nasin ku li pona taso ala

open, la o sona e ni: toki ni li pilin mi taso. toki ni li sona pi jan ale ala li pilin pi jan ale ala. taso, toki ni li suli tawa mi. ni, la mi pana e ona tawa sina mute.

ken, la sina pilin ike tawa toki ni. ni li pona tawa mi.

ken, la sina pilin pona tawa toki ni. ni li pona tawa mi.

ken, la toki ni li suli ala tawa sina. ni li pona kin.

jan ale li kepeken ala e nasin sama mi. taso, nasin mute li ken pona tawa kepeken. ni, la mi pana e toki ni. mi open.

tan seme, la mi pilin e ni tawa nasin ku? mi pilin e ni tan ni: ike lili pi lipu ku li ken ike tawa toki pona. ike ni li ike ala e lipu ku ale. taso, toki pi ike ni li suli tawa sona. jan li kama sona e ike, la pona pi lipu ku li ken tawa jan kin. ni, la mi pana e nasin ni.

nanpa wan, la mute, la nimi ku suli en nimi ku lili li nimi ilo ala. (mi toki taso e nimi ku pi pu ala). nimi ku pi nanpa lili li ilo. nimi “tonsi” li nimi ilo. nimi “monsuta” li nimi ilo kin. taso, nimi ante mute li ilo ala. nimi “n” en nimi “wa” li kepeken e kon pi nimi “a.” nimi tu li kepeken e kon sama, la ni li ike lili tawa kon pona pi toki pona. jan li kepeken e nimi “kokosila” lon tenpo ni taso: jan li toki pona ala lon tomo pi toki pona taso, la jan li ken toki e ni: “o kokosila ala.” taso, nimi “o kokosila ala” en nimi “o toki pona taso” li kepeken e kalama pi tenpo sama. (jan pi mute suli ala li kepeken e nimi “kokosila,” taso jan li awen kepeken e ona lon tenpo ni. nimi “kokosila” li nimi musi ala tawa jan ni). nimi “isipin” li sama nimi “pilin” anu nimi “sona.” nimi “meso” li sama nimi “insa.” mute, la nimi “meso” li weka, la kon pi linja nimi li awen sama. nimi “meso” li nimi ilo ala tan ni.

kin, la nimi ku mute li musi taso. musi li ken pona, taso nimi musi li musi lon tenpo ale ala. a, musi li ken pini. ni li sona suli. nimi musi pi lipu ku li nimi “epiku” li nimi “samu” li nimi “Pingo” li nimi “yupekosi.” ken, la sina toki e ni: “nimi musi li musi tawa mi. o ike ala tawa ona.” ken, la sina toki e ni: “jan pi mute ala li kepeken e nimi musi. ni, la nimi musi li suli ala.” toki sina, la mi pilin e ni: toki sina o kama lon. mi wile e ni: jan li kepeken ala e nimi musi lon tenpo pi musi ala. taso, nimi musi li ken kama sama nimi pi musi ala. jan sin mute pi toki pona li kama sona e nimi musi li kepeken e nimi ni tawa musi ala.

nanpa tu, la lipu ku li alasa e nimi namako e sona ona kepeken nasin nasa. nasin pi lipu ku li ni: jan wan taso li pana e nimi wan tawa wile sona pi lipu ku, la nimi ni li ku lili. nasin ni, la nimi “ete” li lon lipu ku. jan ala li kepeken e nimi ni. nimi “ete” li suli ala, taso ona li lon lipu ku. ni li pona ala. mi kama sona e ni: jan wan li pana e nimi “ete” tawa lipu ku tan musi ona. taso, ken, la jan li kepeken e nimi “ete” tan lipu ku. nimi “ete” li sama nimi “kiwen.” ni li pona ala kin. ike, la lipu ku li wawa e nimi ku.

kin, la lipu ku li lon e nimi ku mute. o sona e ni: pini, la nimi ku mute li lon ala. lipu ku li lon e nimi sin ni tan ni: jan li pali e nimi ni tawa lipu ku. lipu ku en wile sona pi lipu ku li lon ala, la nimi ku ni li lon ala kin. nimi ni li nimi “loka” li nimi “kalamARR” li nimi ante kin. lipu o lon ala e nimi lon lipu sama. taso, nasin ni li lon lipu ku.

nanpa tu wan, la jan pi nanpa lili li pana e pilin ona tawa lipu ku. jan mute li lon kulupu pi toki pona. taso, mute suli, la jan mute luka luka luka tu tu (39) li pana e pilin ona tawa wile sona pi lipu ku. jan ni taso li lon e nasin ku. ni li ike tan seme? o sona e ni: jan pi mute mute li sona e toki pona li kepeken e toki pona. jan mute luka luka luka luka tu tu (39) li nanpa lili. nanpa ni li ken ala pana e pilin sama jan ale.

nanpa tu tu, la nasin ku li nasin ala pi kulupu ale pi toki pona. kulupu wan taso li pana e pilin ona tawa wile sona pi lipu ku. kulupu ni li “ma pona pi toki pona” lon ilo Siko. mi lon kulupu ni. kulupu ni li pona. taso, kulupu ante li lon. ni li lon lipu Pepu li lon lipu Wesi li lon ilo Telekan li lon lipu ante. kin, la kulupu “ma pona pi toki pona” li kulupu suli taso ala. kulupu suli ante li lon. pilin pi kulupu ante li lon ala lipu ku. kulupu wan taso li lon wile sona pi lipu ku, la nasin wan taso li lon lipu ku. ni li ike kin. toki pona o sewi ala nasin wan taso. nasin mute li pona.

nanpa luka, la tenpo ni, la nasin ku li wawa e nimi pi mute lili li ante e nasin pi jan pi mute lili. mi sona e ni: nimi pu li awen nanpa wan. taso, pilin pi kulupu wan tawa nimi ku li wawa e nimi lon kulupu ale. wile sona tan u/AcipenserSturio li pana e sona ni lon lipu Wesi. tenpo sike 2020 en tenpo sike 2022, la kepeken pi nimi “epiku” pi nimi “jasima” pi nimi “lanpan” pi nimi “misikeke” pi nimi “soko” li kama wawa li kama suli. nimi ale ni li ku suli. kin, la wile sona tan u/AcipenserSturio, la nimi pi ku suli ala li tawa kepeken pi mute lili. nimi ku suli pi tu taso li tawa kepeken pi mute lili. ni li nimi “oko” li nimi “kin.”

ni, la jan sin pi toki pona li kama sona e nimi ku li pilin pona mute tawa nimi ni. jan pi mute mute li kama pana e sona pi nimi ku suli. ni li sama sike. nimi li kama suli tawa jan, la ona li ku suli. ona li ku suli, la ona li kama suli mute tawa jan. ni li pona ala tawa mi. jan sin pi toki pona o kama sona e nimi suli taso lon tenpo nanpa wan. tenpo mute, la lipu ku li pana ala e ni.

nimi o kama suli ala tan lipu taso. nimi o kama suli tan pona ona tan kon ona tan ilo ona. nimi li ku suli, la nimi li sama ala kepeken pi jan ale. ni li pana taso e nasin pi jan pi mute lili lon lipu ku. jan ale li kepeken ala nimi sama kin. nasin mute pi toki pona li pona. sona mute pi toki pona li pona. lipu ala o lawa e toki jan e nasin jan e pilin jan. nasin o kama tan pona taso.

ijo pi pona ala li lon lipu ku. taso, lipu ku li ike taso ala. nimi ku suli li ike taso ala. lipu ku li pana e sona ni: kulupu pi toki pona li kama suli li kama ante. nimi pi kulupu pi toki pona li kama suli li kama ante kin. kin, la lipu ku li pana e ante toki ken pi mute mute tawa jan sin pi toki pona, tawa jan musi pi toki pona. ni li sama nasin ante mute pi toki pona. ni li pona. pini, la lipu ku li anpa e wile lawa pi toki jan. lipu ku en nasin ku li suli e nasin pona mute. nasin toki pona li mute. nasin ku li sona e ni, li pana e sona ni. ni, la o ku! taso, o ku pona taso. o kepeken ala e ku tawa nasin ni: jan li wile ante e toki pi jan ante. o kepeken ala e ku tawa nasin ni: jan li wile pakala e nasin pi sin ala e pali pi sin ala. ante li kama li awen kama. jan pi toki pona o sona e nasin pi tenpo ni e nasin pi tenpo pini e nasin pi tenpo kama. nasin mute li lon o lon. o poki ala e nasin pi toki pona.

pona tawa sina ale.