lipu sin mute pi toki pona

sina lukin e lipu tenpo la ken la sina wile lukin e lipu sin pi toki pona. pona la, jan mute li pana e lipu mute pi toki pona. taso sina awen lukin la, sina kama sona e ni: lipu li tan ala jan taso pi toki pona. lipu li tan toki ante kin. jan pi toki pona li ante e lipu tawa toki pona. ni li ken pona. ni li ken pana e lipu mute e lipu wawa e lipu pi musi mute. taso ni li ken ala pana e lipu pi nasin pi toki pona taso. sina wile lukin e lipu pi tan pi toki pona taso la lipu ni mute o lon a!

tan ni la, jan Lakuse li pana e wile pi utala musi sin. utala ni la alasa pi lipu sin li lon. lipu sin ni o tan toki pona taso o tan ala toki ante. lipu ni o lili ala o suli mute ala. nimi ale ale ale ale ale o lon lipu. tenpo pi alasa musi ni li kama la lipu sin mute li kama a. mute lipu li luka luka tu. suli pi lipu ni li suli lili li suli mute li suli pi mute wawa. mi lukin e lipu. lukin ale mi la ona li pona li toki e ijo musi.

sina wile sona e toki pi ijo nasa wawa ike la o lukin e lipu pi nimi “AAA-mute”. ijo ni li wawa mute li ken nasa e jan li kama e toki pona taso tan jan. tan ni la jan li poki e ijo nasa ni.

sina wile lukin e akesi suwi la o lukin e lipu pi nimi “akesi li wile lon nena”. lipu ni la akesi li tawa li wile e ijo tan nena ma suli. taso ona li ken ala tawa sewi la ona li wile e pona tan soweli ante. suwi la, toki ni li kepeken sitelen pona

sina wile lukin e utala pi kulupu tu la o lukin e lipu suli pi nimi “ale li ale”. kulupu tu li kepeken nasin tu pi toki pona la ona tu li utala. taso jan pi kulupu ala li kama wile pini e utala a.

sina wile musi la o lukin e lipu pi nimi “ilo li wile e soweli”. ilo li wile e soweli la ona li alasa e soweli lon tomo ona. taso soweli li lon seme? sina a o pana e nasin pona tawa ilo. sina a o alasa e lipu pona. lipu pona la ilo li ken tawa.

sina wile sona e nasin pona pi jan pona e nasin ike pi jan pona la o tawa lipu pi nimi “jan pi sona mi en jan pona ona”. jan wan li awen pana e moku tawa jan pona ona. taso tenpo wan la sijelo ona li kama jaki la ona li ken ala pana.

sina wile sona e kama pi wawa nasa la o lukin e lipu pi nimi “jan usawi”. jan lili li wile sona e wawa nasa li tawa jan pi sona ni. taso sona ni li nasa mute.

sina wile e toki pi tenpo kama la o lukin e lipu pi nimi “jan Posepomamuka#52208 o”. jan nasa li sona li sona e ale li toki lipu tawa jan ante. jan nasa sona li wile e ijo tan jan ante. jan pi sona ale li kepeken toki pona nasa.

sina wile e toki pi mun ante la o wile e lipu pi nimi “kala pi alasa kala”. mun ante la ijo mute li sama ala ma sina. kasi en soweli en jan li lon, taso ona li sama lili lon ijo pi ma sina.

sina wile kute e pilin pi kasi lili e ma pi kasi suli la o sona e lipu pi nimi “kasi lili li suli”. kasi lili li kama lon li wile kama suli sama kasi ante. tenpo li kama, taso ante li lili.

lipu ante li kepeken sitelen pona. nimi ona li “lipu pi jan Kosi”. jan Kosi li kama tawa ma ante li kama kute e jan pi toki pona li kama sona toki pona li kama sona sitelen pona li kama sona sitelen suwi. ona li pilin pona.

lipu pi nimi “lipu pi soweli Lulu” la, soweli Lulu li olin e ale. ona li toki pi pona pilin tawa soweli ante ale li tawa lon ma. taso soweli wan li wile ala toki tawa soweli Lulu. ike la, kasi suli li kama anpa lon soweli Lulu.

waso li lon lipu pi nimi “lipu tenpo pi waso lili” li toki e tenpo ona. jan li namako ike e poka ale la ni li ike tawa waso. jan pi mun ante li kama. jan li pilin sama waso li wile pali.

kijetesantakalu¹ li lon lipu pi nimi “olin kijetesantakalu”. tenpo open la, ona li wile ala e kijtesantakalu ante, li wile e moku taso. taso moku li pini la ona li wile e kijetesantakalu ante li alasa e kijetesantakalu ante.

lipu pi nimi “ni li nasin” la jan li lon kulupu. kulupu li awen li pali pona. jan pi kulupu ante li ike tawa ona. taso jan pali wan li kama toki tawa jan pi kulupu ante.

sina olin ala olin e nimi “mu”? olin la lipu pi nimi “waso Mumu li mu ala” o pona tawa sina. mu mute li li lipu ni. a, taso mu li pona ala tawa waso Mumu li lon poka ale pi waso Mumu. waso Mumu li wile e toki. ni la ona li alasa e ma toki e ijo toki.

o lukin e lipu ale e ale lipu lon utala.pona.la . ona ale li pona.