tenpo kulupu pi ma tomo Win

jan Ke Tami li jan suli pi toki pona. tenpo mute la ona li pali e toki e sitelen e kalama tawa toki pona. kin la ona li pali e sitelen e toki pi lipu tenpo li lawa e lipu Wesi pi toki pona. tenpo sike ni la ona li kama pilin e ni: “mi wile kulupu lon poka pi jan ante pi toki pona”. ona li sona e ni: ma tomo Win la tomo sona pi toki Epelanto li lon. kin la ma tomo ni li lon insa pi ma Elopa. ni la jan Ke Tami li toki e ni tawa jan pi toki pona: “sina wile e ni la jan pi ma Elopa o kulupu lon poka mi lon ma tomo Win.” jan mute li lukin e toki ni li pilin pona tawa kulupu. ni la tenpo kulupu li kama lon.

mi kin li pilin pona tawa tenpo kulupu. ni la mi tawa ma tomo Win li wile kulupu lon poka pi jan pi toki pona. tenpo kulupu li jo e tenpo suno luka tu. taso jan mute li kama lon tenpo suno nanpa luka li tawa lon tenpo suno nanpa luka tu. mi kama lon tenpo pimeja pi tenpo suno nanpa tu tu. mi tawa kepeken tomo tawa kon.

jan Peja li pali e lipu linluwi ¹ pi lipu tenpo. ona li tan ma Netelan li tawa kepeken tomo tawa kon ante lon tenpo sama. ni la mi tu li lon ma pi tomo tawa kon lon ma tomo Win la mi kulupu. mi kama sona e ni: jan Peja li pona mute li musi tawa mi. mi tu li wile tawa tomo wan lon ma tomo Win tan ni: mi ken lape lon ona. jan Ke Tami kin li lon tomo ni.

ni la jan Peja en mi li alasa e tomo tawa linja. mi lon ona la mi tu li toki li musi li pilin pona a. taso tenpo wan la mi kama sona e ni: mi tawa lon nasin ike. mi weka tan tomo lape mi. mi tu li weka tan tomo tawa linja li wile tawa kepeken tomo tawa linja pi nasin pona. tenpo pimeja li lon. tomo tawa mute ala li lon. jan mute ala li lon. taso mi pona. tenpo pimeja ni la tomo tawa linja wan kin li kama li tawa e mi. ni la tenpo kama mute la mi tu li kama pona lon tomo lape li lukin e jan Ke Tami. mi ale li pilin lape mute li open lape kepeken tenpo lili. ale li pona.

tenpo suno nanpa luka li kama! mi jan tu wan lon tenpo ni. mi ale li tawa tomo pi ilo sitelen. mi sitelen e lipu tenpo e lipu ante pona. ni la mi tawa ma kasi. jan Pelanton en jan Peton li kama. ona li tan ma Mewika. ona tu kin li pona li musi tawa mi. mi ale li kepeken e lipu sitelen li toki e ni. ona li toki musi li toki pona. tenpo ni la jan ante kin li kama. jan Luna en jan Pulo en jan Simo en jan Masije en jan Jakopo li kama. ona ale li pona tawa mi.

jan mute li lon la jan Ke Tami li toki tawa jan ale mi. ona li pali e supa lili mute pi kasi kiwen. nimi wan pi toki pona li lon supa kasi ale. sinpin wan la ona li sitelen kepeken sitelen Lasina. sinpin ante la ona li sitelen kepeken sitelen pona. supa kasi ale li jo e nimi ante. jan Ke Tami li pana e supa kasi wan tawa jan ale. mi mute li pilin pona mute tawa jan Ke Tami tan ni. supa kasi lili mi li toki e ni: “suwi”.

tenpo ni la mi jan mute. ni li pona a. jan Ke Tami li toki e ni tawa mi mute: “mi o musi!” ona li wile musi e musi pi soweli ike². mi mute li musi mute e ni li pilin pona a. mi pini la mi ale li pilin pona kin tan ni: jan Ke Tami li jo e palisa kule mute. palisa kule la mi mute li sitelen lon nasin anpa. mi sitelen e ijo suwi pona mute pi toki pona. jan Ke Tami li sitelen e kijetesantakalu pona kin lon nasin. sina kama sona e ni: mi mute li musi pona lon tenpo suno ni.

tenpo suno kama li tenpo suno nanpa luka wan. ona la mi mute li kulupu kin. taso jan sin tu wan li kama kin. jan Lilin en jan Molisi en jan Wepo li kama. tenpo suno ni li tenpo suno suli tan ni: ona li tenpo suno pi toki pona. tenpo suno ni la toki pona li sike e suno pi nanpa mute wan. jan mute li pali e ijo pi toki pona lon kulupu Ma Pona Pi Toki Pona tan ni. mi mute kin li jo e ilo sona. ni la jan Ke Tami li toki tawa jan mute pi kulupu ni. ona li toki e ijo pi tenpo kulupu ni. taso telo li open kama tan sewi. tenpo kama lili la mi pini e toki li tawa tomo sona pi toki Epelanto.

tomo sona la jan sona wan li kama li toki e tenpo pini pi toki Epelanto tawa mi mute. ona li sona pona. mi mute li toki kin e toki pona tan ni: pali open ona li sama. kin la mi mute li pana e lipu tenpo tawa tomo sona ni. ona li pilin pona li wile awen jo e lipu tenpo. tenpo pimeja la mi mute li tawa telo nasin Tona li moku e telo li musi mute. tenpo ni la jan Ke Tami li pana e sona pi sitelen musi tawa mi. mi kama sona e ni: tenpo pini la mi lukin e sitelen musi lon lipu Wesi. ona li pona lukin tawa mi. ni la mi wile sona e kon ona. jan Ke Tami li pana pona e sona ona tawa mi. mi pilin pona tan ni li sitelen kin e sitelen musi lon nasin anpa.

tenpo suno kama li tenpo suno nanpa luka tu. ona li tenpo suno pini pi tenpo kulupu lon ma tomo Win. jan mute li tawa weka lon tenpo ni. taso mi ante li pali kin e ijo lon kulupu. kin la jan Owen li kama kulupu mi lon tenpo ni. mi tawa tomo sona pi ilo tenpo tan ni: ona li wile e mani ala. tomo sona ni li jo e lipu. ona la jan li lukin e ilo tenpo lon tomo ni la ona li ken sitelen e nimi ona e ijo pona lon lipu. mi mute li pali e ijo musi pona. mi sitelen e nimi mi kepeken sitelen pona li sitelen e toki kepeken toki pona a.

jan Ke Tami li tawa kin la jan Pulo li lawa e mi mute tan ni: ona li tan ma tomo Win li sona pona e ona. ni la mi mute li tawa ma kasi li pali e musi lipu li toki mute. tenpo pimeja la mi ale li tawa tomo lili pi kalama musi li kute e kalama musi pi jan tu. jan wan li kalama pona kepeken ilo kalama pi linja luka wan. jan ante li kalama uta pona li mu pona kin. kalama musi ni li pona mute tawa mi.

tenpo open pi tenpo suno kama la mi kin li tawa weka. tenpo kulupu ni la mi kama sona e jan pona mute tan ma ante mute. mi ale li toki lili e toki Inli e toki Tosi e toki Kanse e toki Epelanto lon tenpo kulupu. mi mute li toki mute mute e toki pona taso. ni li suli mute tawa mi li pana e pilin sewi. jan Ke Tami li pali e tenpo kulupu li lawa e ijo ona. pona o tawa jan Ke Tami! pini la mi wile toki e ijo wan ni tawa jan ale pi toki pona: “o kulupu! o kulupu kin.”