tawa pi poki monsi pi ma Asija nanpa luka tu wan: ma Palata
ma Palata li ma pi musi mute li ma pi ante mute. ona la jan pi mani mute li lon. jan mute pi mani ala kin li lon. ona li jo e tomo epiku1 pi tenpo pini, taso ona li jo e ma tomo mute pi jan mute mute.
ma tomo ni la tomo tawa li mute ike. tan ni la kon li jaki mute. suli la ma Palata li ma pi nasin sewi mute. nasin sewi lawa pi ma Palata li tu tu: ona li nasin sewi Intu li nasin sewi Siki (Sikh) li nasin sewi Sawin (Jain) li nasin sewi Puta. nasin sewi ni li jo e ijo sama mute. pana lukin la ona ale li pilin e ni: jan li moli, la jan li kama lon sin. ale ni li sama poki. mi ale li kama lon sin lon tenpo mute lon ma ni. ona li ike. mi ale o pali wawa tawa ni: mi ale o weka tan sike pi lon sin ni (samsara). jan li kama jo e suno insa, la ona li pini lon sin li kama wan lon ale ni. ni li nasin sewi majuna2 pi ma Palata, taso jan mute pi nasin sewi Isilan kin li lon.
mi tawa ma Palata lon tenpo tu wan. tenpo nanpa wan la mi tawa ma tomo Potakaja (Bodhgaya). ma tomo lili ni li lon ma Palata pi nasin lete. ona li ma pi suno insa pi jan Puta, taso lon tenpo pi jan Puta la nimi pi ma ni li Uluwela (Uruvela). tawa mi la ma tomo ni li epiku a. tomo mute pi nasin sewi Puta tan ma mute pi nasin sewi Puta li lon. taso tomo suli nanpa wan li tomo pi nasin sewi Puta Makaposi (Mahabodhi). lon poka pi tomo ni la kasi suli sewi Posi (Bodhi) li lon. tenpo pini pi suli mute mute la lon anpa pi kasi suli ni la jan Sitata li kama jan Puta. ona li tawa noka lon tenpo mute lon ma Palata pi nasin lete. ona li pali e pali mute pi nasin sewi. tenpo suno wan la ona li pini lon ma Potakaja li anpa monsi lon anpa pi kasi suli Posi. ona li weka e toki insa li alasa insa ona lon tenpo suli, la ona li kama jo e suno insa. tenpo kama la ona li kama ala lon sin.
mi awen lon tenpo esun wan lon ma tomo Potakaja. mi lukin e ijo mute pi nasin sewi Puta. mi pali e pali weka pi toki insa lon anpa pi kasi suli Posi. mi tawa noka mute lon insa pi ma tomo. mi sike noka mute e tomo Makaposi. mi tawa noka mute kin pi weka pi ma tomo. mi moku e moku pona pi ma Palata. ale li pona tawa mi, mi pilin pona mute a!
tenpo nanpa tu la mi tawa ma tomo Walanasi (Varanasi). ma tomo ni li majuna, li pona mute li ma pi sewi mute lon ma Palata. ona li lon poka pi nasin telo Kansi (Ganges), nasin telo pi suli nanpa wan pi ma Palata. lon insa pi nasin telo ni la jan li telo e sama tan ni: telo ni li sewi. jan moli li kama seli lon poka pi nasin telo ni. kama la jan li pana e ko seli ona lon nasin telo ni.
weka ala pi ma tomo Walanasi la ma tomo lili lili Sana (Sarnath) li lon. mi tawa ma tomo ni kin, mi awen lon ma tomo ni lon tenpo suno tu. ma tomo Sana li suli tan ni: jan Puta li open pana e sona pi nasin sewi sin ona lon ma ni. lon ni la jan ken lukin e nena suli pi nasin sewi Puta Tame (Dhamek Stupa).
kama la mi tawa ma tomo lili lili Kusinala (Kushinagar) kepeken tomo tawa esun. ona li weka mute tan ma tomo Walanasi. mi open e tawa lon tenpo pi open suno, mi pini e tawa lon tenpo pimeja. ma tomo Kusinala li suli tan ni: jan Puta li moli lon ni. ma tomo Kusinala la mi lape lon tenpo pimeja wan taso lon tomo pi nasin sewi Puta pi ma Sonko. tenpo pi open suno kama la mi tawa tomo pi nasin sewi Puta Makapaliniwana (Mahaparinirvana). lon ni la jan Puta li moli lon anpa pi kasi suli Sali (Sal) li tawa ma sewi Nipana (Nibbana/Nirvana).
tenpo nanpa tu wan la mi tawa ma tomo Kawitelapa (Hyderabad). mi tawa tomo sona suli pi ma tomo ni tawa toki kulupu sona. ma tomo ni li jo e kon pi nasin sewi Isilan. lon la ma tomo ni la jan mute pi nasin sewi Isilan en tomo mute pi nasin sewi Isilan li lon.
mi lukin e ijo pi nanpa lili mute lon ma Palata, taso ale li pona mute tawa mi. mi ken, la mi wile tawa sin a!