nasin Juniko ala la, nasin UCSUR li lon

sina sama mi la, sina wile toki pona kepeken sitelen pona. taso sina wile pana e sitelen pona tan ilo sina tawa ilo ante la, ni li wile e pali. sina wile pana e sitelen pona sina ale lon lipu sitelen. sina ken pana e lipu sin ni tawa ilo ante la, ni li pona tawa ilo ante. nasin sitelen ante la, pali ni li lon ala. nasin sitelen Lasina en nasin sitelen ante mute li wile e sitelen taso e lipu sin ala pi sitelen ale tawa pana. ni li ken ala ken tawa nasin pi sitelen pona? nasin sitelen ante li wile ala e pali mute tan seme?

a, tan ni: ilo ale li sona e sitelen mute. ona li sona e sitelen Lasina e sitelen Elena e sitelen Sonko e sitelen Anku e sitelen mute mute. taso sitelen pona li sin. ilo li sona ala e sitelen pona tan sin. ilo li sona e sitelen mute tan nasin Juniko. nasin sona Juniko li pana e sona tawa ilo: sitelen ale la, nanpa li lon. nanpa pona wan li lon la, ilo li ken pana e sitelen wile wan. a, tan ni la, sitelen pona o lon nasin nanpa ni! anu seme… pilin mi la, ona o lon ni. tan nasin ni la, mi ken pana e sitelen pona tawa ilo ale a.

taso tenpo ni la, ona li lon ala nasin ni. ken la, ona li ken kama lon nasin ni lon tenpo kama. taso mi awen wile pana e sitelen pona. ni la, seme li ken? ken la, mi ken pana e sitelen pona tawa ilo lon kulupu taso pi toki pona. taso mi wile ni la, ilo o sona e nasin pi sitelen pona. mi wile ala pana e lipu sin la, nasin wan pi sitelen pona o lon ilo pi toki pona. nasin mute li lon ilo mute la, mi ken ala sona e nasin pona lon tenpo sitelen. tan ni la, nasin sona wan pi sitelen pona o lon. nasin ni li nasin UCSUR.

nasin UCSUR li sama nasin Juniko, taso kulupu Juniko li lawa e nasin Juniko la, kulupu lawa ni li lawa ala e nasin UCSUR. nanpa sitelen pi nasin UCSUR li lon poka pi nasin Juniko. kulupu Juniko li toki e ni: nasin Juniko li lawa ala e nanpa ni la, ilo li ken pana e sitelen ante tawa nanpa ni. tan ni la, nasin UCSUR li ken pana e sitelen ante tawa nanpa ni.

nasin UCSUR li wile e seme? a, tenpo la, jan li pali e toki sin. toki pali ni la, sitelen sin li ken. taso toki ni li sin la, kulupu pi toki ni li lili la, sitelen sin li tawa ala nasin Juniko. ni la sitelen sin ni li ken tawa nasin UCSUR. jan Lepeka li jan pali pi nasin ni, li pana e sitelen pona tawa ona.

ni la mi ken ala ken pana e sitelen pona tawa ilo ante ale pi toki pona? ken ala. o lukin e ni: 󱥞󱥞󱥞󱥞󱥞󱥞󱥞 a, ni li pana ala e sitelen pi wile mi tan seme? a, ilo li wile sona e nasin pi sitelen ni la, o pana e nasin ilo sitelen tawa ilo. tenpo ni la, mi sona e nasin ilo ni: nasin sitelen pu Mono en sitelen seli kiwen en nasin Fairfax en nasin nanpa en linja waso en leko¹ lili en sitelen Kotopon en insa pi supa lape en nasin Unifont CSUR en sitelen Antowi. ona ale la sitelen pi nasin nanpa li ken kama sitelen pona:

kulupu pi toki pona la, ilo mute li jo e nasin ilo sitelen ni. taso ilo mute kin li jo ala. kin la, sina ken ala pana e nasin sin ni tawa ilo luka lili. pana pi nasin sin li ken tawa ilo suli taso. tan ni la mi kulupu o awen alasa e nasin pona tawa sitelen pona. mi o awen pana e nasin pi alasa ni tawa nasin UCSUR. alasa li pini la nasin li kama pona mute li kama awen wawa. tan ni la nasin Juniko li ken moku e sama pi nasin UCSUR li ken pana e sitelen pona tawa ilo ante. sina wile e ni la sina wan en sina ale li ken pali e seme tawa sin ni? lon la, nasin ilo nanpa li nasa li wile e pali tan lawa li pona ala tawa ale. taso pona la, nasin nanpa li suli ala tawa pali pi sitelen pona. sina wile e sin ilo la o awen kepeken sitelen pona. o sitelen pona mute. sitelen pona li mute la jan ilo li wile e sitelen pona lon ilo.