pi pini ala. mi o pini lili e tomo sona.
jan Lakuse: a, lon.
kala Salan: ni la ale li pini pona li ike ala.
jan Lakuse: lon. ni la sina wile kama sin lon tomo sona la sina ken… sina kama sin li ken pali pona, li ken awen e pali.
kala Salan: lon. lon la kulupu mama mi li pilin a e ni: “a sina wile tawa weka la “sina o pini.” ni la mi toki e ni: “mi ken pini a e sike sona ni. mi ken pini lili. mi ken kama lukin. mi sona ala e kama la mi ken lukin. mi ken kama sona. taso tenpo li kama toki a e pali mi.
jan Lakuse: ni la, n sina open e sona sina pi nasin Puta lon tenpo seme? lon tenpo pi ma Akensina, anu lon tenpo pi ma Mewika, anu…
kala Salan: ala. lon la mi jan lili la mi open kama sona. mi jan lili la mi kama sona lili. tenpo ale la mi alasa lili e nasin li wile kama sona e nasin ante, li wile kama sona e ma, e nasin ma, la mi jan pi lili mute a, la mi alasa e nasin li kama lukin e nasin pi jan Puta. taso nasin li suli a. sona mute li lon la mi ken ala sona pona e nasin… mi jan lili la mi ken ala sona pona. ni la mi kama sona li lukin la mi pilin e ni: “a ni li nasin pona. ni li suli tawa mi.” taso mi jan lili la mi… mi jan lili [la] mi ken ala awen lon nasin ni kepeken sona mute tan ma Mewika. mi lon ma Mewika la mi pali e ijo ante. mi lon tomo sona pi jan lili la nasin li lon. mi sona e nasin pi jan Puta. taso ona li suli ala tawa mi. taso mi kama jan suli la mi awen lukin e nasin ante. mi lukin mute e nasin Dawi, anu nasin pi ma Sonko. mi lukin mute e nasin pi ma Sonka la mi pilin e ni: “a nasin ni li sama nasin pi jan Puta. taso ona li ante lili a. “ken la ona li ken pona tawa mi.” ni la tenpo mute la mi jan pi lili… ala. mi jan suli anu jan suli lili la mi awen lukin e nasin pi jan Puta. taso tenpo mute la mi lukin e nasin pi ma Sonko, e nasin Tawi e nasin ale ni pi ma Sonko, la ni li lon. taso sama la mi kama suli lili la mi toki e ni: “a. mi wile awen lon supa li wile wan e lawa.” mi wan e lawa kepeken kon insa kepeken kon weka. ni la mi awen lon supa li wan e lawa li insa e kon li weka e kon, li insa e kon li weka e kon, li insa e kon li weka e kon, la mi kama pilin e ijo nasa a. lawa mi li kama wawa li kama wan. kon li weka… [la] pilin pona mute a li kama tawa sijelo mi la mi toki e ni: “a ni li seme a? mi insa e kon li weka e kon. taso tenpo li kama li kama li kama la sijelo mi li kama pona mute. lawa mi li open a.” la, mi lukin kepeken ilo linluwi li lukin e lipu ale li toki e ni: “a. mi wan e lawa la mi pilin nasa mute a. pilin pi pona wawa li kama tawa sijelo mi. lawa mi li kama wan… ni li seme a. mi sona ala. mi lukin la mi kama sona e ni: a, nasin pi jan Puta li toki a e ni: “ni li lon. “jan li ken awen li ken insa e kon li ken weka e kon, “la sijelo ona en lawa ona li kama wawa.” ni la mi jan lili la mi pali e ni li lukin e sona la mi kama sona e ni: “a nasin pi jan Puta li toki e ale ni.” ni la mi open kama sona mute a e ijo ante pi nasin Puta. taso mi kama tawa ma Akensina la mi kama lukin sin e nasin pi jan Puta. tenpo suli la mi lukin ala. mi lukin lili. mi toki insa e ni: “a. nasin pi jan Puta li suli a tawa mi. taso mi o tawa tomo sona… “mi o kama sona… mi o kama pali mani la ken la ni li… “nasin li lon. taso mi o awen alasa e nasin mani mi. nasin sona ale.”
jan Lakuse: n, n.
kala Salan: ni la mi kama tawa ma Akensina li open lon nasin pi tomo sona suli. taso mi awen lukin li lukin sin e nasin pi jan Puta la mi toki a e ni: “a nasin ni la mi pilin pona. tenpo pini la ona li suli tawa mi. “tenpo ni la ona li kama suli lon tenpo sin.” la mi lukin sin e nasin pi jan Puta, li awen insa e kon li weka e kon, li awen lon supa li pona e pali mi li wile awen kama sona, la mi kama sona la mi pali la mi kama sona e ni: nasin ni li nasin mi, li nasin suli a tawa mi.
jan Lakuse: wa…
kala Salan: ona li pona mute a e lawa mi… ona li pona mute a e ale mi la mi o awen lon nasin ni. ni li open. ni li…
jan Lakuse: ni li sona wawa. sina kama sona e nasin sina lon tenpo mute. taso tenpo ni la ona li kama anu seme. tenpo mu— n. ken mute la jan li toki e ni anu seme: “mani li lon ala. jan la ona li ken ala sona pona e nasin ona tan ni: “ona o alasa e mani. ona o alasa e moku. “ona o alasa e nasin, anu seme.” taso tenpo ni la sina lon ma Akensina la sina ken insa e kon li ken weka e kon li ken sona pona e ni: a, sina wile pali e ni.
kala Salan: lon! lon. taso mi jan nasa lili a. mi jan lili la mi pilin e ni: “a mi wile ala jo mute.” mi…
jan Lakuse: a a. lon la sina toki pona anu seme?
kala Salan: a a lon. mi toki pona la ni li lon. mi jo e lili la mi pilin pona a. mi wile ala jo e ijo ale. mi wile jo… mi jo lili la mi pilin pona a! ijo lili li lon. taso ni li pona… la mi open alasa lili e nasin li lukin e nasin pi jan Puta, la mi kama sona e ni: a. jan nasin pi jan Puta li awen lon tomo li awen lon kulupu pi nasin wan… la ona li jo ala. ona li jo e len taso, li jo e poki moku, li jo e ilo kipisi, li jo e len lili pi telo pona. ni la jan nasin li kepeken len. ni li len ona. taso ona li len pi jaki lili. ona li len pi pona lili a. la ni li lon: poki moku la jan nasin pi jan Puta li kepeken mani ala. ona li mani ala. taso ona li toki a e ni: “a. mi jo e poki moku la jan li ken pana e moku lon poki mi “la mi moku e moku ale. “jan li pana e moku lili la mi moku. jan li pana e moku mute la mi moku. “jan li pana ala e moku la mi moku ala.” ona li ken ala.. ona li ken ala kepeken mani. ni la jan li pana e moku la ona li moku e pana. ni la ona li jo e len. ona li jo e poki. ona li jo e ilo kipisi. ni la ona li ken kipisi e linja lawa. ona li… lawa li jo ala e linja. tawa la ona li jo e len lili. ni la, ni li kama tan tenpo pini: tenpo pini la jan nasin pi jan Puta li wile moku e telo la, telo li ken jaki mute a. ni la ona li jo e ilo lili. ilo li ken pona lili e telo tan nasin telo… la ona li ken moku. ni la len ilo pi len lili li lon. ni la ona li ken pana e ilo lili lon telo la ona li ken moku e telo. taso tenpo ni la ona li ante e ante li moku e telo.
jan Lakuse: a!
kala Salan: …pona. telo li kama pona… tan kulupu pi ma tomo. taso tenpo pini la ona li kepeken ilo lili ni la jan li awen kepeken li awen jo.
jan Lakuse: aa!! lon la, ma tomo li kama pakala la sina ken awen moku e telo pona anu seme?
kala Salan: lon. a a.
jan Lakuse: ni li pona…
kala Salan: ni la, ni li nasin. taso jan ma li suli la jan mute li pilin e ni: “a, nasin pi jan Puta li suli tawa mi li nasin sewi.” taso ona li jo e ijo mute a. ni la jan mute li ken awen lon nasin kepeken nasin ante. jan ale li jo e nasin wan. taso jan wawa… jan pi nasin taso la, ni li nasin. nasin pi ijo lili.
jan Lakuse: nasin pi ijo lili!
kala Salan: lon.
jan Lakuse: lon toki kala la sina toki e nasin pi ijo lili… lon nasin Tawi kin. a… n. sina toki e ni anu seme: nasin Tawi li tan ma Sonko. kin la mi sona e ni: nasin Puta la kulupu mute li lon ma Sonko. taso kin la kulupu ante li lon ma… ma Nijon, ma ante… mi weka e sona pi nimi ma mute… taso…
kala Salan: lon.
jan Tepo: a, ma Palata anu seme…
jan Lakuse: Palata! sina sona! jan Tepo, a a
jan Tepo: a a a!
jan Lakuse: a, lon. mi tawa ma ante mute. nasin seme la sina kama wile e nasin wan taso lon nasin Puta?
kala Salan: a, “nasin seme la mi alasa e nasin pi ma wan taso?” anu seme?
jan Lakuse: anu, kulupu wan… sina kama lon ?? pi kulupu wan anu seme… li wile tomo lon kulupu wan ni taso.
kala Salan: a.
jan Lakuse: kin la tomo ante mute li lon. sina wile kulupu lon tomo ni pi wile sina tan seme?
kala Salan: a. mi… lon la kulupu ni li tan… kulupu kama mi li tan ma Tawi. ma Tawi en ma Kanpusi en ma La… ma mute a li lon.
jan Lakuse: lon.
kala Salan: toki pona la nimi li ken nasa mute a. taso. nimi ma. taso ma Pimasija la ma poka pi ma Tawi la nasin pi jan Puta li nasin wan. ona li nasin Telawata. nasin Telawata pi nasin Puta. nasin pi jan Puta la nasin… anu kulupu nasin tu li [lon]. kulupu nasin suli tu li lon. kulupu Telawata en kulupu Mawejana. kulupu Telawata li pana e nasin pi jan Puta pi tenpo pini. taso kulupu Mawejana li pana e nasin pi jan Puta tan ma Sonko, tan ma Nijon, tan ma Po, la ona li pana e nasin pi jan Puta. taso nasin ni li lon ma ante. ona li nasin pi ante lili. ona li sama ala nasin pi jan Puta pi tenpo pini. ni la ma Tawi la kulupu nasin Telawata li lon, la ni li nasin mi. kulupu ale li ken pona tawa jan mute a. taso mi la kulupu Telawata li pona tawa mi. ni la, ni li nasin mi, la mi tawa ma Mewika li alasa li toki tawa tomo mute, la mi kama sona e ni: “a. tomo pi pona mute a li lon. “li tomo pi kulupu ni (kulupu Telawata).” la mi toki lili tawa ona kepeken ilo, la mi kama sona: “a ni li tomo pi pona mute a.” jan li pana e sona mute. sona li pona mute a li tan jan suli, la ona li pona tawa mi. taso ona li kama tan ma Tawi.
jan Lakuse: ma Tawi. a… n, nasin Puta la kulupu tu li lon: nasin majuna - nasin Telawata… a, kulupu Telawata li kulupu majuna. a, kulupu Majewana li kulupu sin…
jan Tepo: a. Nawejana anu seme? kulupu Nawejana.
kala Salan: lon. kulupu… mi toki e nimi Mawejana.
jan Tepo: Mawejana.
jan Lakuse: a…
jan Lakuse: kulupu sin en kulupu majuna, a a.
kala Salan: mi sona ala e nasin pona…
kala Salan/jan Tepo: Mawejana - majuna..
jan Lakuse/jan Tepo: a!
kala Salan: taso, lon. ken la kulupu tu ni li ken suli. kulupu… a mi o pana e sona lili. jan Puta li lon. tenpo pini la jan Puta li lon li pana e sona la ni li kama. taso tenpo mute li kama la… tenpo pini mute a la jan Puta li lon, li awen la tenpo ni la nasin mute li kama tan sona ona. ni la kulupu nasin Telawata… nimi ni li nasin pi jan majuna. Telawata li nasin pi jan majuna.
jan Tepo: n.
kala Salan: nimi Telawata.
jan Tepo: ni li kon nimi.
kala Salan: li kon! lon. kon nimi Telawata li “nasin pi jan majuna”.
jan Tepo: a. nasin open.
kala Salan: lon. ona li sama nasin open. taso ona li nasin open ala. ona li ante lili. ona li… tenpo mute li kama - ona li ante lili. taso jan pi kulupu Telawata la nasin open li suli a.
jan Tepo: nn.
kala Salan: nasin pi jan Puta pi tenpo pini li suli a. nasin Mawejana… anu kulupu Mawejana la, ona li toki e ni: “tenpo pini la jan poka li pana e nasin tawa jan mute, “taso… lon la… ona li pana e nasin len…
jan Lakuse: aa!!!
kala Salan: “tawa kulupu lili!” jan pi mute lili taso li kute e nasin len, la nasin len - sona len [pi jan Puta] li lon.
jan Tepo: wa!
kala Salan: sona len la, nasin suli li lon. nasin open pi jan Puta la jan li weka e jo, li kama insa e kon li weka e kon, li kama pali pona, la ona li ken weka e pilin ike ale. ona li pilin ike ala. taso, ona li toki e ni: “sona len la jan li weka taso ala e pilin ike ona. “ona li kama sama jan Puta li weka e pilin ike tan ma ale tan jan ale!”
jan Lakuse: a!
kala Salan: “ona li weka taso ala e pilin ike ona. “ona li weka e pilin ike ale tan jan ale! ni la ona li kama jan Puta.”
jan Tepo: wa!
jan Lakuse: kama sewi anu seme?
kala Salan: ona li kama sama jan Puta. ona li kama sama jan sewi. sewi ala… taso ona li kama sama jan sewi, li weka e pilin ike ale tan jan ale, tan ni: ni li suli. ni li weka e pilin ike mute. taso sina wile weka taso e pilin ike sina la ni li lili. ona li suli ala. ona li weka e pilin ike mute. ona li sina taso. ni la sona len la… jan Puta li toki e ni: “sina ken kama sama mi li ken weka e pilin ike pi jan ale!” la ni li nasin pi kulupu Mawejana.
jan Lakuse: a…
kala Salan: ni li… sina toki a, jan Lakuse. ni li kulupu Sen… kulupu Soto… kulupu mute a, lon ma Sonko, lon ma Nijon, lon ma Po.
jan Tepo: sona len a.
jan Lakuse: len.
jan Tepo: a, wile sona lili: nimi pi kulupu ni li tan toki seme?
kala Salan: a… a. “Telawata” li kama tan toki Pali… ona li…
jan Tepo: a toki Pali. lon, lon. mi sona e ni.
kala Salan: lon. toki Pali. taso ona li pali. ona li toki pi ma Palata. ona li sama toki…
jan Lakuse: Kita?
kala Salan: (toki Inli) Sanskrit?
jan Tepo: Sansita anu seme? T/ jan Lakuse: Sanketan?
kala Salan: lon ona li sama toki ni. taso ona li ante lili. ona li tan ma ante. taso ona li sama. ona li lon kulupu toki sama.
jan Tepo: mi sona, mi sona.
kala Salan: lon. ona li lon kulupu mama. ni la ona li tan toki ni. taso nimi Mawejana… pilin mi la ona li toki sama. taso ken la ona li toki…
jan Tepo: a. Sanketan?
kala Salan: lon. lon. Sanketan.
kala Salan: taso ona li toki pi sama mute a.
jan Tepo: a. pona. mi sona.
jan Lakuse: pona mute.
kala Salan: taso nimi Mahaiana anu Mawejana li nasin kon, li nasin suli. tenpo pini la jan pi kulupu Mawejana li toki e ni: “nasin Telawata li nasin Inajana.” Inajana - kon li: nasin lili. ni la kulupu Mawejana la nasin Mawejana li nasin suli - nasin pi kulupu Telawata li nasin lili. sina taso li weka e pilin ike sina. sina weka ala e pilin ike pi jan ante ale. ni la ni li nimi. taso nimi li ante. ona li ante e nimi li toki e nimi Telawata tan nasin pi jan majuna, tan ni: nimi “nasin lili” li ike lili a. ona li ike e nasin mi. ni la ona li ante e nimi.
jan Tepo: a mi sona.
kala Salan: taso tenpo pini la ona li toki e nasin Mawejana e nasin Inajana. taso tenpo ni la ona li lukin e nasin Mawejana e nasin Telawata.
jan Lakuse: wa, sona.
jan Tepo: n, sina toki e ni: “nasin kon”… a mi sona pona ala. nasin kon li seme?
kala Salan: a. nasin… a. kon pi nimi Mawejana li “nasin suli”, anu…
jan Tepo: a, mi sona.
jan Lakuse: a, kon.
kala Salan: nasin Mawejana li suli. taso nasin Telawata li lili.
jan Lakuse: kon.
kala Salan: lon. kon la…
jan Tepo: kon nimi a.
kala Salan: ona li toki e ni lon kon nimi…
jan Tepo: pona. mi sona.
kala Salan: kon nimi la… lon. taso kulupu mi li kulupu Telawata. ni li kulupu wile mi.
jan Lakuse: n. ni la lon kulupu sina la sina pilin ala e ni anu seme: “sina ken sama jan Puta”? Puta li sewi ala sewi tawa sina?
kala Salan: a, kulupu mi la jan li ken sama jan Puta. taso ona li… ona li ken sama. ona li wile sama la ona li ken weka e pilin ike ona. taso ona li kama sama jan Puta ala, la ona li weka ala e pilin ike pi jan ale. ona li kama sewi ala. ona li awen jan, anu… ona li kama sewi ala. taso kulupu pi nasin Mawejana la jan li ken kama sewi li ken lon ma sewi, li ken kama e jan tan ma ike, li ken weka e pilin ike. kulupu mi la, ni li lon ala. a, taso jan li ken sama jan Puta, la ona li wile sama jan Puta la ona li ken weka e pilin ike ona. ni li nasin pi kulupu mi. ni la ona li kama sewi ala.
jan Lakuse: jan Puta li jan sewi anu seme? sina ken sama a jan Puta, anu jan Puta li jan sona taso?
kala Salan: lon. jan Puta li jan sona taso. kulupu mi la jan Puta li jan sona taso. ona li suli. ona li jan sona suli. ni la ona li kama li pali mute li pana e sona ale ni. taso ona li jan sona taso. ni la jan li ken kama sama jan Puta. ona li kute e sona li pali e sona la ona li kama sama jan Puta! taso ona li kama sewi ala. ona li kama jan sona suli ala. ona li awen lon nasin ona. ni la jan Puta li sewi ala. ona li jan sona.
jan Tepo: a, mi sona! mi sona! nasin sina la jan Puta li sewi ala. ona li weka… pali ona li weka ala e… n. sewi ona li weka ala e pilin ike lon jan ante. taso ona li kama e ni tan ni: ona li pana e sona. jan ante li kama sama ona la ni li weka e pilin ike ona. mi sona. mi sona.
kala Salan: lon! lon. lon. jan Puta li pana e sona. ona li moli. jan Puta li moli.
jan Tepo: lon.
kala Salan: taso ona li pana e sona la jan li ken kepeken sona ni li ken weka e pilin ike ona. lon. taso… nasin pi kulupu Mawejana li suli a li ken nasa. ona li ken… ante mute a li lon. a, ma mute la nasin Mawejana li lon. taso nasin ale ni li ante. nimi li nimi Mawejana. taso nimi Mawejana li nimi pi kulupu mute a. ni la, mi lon kulupu Telawata. kulupu Telawata li ante lili. ante lili taso li lon. taso kulupu Mawejana la ante mute a li lon ma ale, la mi wile ala toki ike e nasin pi kulupu Mawejana. mi sona pona ala e ale. sona mute a li lon. taso… nasin ona la jan Puta mute li lon. nasin ona la jan Puta mute li lon. ona li jan taso. sewi Puta li lon.
jan Lakuse: n…
kala Salan: …li lon ma mute li lon ma sewi, la sewi Puta ale ni li suli li ken pana e wawa li ken pana e sona li awen lon. ona li nasin suli mute a. sewi mute a li lon. taso, kulupu mi la, kulupu Telawata la jan Puta wan taso li lon, li moli, li pana e sona.
jan Lakuse: wa. a, n. kin la, sina toki e ni anu seme: “jan Puta li moli.” a, lon nasin sewi la seme li kama lon moli? moli li seme? moli li sike, anu moli li… mi kute e ijo ante mute tan nasin Puta.
kala Salan: lon. lon. nasin Puta la… ni li - ni li… suli a. taso nasin Puta la, ale li sike. sina moli la sina kama jan ante, anu sina kama ante. sina ken soweli. sina ken kon. sina ken jan. sina ken sewi. sina kama sin, lon sike. sina moli la sina kama sin la sina moli la sina kama sin la sina moli la sina kama sin… la, jan Puta li toki e ni: “tenpo suli wawa la jan li moli li kama sin li moli li kama sin. “ni li pilin ike. ni li kama e ike mute a. sina kama sin - “sina olin e mama sina la mama sina li moli. “sina olin e jan pona la jan pona li moli. “sijelo sina li kama ike, la sina kepeken misikeke. taso sina moli. “sijelo sina li pilin ike. sina moli. “la ona ale li open sin! sina kama sin la ale li open sin! “sina jo e mama sin, la mama li moli. “sina toki tawa jan pona sin la jan pona ni li moli. “la sina pilin ike lon tenpo ale - anu - “tenpo ale ala [la] sina ken pilin pona. “taso tenpo ale la sina alasa e pilin pona la alasa ni li kama e pilin ike. “taso sina moli la ona li pini ala. sina moli la sina kama sin lon sike.” ni la jan Puta li toki e ni: “a. mi wile weka tan pilin ike la mi o weka tan sike. “mi moli la mi o kama sin ala, lon sike ni.” ni la wile pi nasin puta li pilin ike ala. taso ona li moli la ona li kama weka tan sike li kama pilin ike ala, lon tenpo sin.
jan Lakuse: wa.
kala Salan: ni li nimi sike pi nasin Puta.
jan Lakuse: ni li lon nasin ale pi nasin Puta anu seme? kulupu ale? n.
kala Salan: lon. lon. ni li lon nasin ale. kulupu Mawejana la jan o kama sama jan Puta. jan o weka ala tan sike. sina sona e nasin sike la sina ken sona pona e nasin pi kulupu Mawejana. kulupu Mawejana li toki e ni: “jan li kama weka tan sike pi pilin ike la ni li pona. “taso jan mute a li awen lon sike pi pilin ike! “ni la mi o weka ala. mi o awen lon sike o weka e jan ale tan sike lon tenpo wan.”
jan Lakuse: tenpo wan?!
kala Salan: anu ona o weka e jan ale… tenpo wan li… ona li ken tenpo ante. taso, ona li wile ala weka. ona o weka e jan ale. jan ale li weka la ona li ken weka kin. taso ona li weka ala. jan ale li awen lon sike la ona li awen lon sike. taso ona li kama sewi la ona li weka e jan ante. ni li nasin pi kulupu Mawejana. ona li… sona mute a li lon…
jan Lakuse: lon…
kala Salan: mi ken ala pana e sona ale…
jan Lakuse: a a a.
kala Salan: …lon kalama sin ni. taso nasin kulupu Mawejana la ona li wile kama sama sewi. ona li wile kama sama jan Puta. anu - kama sama sewi Puta, li wile ala weka tan sike pi pilin ike. ona li wile weka e jan ale tan sike pi pilin ike. taso tenpo… jan sona Puta pi tenpo pini li toki ala e ni. anu, jan kulupu Telawata la ona li toki ala e ni.
jan Lakuse: lon.
kala Salan: ona li toki e nasin weka pi jan wan taso. anu, nasin weka pi jan wile. jan li wile la ona li ken weka. ni li ante lon nasin tu, lon kulupu tu.
jan Lakuse: a.
kala Salan: ken la jan Tepo li sona ala. mi sona ala. taso…
jan Tepo: a mi kute. pilin mi la mi sona.
kala Salan: pona.
jan Lakuse: a. wile sona ante li lon ala lon?
kala Salan: ken la jan li kute la ona li ken… ni li sona mute. taso…
jan Tepo: n.
kala Salan: sina wile kama sona e nasin pi jan Puta la ni li… sina o open kepeken sona lili. o kama sona lili, o kama sona lili…
jan Lakuse: a a lon lon lon.
kala Salan: …e sona ale ala lon tenpo wan taso.
jan Tepo: n…
kala Salan: ni la jan li kute li wile kama sona la ona li ken sona e ni: jan Puta li toki e ijo suli ni: ijo nanpa wan la: “pilin ike li lon. jan li pilin ike. “ona li ken pilin pona. ona li ken pilin ike. “taso tenpo ala la pilin ike li weka.” ijo nanpa tu la: “jan li pilin ike tan ni: “ona li alasa e pilin pona, li wile weka tan pilin ike. “ona li awen pona ala. ona li wile alasa anu ona li wile weka “la ona li pilin ike. tenpo ala la ona li ken awen taso. “ona li alasa, li tawa weka. taso ona li awen ala.” ni la ona li toki e ni: “jan li ken awen. ona li weka e wile alasa e wile weka la ona li ken awen, “li pilin ike ala! ni la ona li wile weka e wile alasa e wile weka “la ona o kama sona o pali e nasin sona ona.” ijo taso ni li ijo suli pi jan Puta. ni li nasin… ni li sona open pi nasin Puta.
jan Lakuse: tawa sina la, jan pi nasin Telawata li jan sewi anu jan sona?
kala Salan: ona li jan sona taso. mi la ona li jan sona taso. lon. ona li sama ni: jan li ken… jan sona li ken pona li ken… sina kama sona tan jan sona suli la ona li sewi ala. taso ona li pona tawa sina. ona li suli tawa sina. taso ona li jan sona taso. ona li sewi ala. ni la ona li ken suli. ona li ken pona mute. taso…
jan Lakuse: sina wile ala anpa tawa ona anu seme?
kala Salan: lon.
jan Lakuse: a ni li sona pona.
kala Salan: lon. ni la, ni li nasin…
jan Lakuse: a a a.
jan Lakuse: sona mute li kama pana.
jan Tepo: sona pona.
jan Lakuse: a, ken la mi o toki e ni lon tenpo sin anu seme: tenpo sike mute la sina ken kama sin tawa kalama sin, li ken toki e ijo!
kala Salan: lon. tenpo pini la mi wile toki. taso, tenpo ala la mi kama. ni la ni li pona.
jan Tepo: n. wawa a!
jan Tepo: a. sina lon tomo kulupu pi nasin Puta la sina awen ala awen toki pona?
kala Salan: a a! lon. mi toki lili. mi ante lili e toki pi lipu ante mi. sina lukin ala lukin? a, jan Tepo o.
jan Tepo: a mi lukin e ni!
kala Salan: ante toki e ijo… lon. lon. mi ante toki lili e lipu mi. taso tenpo suli la mi toki uta ala tawa jan ante lon kulupu a.
jan Tepo: a.
kala Salan: pilin mi la mi toki ike lili. taso mi awen kepeken lili. mi sitelen kepeken toki pona lon lipu mi. lipu mi la mi sitelen e pilin e pali. taso… mi toki uta lili.
jan Tepo: a nasin la sina o toki mute ala kepeken uta anu seme?
kala Salan: lon, mi… mi wile toki uta. taso lon la mi pali ijo mute li lon tomo sona… li pali mute la mi toki uta pi tenpo lili. taso mi sitelen lon lipu.
jan Tepo: n sitelen.
jan Lakuse: lon. sina wile kute e ijo ante tan jan Kala la mi pana e ni lon sitelen anpa. sina wile kama sona e nasin Puta tan jan Kala la sina ken lukin e ante toki ona. a, taso a… pilin mi la ni li ale! ni li kalama sin pi sona mute!
jan Tepo: ni li ale a! anu seme…
jan Lakuse: mi jan Lakuse.
jan Tepo: mi jan Tepo.
kala Salan: mi jan Kala.
jan Tepo: mu!
kala Salan: mu!
jan Lakuse: sina wile toki e ijo pi wawa sina, anu sina wile toki e ijo la o kama lon ma pali pi toki pona o toki tawa jan pali, o kama pali e kalama sin! o pana e uta sina, o toki wawa! taso — o awen pona!
jan Tepo: o awen pona a!
kala Salan: o awen pona!