sina pi toki pona o kama kulupu

tenpo pini la ike li kama. ma ale la ike Kolona li ken jaki e sijelo pi mi ale. ni la mi awen lon tomo. mi tawa ala kulupu suli. mi kama ala lon poka pi jan mute. tenpo tomo la mi lukin e musi mute. mi toki tawa kulupu kepeken ilo. kin la mi kama sona toki pona. ijo musi mute li pona e tenpo mi. toki pona li pona mute e tenpo mi. toki pona en kulupu pi toki pona li awen pona tawa mi.

ni la jan mute li toki: “tenpo tomo li pini la mi wile tawa ma ante. mi wile lukin e ma tomo suli e musi pi tenpo pini e utala musi nasa.” taso mi toki ni ala. nasin pi pilin mi la mi wile ala tawa ma mute. ma mi en ma tomo mi en tomo mi li pona mute tawa mi. taso toki en musi en kulupu a li pona kin. ni la mi kama toki insa: “a, mi wan li wile ala tawa ma ante. taso mi lon kulupu la, mi ken wile tawa. kulupu la, mi wile tawa ma seme?”

mi kama lukin e nasa pona. nasa ni li wawa e pilin mi: tomo wan li awen e sona pi toki mute. suli la, tomo ni pi sona awen li awen e sona pi toki Epelanto. taso ona li awen e sona pi toki sin ante kin. ona li jo e lipu pi toki pona.

tan ni la, mi wile sona: mi en seme li wile tawa tomo sona ni? seme li wile lon poka mi? seme li wile kama kulupu a? jan mute li kama wile ni! kulupu lili ni pi toki pona li tawa ma tomo Win lon ma Esalasi, li toki pona mute, li musi kepeken toki pona, li moku pona, li kama sona e ijo sin e tenpo pini pi ma tomo. a, toki pona li kama e pilin pona mi. taso tenpo kulupu pi toki pona li namako suli e pilin pona mi.

mi wile e sama tawa sina ale. sina pilin pona tan kulupu tan toki pona la o kama lon poka pi sina ante. mi toki pona mute kepeken ilo. ni li pona. taso pilin la toki pi ilo ala li pona mute.

a, taso ken la sina sona ala e nasin pona tawa kama pi tenpo kulupu? seme pi toki pona li lon ma sina? seme li wile tawa poka sina? sina sona ala e ni ale la, sina sama mi! o toki e sona ala sina tawa kulupu suli pi toki pona. o pana e lipu tawa kulupu. kulupu li ken pana e sona tawa lipu: seme li wile tawa ma tomo suli seme lon tenpo seme? ni la sina a open e nasin kulupu.

sina ken ala tawa kulupu la, kulupu li ken ala tawa sina la, seme li ken? sina pilin ala pona lon kulupu la, ken ante seme li lon? mi sona e nasin tu tawa pilin kulupu.

nanpa wan la, sina ken awen kepeken ilo. sina ken tawa musi ilo Wijasa (VR Chat). ona la, sina ken tawa ma pi lon ala. sina ken lukin e sijelo pi lon ala. sina kepeken sijelo pi lon ala. taso sina toki kepeken kalama lon. sina kute kin e kalama lon.

nanpa tu la, sina ken sitelen kepeken ala ilo suno. sina pana e pimeja telo tawa lipu walo la sina ken sitelen e toki kepeken ilo sitelen palisa taso. pali ni li pini la sina ken pana e lipu tawa tomo ante anu ma tomo ante anu ma weka ante. lipu tawa li kama lon tomo ante pi toki pona la, lipu tawa sin li ken tan tomo ni tawa tomo sina. mi kin li wile ni. tan wile mi ni la, mi toki e wile mi tawa kulupu suli pi toki pona. tenpo mun kama la, mi pana e lipu tawa a.