pali mi nanpa wan
tenpo pini la, mi pali e len kule kepeken linja mute. linja ni li tan kasi Coton. ona li pona tawa luka mi a!
mi pali e len tan nasin pali ni. taso nasin mi li ante lili. pilin mi la, ante mi li… pona ala. taso ni li suli ala tawa mi. mi pali tan ni: mi wile kama sona e nasin pi pali len. pali ni li suli. len ni li suli ala a a a
pali open la, sijelo pi ilo palisa mi li ijo Pasi. esun la ona li mani lili a! sona mi la, ona li wile e mani $5AUD. (mani AUD li mani pi ma Oselija)
taso, ilo ni li ike tawa mi. ona li wile e pali mute, li ike lili tawa luka mi. taso, mi awen pali. len mi li kama suli. lupa ike li kama lon ona, taso mi pona e ona kepeken linja pimeja. lukin la ona li nasa, taso lupa ike li weka :)
mi pali e len lon tenpo mute. taso… ilo mi li pakala a!!
ni li ike mute tawa mi a! mi ken ala pali kepeken ona!! mi wile esun e ilo pona. ni la mi alasa e sona pi ilo mute. jan sona li toki e ni: ilo palisa sike li pona tawa pali pi ijo mute. ni la, mi esun e ni:
mi esun e ilo palisa pi sijelo kasi, e ilo palisa pi sijelo kiwen, e linja sike. linja ni li wan e ilo palisa tu. ona li kama ilo palisa sike. ilo ale ni li mani $38AUD. tenpo suno luka tu li kama la, ilo sin li kama.
mi awen pali kepeken ilo sin. len ni la mi kepeken ilo palisa pi sijelo kasi. ona li pona mute tawa mi!! pali mi li wile e tenpo lili. mi pakala ala e lupa mi. pali la luka mi li pilin pona.
mi pali… mi pali… mi pali…
len mi li pini a!
o suli e sitelen nanpa wan
o suli e sitelen nanpa tu
pali ni li pona tawa sona mi. mi kama sona e ni: mi wile ala e len pi kule mute lon sijelo mi. ni la, pali mi nanpa tu li kule lili a a a
mi tawa~
-jan Natan tan kulupu Mimuki