tawa pi poki monsi pi ma Asija nanpa luka tu: ma Mijama
ma Mijama li ma pi pona mute, taso jan mute pi ma ni li jo e mani lili. tenpo ni la ona li jo e kulupu lawa pi ike mute. jan pi ma Mijama li anu ala e kulupu lawa ni. lon la jan lawa li kama jan lawa lon nasin wawa ike kepeken kulupu utala. ma Mijama la kule jan mute li lon, taso jan mute mute li jan pi nasin sewi Puta. lon la ma ni la tomo pi nasin sewi Puta mute en kiwen pi jan Puta mute li lon.
mi tawa ma Mijama lon tenpo tu wan. tenpo nanpa wan la mi tawa ma tomo lawa Jankon (Yangon) tawa ma Pakan (Bagan) tawa ma tomo Mantale (Mandalay). tenpo ni li sama tenpo pini tan ni: ilo pi pana mani li lon ala. suno nasin pi tenpo pimeja li lili mute. jan tawa pi ma ante kin li lili mute. tenpo nanpa tu la mi tawa sin ma tomo Jankon tawa telo suli pi insa pi ma Inle. tenpo sike tu tu taso li tawa, taso tenpo ni la sin pi ma Elopa pi ma Mewika li kama. tenpo ni la ijo mute li ante. ilo pi pana mani mute en tomo tawa mute en ilo toki mute en jan tawa mute pi ma mute kin li lon. tenpo nanpa tu wan la mi tawa sin ma tomo Mantale taso tawa toki kulupu pi tomo sona suli. ona li pona tawa mi, taso ike la ma tomo ni li kama jo e kalama pi ike mute e kon pi ike mute. mi la ante pi ma Elopa pi ma Mewika li pona ala a!
ma tomo lawa Jankon li pakala lili, taso ona li musi mute. ma tomo ni la tawa mi la ijo pona nanpa wan li tomo pi nasin sewi Puta Siwetakon Paja (Shwedagon Paya). ona li suli li epiku1. lon meso2 ona la nena suli pi nasin sewi Puta li lon. ona li suli mute li jo e selo pi kiwen jelo. taso tawa mi la ma pi pona nanpa wan pi ma Mijama li ma Pakan. ma ni li lon poka pi telo tawa Ilawasi (Irrawaddy). ona li jo e tomo mute mute pi nasin sewi Puta pi tenpo pini, pana lukin la tomo pi nasin sewi Puta Ananta (Ananda) li lon. ona li jo e kiwen suli tu tu pi jan Puta. kiwen ale ni li lon noka li lon sinpin pi lupa tu tu pi tomo ni. wan li lukin e nasin pi kama suno, wan li lukin e nasin lete. wan li lukin e nasin pi suno pini. wan li lukin e nasin seli. ona li pona mute mute tawa mi a.
ma tomo Mantale la ijo pona pi nanpa wan li nena Mantale. lon sewi ona la tomo pi nasin sewi Puta li lon. tan noka pi nena ni la nasin suli pi leko3 mute li lon, taso jan li wile tawa sewi, la ona o weka e selo noka ona a! pini la telo suli Inle li suli mute. lon insa ona la tomo mute pi kiwen kasi li lon. ona li awen lon palisa suli. musi la jan lawa pi supa tawa telo li tawa kepeken palisa. taso ona li tawa e palisa ni kepeken noka ona a!
tenpo ni la tawa pi ma Mijama li ken ala. taso tenpo kama la ona li ken, la o tawa ma Mijama. ona li jo e ijo musi mute mute pi ken lukin a! tenpo sama la mi wile e ni: kulupu lawa ike ni li pini a!